କଟକ୨୬|୬: କଟକ ସହରବାସୀଙ୍କ ସମସ୍ୟା ସମାଧାନ ଲାଗି ଲୋକଙ୍କ ପାଖରେ ପହଞ୍ଚିବ ସରକାରୀ କଳ । ଏଥିପାଇଁ କଟକର ନୂଆ ଜିଲ୍ଲାପାଳ ଆରମ୍ଭ କରିଛନ୍ତି ଅଭିଯାନ । ୨ ଦିନ ମଧ୍ୟରେ ଜିଲ୍ଲାପାଳ ସହରର ବିଭିନ୍ନ ସ୍ଥାନ ବୁଲି ସ୍ଥିତି ଅନୁଧ୍ୟାନ କରିଛନ୍ତି । ଆଗକୁ ଜଣେ ଜଣେ ଦକ୍ଷ ଅଧିକାରୀଙ୍କ ନେତୃତ୍ବରେ ଗଠିତ ଟିମ୍ ଲୋକଙ୍କ ପାଖରେ ପହଞ୍ଚି ସେମାନଙ୍କୁ ସରକାରୀ ସେବା ଯୋଗାଇ ଦେବ ବୋଲି ଜିଲ୍ଲାପାଳ କହିଛନ୍ତି ।
ଆପତ୍ତି ଅଭିଯୋଗ ଶୁଣାଣି ଏବଂ ସରକାରୀ ସେବା ପାଇଁ ଲୋକେ ଅଫିସ୍ ଧାଇଁବେନି, ଅଫିସ୍ ପହଞ୍ଚିବ ଲୋକଙ୍କ ପାଖରେ । ଦାୟିତ୍ବ ଗ୍ରହଣ ପରେ କଟକର ନୂଆ ଜିଳ୍ଲାପାଳ ଏଦିଗରେ ଆରମ୍ଭ କରିଛନ୍ତି ପଦକ୍ଷେପ । ଲୋକଙ୍କ ନିକଟରେ ସେବା ପହଞ୍ଚାଇବାକୁ ଆରମ୍ଭ ହୋଇଛି ଗୋପଦ ସେବା । ଦୈନିକ ସକାଳ ୮ରୁ ସାଢେ ୯ ଟା ଯାଏ ସହରର ବିଭିନ୍ନ ଅଞ୍ଚଳ ବୁଲିବ ପ୍ରଶାସନିକ ଟିମ୍ । ଲୋକଙ୍କ ଆବଶ୍ୟକତାକୁ ସେମାନଙ୍କ ଦ୍ବାର ନିକଟରେ ପୂରଣ ପାଇଁ ଚେଷ୍ଟା କରିବ । ଏଥିପାଇଁ ଜିଳ୍ଲାପାଳ ଏବଂ ସିଏମ୍ସି କମିଶନର କ୍ଷେତ୍ରକୁ ଓହ୍ଲାଇଛନ୍ତି । ବିଭିନ୍ନ ଅଞ୍ଚଳ ବୁଲି ପରିମଳ, ଡ୍ରେନେଜ୍ ଓ ଅବ୍ୟବସ୍ଥାତି ଟ୍ରାଫିକ୍ ଅବସ୍ଥା ପରଖିଛନ୍ତି । ପ୍ରଶାସନ ଏବଂ ଲୋକଙ୍କ ଭିତରେ ଦୂରତା ହେଉଛି ବିଭିନ୍ନ ସମସ୍ୟାର କାରଣ ବୋଲି ଜିଳ୍ଲାପାଳ କହିଛନ୍ତି
କଟକ ସହରର ବିଭିନ୍ନ ସମସ୍ୟା ପାଇଁ ଜାଇକା ପ୍ରକଳ୍ପକୁ ଅନେକାଂଶରେ ଦାୟୀ କରାଯାଇପାରେ । ଅବ୍ୟବସ୍ଥିତ ଢଙ୍ଗରେ ହେଉଥିବା ନିର୍ମାଣ କାର୍ଯ୍ୟ ଲୋକଙ୍କ ସମସ୍ୟାକୁ ଦ୍ବିଗୁଣିତ କରୁଛି । ଏକଥା ସ୍ବୀକାର କରିଛନ୍ତି ଜିଳ୍ଲାପାଳ ଏବଂ ସିଏମ୍ସି କମିଶନର। ତେଣୁ ଯେଉଁଠି ଜାଇକା ପ୍ରକଳ୍ପ କାମ ଜାରି ରହିଛି, ସେଠାରେ ସୂଚନା ଫଳକ ଟାଙ୍ଗିବା ବାଧ୍ୟତାମୂଳକ ବୋଲି ଜିଲ୍ଲପାଳ କହିଛନ୍ତି । ସେହିପରି ଜଣ୍ତିସ ପ୍ରଭାବିତ ଅଞ୍ଚଳରେ ପରିମଳ ବ୍ୟବସ୍ଥାରେ ସୁଧାର ପାଇଁ ସି ଏମ୍ସି ଯୁଦ୍ଧକାଳୀନ ଭିତ୍ତିରେ ପଦକ୍ଷେପ ନେଉଥିବା କମିଶନର କହିଛନ୍ତି ।
ଡ୍ରେନ ଜବରଦଖଲ ବିରୋଧରେ ପ୍ରଶାସନ ଜିରୋ ଟଲରାନ୍ସ ନୀତି ଆପଣେଇବ ବୋଲି ସିଏମ୍ ସି କମିଶନର ଏବଂ ଜିଳ୍ଲାପାଳ କହିଛନ୍ତି