Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ରହସ୍ୟ ଘେରରେ ପୂର୍ବତନ ମୁଖ୍ୟମନ୍ତ୍ରୀଙ୍କ ପୁଅ ରୋହିତ ତିୱାରୀଙ୍କ ମୃତ୍ୟୁ ଘଟଣା, ମା କହିବାକୁ ଚାହୁଁଛନ୍ତି କିଛି ଗୁମର କଥା…

19/04/2019 at 4:28 PM

ଦିଲ୍ଲୀ ୧୯/୪ : ରୋହିତ ଶେଖର ତିୱାରୀ ମୃତ୍ୟୁ ଘଟଣାରେ ବୁଧବାର ଦିନ ୫ ଜଣିଆ ଡାକ୍ତରଙ୍କ ଟିମ ଶବ ବ୍ୟବଚ୍ଛେଦ କରିଥିଲେ | ଶବ ବ୍ୟବଚ୍ଛେଦ ପରେ ରିପୋର୍ଟକୁ ନେଇ ସନ୍ଦେହରେ ପଡିଗଲେ ଡାକ୍ତର | ଡାକ୍ତରମାନେ ପୋଲିସକୁ ଯୋଗାଯୋଗ କରି ରୋହିତଙ୍କ ୧୨ ବର୍ଷର ମେଡିକାଲ ଯାଞ୍ଚ ରିପୋର୍ଟ ମାଗିଥିଲେ | କାରଣ ରୋହିତଙ୍କ ବ୍ୟବଚ୍ଛେଦରୁ କିଛି ସ୍ପଷ୍ଟ ଜଣାପଡିନଥିଲା | ସମସ୍ତ ତଥ୍ୟ ପାଇଁ ସେ ୧୨ ବର୍ଷର ମେଡିକାଲ ଇତିହାସ ରିପୋର୍ଟ ମାଗିଥିଲେ |


ପୋଲିସକୁ ପରିବାର ସଦସ୍ୟ ଦେଇଥିବା ତଥ୍ୟ ଅନୁଯାୟୀ, ୨୦୦୭ ମସିହାରେ, ୨୬ ବର୍ଷ ବୟସରେ ରୋହିତଙ୍କୁ ପ୍ରଥମଥର ପାଇଁ ହୃଦଘାତ ହୋଇଥିଲା | ଏହାପରେ ତାଙ୍କର ଅପରେସନ କରାଯାଇଥିଲା | ୨୦୧୮ ମସିହାରେ ପୁଣିଥରେ ତାଙ୍କୁ ହୃଦଘାତ ସମସ୍ୟା ଦେଖା ଦେଇଥିଲା | ପୁଣିଥରେ ସାକେତ ସ୍ଥିତ ମେକ୍ସ ହସ୍ପିଟାଲରେ ଅପରେସନ କରାଯାଇଥିଲା | ଏହାପରେ ଲଗାତାର ସେ ମେକ୍ସ ହସ୍ପିଟାଲ ଡାକ୍ତରଙ୍କୁ ଯୋଗାଯୋଗ କରୁଥିଲେ | ରୋହିତଙ୍କ ସମସ୍ତ ତଥ୍ୟ ପାଇଁ ତାଙ୍କର ଶବ ବ୍ୟବଚ୍ଛେଦ କରୁଥିବା ଡାକ୍ତର ମେକ୍ସ ହସ୍ପିଟାଲ ଡାକ୍ତରଙ୍କୁ ସମ୍ପର୍କ କରିବା ପାଇଁ ପୋଲିସକୁ କହିଥିଲେ |
ପରିବାର ଲୋକେ କହିଛନ୍ତି ଯେ, ରୋହିତଙ୍କୁ ହୃଦଘାତ ଛଡା ଗ୍ୟାସ ଏବଂ ସ୍ଲିପିଂ ଡିଜଅର୍ଡର ସମସ୍ୟା ମଧ୍ୟ ଥିଲା | ପରିବାର ଲୋକେ ପୋଲିସକୁ ରୋହିତଙ୍କ ମେଡିକାଲ ହିଷ୍ଟ୍ରୀ ଏବଂ ଔଷଧ ତାଲିକା ହସ୍ତାନ୍ତର କରିଥିଲେ |


ଉତ୍ତର ପ୍ରଦେଶ ଏବଂ ଉତ୍ତରାଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଏନଡି ତିୱାରୀଙ୍କ ପୁଅ ରୋହିତଙ୍କ ମଙ୍ଗଳବାର ଦିନ ସନ୍ଦହଜନକ ଅବସ୍ଥାରେ ମୃତ୍ୟୁ ହୋଇଥିଲା | ମୃତ୍ୟୁ ଘଟଣାରେ ଏବେ ପର୍ଯ୍ୟନ୍ତ ଏମିତି କୌଣସି ଆଖି ଦୃଶିଆ ପ୍ରମାଣ ସାମ୍ନାକୁ ଆସିନାହିଁ ଯାହା ଆଧାରରେ କାହାକୁ ସନ୍ଦେହ କରାଯାଇପାରିବ | ପୋଲିସ ତଦନ୍ତ ଜାରି ରଖିଛି | ୫ଟି ପ୍ରସଙ୍ଗରେ ପୋଲିସ ତଦନ୍ତ କରୁଛି |


ପ୍ରଥମତଃ ସୋମବାର ଦିନ ଭୋଟ ଦେଇ ରୋହିତ ରାତି ୧୧ଟା ବେଳେ ଡିଫେନ୍ସ କଲୋନୀ ସ୍ଥିତ ନିଜ ଘରକୁ ଫେରିଥିଲେ | ଘରେ ରାତ୍ରି ଭୋଜନ କରି ପାଖାପାଖି ୧୧.୩୦ରେ ସେ ନିଜ ରୁମକୁ ଚାଲିଯାଇଥିଲେ | ମଙ୍ଗଳବାର ଦିନ ସନ୍ଧ୍ୟା ୪ଟା ବେଳେ ଯେତେବେଳେ ଚାକର ତାଙ୍କ ରୁମକୁ ଯାଇ ଦେଖିଲା ରୋହିତଙ୍କ ନାକରୁ ରକ୍ତ ବାହାରୁଥିଲା | ସେ ପରିବାର ଲୋକଙ୍କୁ ଜଣାଇଥିଲେ | ସଂଗେ ସଂଗେ ତାଙ୍କୁ ହସ୍ପିଟାଲ ନିଆଯାଇଥିଲା | ଡାକ୍ତର ତାଙ୍କୁ ମୃତ ଘୋଷଣା କରିଥିଲେ | ତେବେ ସକାଳୁ ସେ ନ ଉଠିବା ଜାଣି ମଧ୍ୟ କେହି ତାଙ୍କୁ ଯାଇ ଉଠାଇ ନଥିଲେ କାହିଁକି ସେନେଇ ପୋଲିସ ତଦନ୍ତ କରୁଛି |


ଦ୍ୱିତୀୟତଃ ରୋହିତଙ୍କୁ ନିଦ ହେଉନଥିବା ଯୋଗୁଁ ସେ ଅନେକ ସମୟରେ ନିଦ ବଟିକା ବ୍ୟବହାର କରୁଥିଲେ | ତେବେ ଭୋଟ ଦେଇ ଫେରିବାବେଳେ ସେ ନିଦ ବଟିକା ଖାଇଥିଲେ ନା ଆଉ କିଛି ନିଶା ଦ୍ରବ୍ୟ ନେଇଥିଲେ ସେନେଇ ପୋଲିସ ତଦନ୍ତ କରୁଛି | ସେ ନିଶାସକ୍ତ ଅବସ୍ଥାରେ ନିଦ ବଟିକା ଖାଇଥିଲେ କି ଯାହାର ପ୍ରତିକ୍ରିୟାରେ ତାଙ୍କର ମୃତ୍ୟୁ ହୋଇଛି ବୋଲି ପୋଲିସ ସନ୍ଦେହ ପ୍ରକାଶ କରୁଛି | ଯଦି ପୋଲିସର ସନ୍ଦେହ ଠିକ ତାହେଲେ ତାଙ୍କୁ ନିଦ ବଟିକା କିଏ ଦେଇଥିଲା ସେନେଇ ପୋଲିସ ଯାଞ୍ଚ କରୁଛି |


ତୃତୀୟତଃ ରୋହିତଙ୍କ ମା ଉଜ୍ଜ୍ଵଳା ସାମ୍ବାଦିକଙ୍କୁ କହିଥିଲେ ଯେ, ରୋହିତ ଅବସାଦଗ୍ରସ୍ତ ଥିଲେ | ତେବେ ସେ କାହା ପାଇଁ ଅବସାଦଗ୍ରସ୍ତ ଥିଲେ ତାଙ୍କ ସମ୍ପର୍କରେ ସେ ପୋଲିସକୁ କହିବେ ବୋଲି କହିଥିଲେ | ସେ କହିଥିଲେ ଯେ, ତାଙ୍କ ମନରେ ବହୁତ କଥା ଅଛି କିନ୍ତୁ ଏହା ଉଚିତ ସମୟ ନୁହେଁ | ମା’ଙ୍କ ଏହି ବୟାନର ମାନେ କଣ ତାହା ପୋଲିସ ଜାଣିବାକୁ ଚାହୁଁଚି |


ଚତୁର୍ଥରେ ପୋଲିସ ଜାଣିବାକୁ ଉଦ୍ୟମ କରୁଛି ଯେ, ସେ ଯେତେବେଳେ କଟୋଦ୍ୱାର ଭୋଟ ଦେବା ପାଇଁ ଯାଇଥିଲେ ସେଠାରେ କାହା କାହାକୁ ସମ୍ପର୍କ କରିଥିଲେ | ସେଠାରେ କାହାକୁ ସାକ୍ଷାତ କରିଥିଲେ କି ଫୋନ କରିଥିଲେ କି ରୋହିତ ? ସେଥିପାଇଁ ପୋଲିସ ରୋହିତଙ୍କ ଫୋନରୁ କଲ ଡିଟେଲ ରେକର୍ଡ ଯାଞ୍ଚ କରୁଛି |


ପଞ୍ଚମରେ ପୋଲିସ ବର୍ତ୍ତମାନ ଜାଣିବାକୁ ଚାହୁଁଚି ଯେ, ଯେତେବେଳେ ରୋହିତ ନିଜ ରୁମକୁ ଯାଇଥିଲେ ସେତେବେଳେ ଘରର ବାକି ସଦସ୍ୟ କୁଆଡେ ଯାଇଥିଲେ | ତାଙ୍କୁ ଖାଇବାକୁ କିଏ ଦେଇଥିଲା ନା ସେ ନିଜେ ଆଣି ଖାଇଥିଲେ | ସେ ଯଦି ସକାଳୁ ଘରୁ ବାହାରିନଥିଲେ ତଥାପି ଘରଲୋକ କାହିଁକି ତାଙ୍କ ରୁମକୁ ଯାଇ ତାଙ୍କୁ ଡାକିନଥିଲେ | ସେନେଇ ପୋଲିସ ତଦନ୍ତ ଜାରି ରଖିଛି | ଏହାଛଡା ପୋଲିସ ସିସିଟିଭି ଫୁଟେଜରୁ ମଧ୍ୟ ତଥ୍ୟ ଖୋଜିବାକୁ ଚେଷ୍ଟା କରୁଛି |


ପୋଲିସ ଏହି ମାମଲାରେ ଭାଇ ସିଦ୍ଧାର୍ଥଙ୍କ ସମେତ ଘରର ବାକି ୧୦ ଜଣ ସଦସ୍ୟଙ୍କୁ ପଚରାଉଚୁରା କରୁଛି | ପୋଲିସ ଏବେ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଛି | ପୋଲିସ ରୋହିତଙ୍କ ସମେତ ୩ଜଣଙ୍କ କଲ ଡିଟେଲ ରେକର୍ଡ ଯାଞ୍ଚ କରୁଛି | ଘର ଭିତରେ ଏବଂ ବାହାରେ ଲାଗିଥିବା ୪ଟି ସିସିଟିଭିକୁ ପୋଲିସ ଜବତ କରିଛି | ଏବେ ପର୍ଯ୍ୟନ୍ତ ରୋହିତଙ୍କ ମୃତ୍ୟୁ ମାମଲାରେ ପାରିବାରିକ ବିବାଦ କିମ୍ବା ପ୍ରପର୍ଟି ବିବାଦ ଭଳି କୌଣସି ସଂକେତ ମିଳିନାହିଁ | ରୋହିତ ୨୦୧୭ ମସିହାରେ ବିଜେପିରେ ଯୋଗ ଦେଇଥିଲେ |

   Related Posts