Thursday, September 19, 2019

Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଦିଲ୍ଲୀରେ ଦିଲ୍ ମିଳିଲା ନା ନାହିଁ : ଏକ ନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ଓଡ଼ିଶାକୁ ଫୋକସ ରାଜ୍ୟର ମାନ୍ୟତା ଦାବି କଲେ ନବୀନ

ମୁଲାକାତ ହୁଇ କ୍ୟା ବାତ୍‌ ହୁଇ ।  ଦିଲ୍ଲୀରେ ଦିଲ୍‌ ମିଳିଲା ନା ନାହିଁ।  ଦିଲ୍ଲୀରେ ନବୀନ-ମୋଦି ଭେଟଘାଟ ପରେ କେତେ କଣ ପ୍ରଶ୍ନ । ନିର୍ବାଚନ ବେଳେ ତୁ ତୁ ମେଁମେଁ ହୋଇଥିବା ଏହି ଦୁଇନେତାଙ୍କ କାମାରେଡୋରି ଦେଖିଲେ ଲାଗୁଛି ସତେ ଯେମିତି ଅଲ୍ ଇଜ୍ ଓେଲ୍ । ଦୁଇନେତାଙ୍କ ମନଖୋଲା ହସରୁ ସ୍ପଷ୍ଟ ଯେ ବୋଧହୁଏ ଏବେ କିଛି ଦିନଯାଏଁ ଉଭୟ କେନ୍ଦ୍ର ଓ ରାଜ୍ୟ ସହଭାଗିତାରେ ଓଡିଶା ବିକାଶ କଥା ଚିନ୍ତା କରିପାରନ୍ତି । ତେବେ ସରକାରୀ ପ୍ରେସ ରିଲିଜ୍ ଅନୁଯାୟୀ ଆଜି ନବୀନ ମୋଦିଙ୍କୁ ଭେଟିବା ବେଳେ ରାଜ୍ୟ ସଂପର୍କିତ କିଛି ଗୁରୁତ୍ବପୂର୍ଣ କଥା ଉଠାଇଛନ୍ତି । ନବୀନ ଓଡିଶାକୁ ସ୍ବତନ୍ତ୍ର ପାହ୍ୟା ଦାବି ପ୍ରସଙ୍ଗ ଦୋହରାଇବାକୁ ଭୁଲି ନାହାଁନ୍ତି ।

ଏହି ଦାବି ପୂରଣ କରିବାକୁ ଯେଉଁ ସର୍ତ୍ତ ରହିଛି ତାହା ଓଡିଶା ପାଇଁ ପ୍ରଯୁଜ୍ୟ ହେଉନଥିଲେ ବି ନବୀନ ତାଙ୍କର ଏହି ପେଟ୍ ଇସ୍ୟୁକୁ ପୁଣି ଉଠାଇଛନ୍ତି । ଅବଶ୍ୟ ନବୀନ ଏଥିରେ ନୂଆ ଟର୍ମ ଯୋଡ଼ିଛନ୍ତି। ସ୍ପେସାଲ ଷ୍ଟାଟସ ଷ୍ଟେଟ ନ ହେଲେ ସ୍ପେସାଲ ଫୋକସ୍‌ ଷ୍ଟେଟ ଦେବାରେ ଅସୁବିଧା ବା କେଉଁଠି। ଜାତୀୟ ବିପର୍ଯ୍ୟୟକୁ ଏଥିପାଇଁ ଏକ ମାପକାଠି ଭାବେ ନିଆଯାଇପାରେ । ବିଶେଷ କରି ଏକ ନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ଓଡ଼ିଶାକୁ ଫୋକସ ରାଜ୍ୟର ମାନ୍ୟତା ଦିଆଯାଇ ସ୍ବତନ୍ତ୍ର ରାଜ୍ୟ ପାହ୍ୟାର ସୁବିଧା ଦେବା ଲାଗି ନବୀନ ଦାବି କରିଛନ୍ତି ।

ଫୋନି ବାତ୍ୟା ପରେ ପୁନରୁଦ୍ଧାର ପାଇଁ ୫ ହଜାର କୋଟିର ପ୍ୟାକେଜ ଦାବି କରିଛନ୍ତି ନବୀନ । ଏହି ପ୍ୟାକେଜ୍ ବାଦ୍ କେନ୍ଦ୍ର ଯୋଜନାରେ ୫ ଲକ୍ଷ ପକ୍କାଘର କଥା ବି ଉଠାଇଛନ୍ତି ନବୀନ । ଏହାବାଦ୍ ଖଣି ରୟାଲଟି ସଂଶୋଧନ ପାଇଁ ନବୀନ ମୋଦିଙ୍କ ନିକଟରେ ଦାବି କରିଛନ୍ତି । ଏସବୁ ତ ଦୁଇ ସରକାର ଭିତରର କଥା । କିନ୍ତୁ ବିଜେଡିକୁ ଉପବାଚସ୍ପତି ପଦ ଦେବାକୁ ନେଇ ରାଜନୈତିକ ମହଲରେ ଯେଉଁ ଚର୍ଚା ହେଉଥିଲା ନବୀନ ସେକଥା ଉଠାଇ ନାହାଁନ୍ତି । ଏଣେ କିନ୍ତୁ ନବୀନ ମୋଦିଙ୍କ ମୁଲାକାତକୁ ନେଇ ରାଜନୀତି ଗନ୍ଧ ବାରିଛି ରାଜ୍ୟ ବିଜେପି।

ମୋଦିଙ୍କୁ ଭେଟିବା ପରେ ନବୀନ ରାଷ୍ଟ୍ରପତି ଭବନରେ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଭେଟିଛନ୍ତି। ସେଠାରେ ମଧ୍ୟସେ ଫୋନି ପ୍ରସଙ୍ଗରେ ଆଲୋଚନା କରିଥିବା କହିଛନ୍ତି। ପଞ୍ଚମ ପାଳିରେ ମୁଖ୍ୟମନ୍ତ୍ରୀ ହେବା ପରେ ଏହା ରାଷ୍ଟ୍ରପତିଙ୍କ ସହ ପ୍ରଥମ ସାକ୍ଷାତ।

ଗୋଟିଏ ପଟେ ନବୀନ ପ୍ରଧାନମନ୍ତ୍ରୀଙ୍କୁ ଭେଟିଛନ୍ତି ସେପଟେ ବିଜେଡି ସାଂସଦ ପିନାକୀ ମିଶ୍ର ଦିଲ୍ଲୀରେ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀଙ୍କୁ ଭେଟିଛନ୍ତି। ତେଣୁ କେନ୍ଦ୍ର ଓ ରାଜ୍ୟ ମଧ୍ୟରେ ଏକ ସମୀକରଣ ହୁଏତ ଏହା ଆଭାସ ଦେଇଛି।

ଦିଲ୍ଲୀରେ ନବୀନ ମୋଦିଙ୍କୁ ଭେଟୁଥିବା ବେଳେ ଆଜିଠୁ ଓଡିଶାଗସ୍ତରେ ଥିବା ଏନଡିଆରଏଫ୍ ଟିମ୍ ଫନି କ୍ଷୟକ୍ଷତି ଉପରେ ଏସଆରସିଙ୍କ ସହ ଆଲୋଚନା କରିଛନ୍ତି । ଏଥିରୁ ସଙ୍କେତ ମିଳୁଛି ଖୁବ୍ ଶିଘ୍ର ମୋଦି ସରକାର ଓଡିଶାକୁ ଫନିବାତ୍ୟା ସହାୟତା ଯୋଗାଇଦେବେ । ଏହାସତ୍ବେ ବି କେତେକ ପ୍ରସଙ୍ଗରେ ଉଭୟ ବିଜେପି ଓ ବିଜେଡି ପରସ୍ପରକୁ ଦୋଷାରୋପ କରି ରାଜନୀତି ଆରମ୍ଭ କରିଦେବେ ।

178 Views

   ସମ୍ବନ୍ଧିତ ଖବର