Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଆସନ୍ତୁ ନଜର ପକାଇବା ନବରଙ୍ଗପୁର ଲୋକସଭା ଅନ୍ତର୍ଗତ ୭ଟି ବିଧାନସଭା ନିର୍ବାଚନ ମଣ୍ଡଳୀରେ କେଉଁ ଦଳର ପ୍ରାର୍ଥୀଙ୍କ କ’ଣ ରହିଛି ସ୍ଥିତି

9/04/2019 at 5:09 PM

ନବରଙ୍ଗପୁର ୯/୪ : ନବରଙ୍ଗପୁର ଲୋକସଭା ଆସନରେ ଏବେ ୩ ଦଳର ୩ ମାଝୀଙ୍କ ମଧ୍ୟରେ ଚାଲିଛି ଜୋରଦାର ଟକ୍କର | କଂଗ୍ରେସର ପ୍ରଦୀପ ମାଝୀ, ବିଜେପିର ବଳଭଦ୍ର ମାଝୀ ଓ ବିଜେଡିର ରମେଶ ମାଝୀଙ୍କ ମଧ୍ୟରେ ମୁକାବିଲା ହେଉଛି | ନିର୍ବାଚନ ପ୍ରଚାର ସମୟରେ କଂଗ୍ରେସ ପ୍ରାର୍ଥୀ ପ୍ରଦୀପ ମାଝୀଙ୍କ ବିଦେଶିନୀଙ୍କ ସହ ଅନ୍ତରଙ୍ଗ ମୁହୂର୍ତ୍ତର ଭିଡିଓ ଭାଇରାଲ ହୋଇଥିଲେ ମଧ୍ୟ ଏହା ଭୋଟରଙ୍କ ଉପରେ ବିଶେଷ ପ୍ରଭାବ ପକାଇ ପାରିନାହିଁ | ଗତଥରର ବିଜେଡି ସାଂସଦ ବଳଭଦ୍ର ମାଝୀ ଏଥର ବିଜେପିରୁ ପ୍ରାର୍ଥୀ ହୋଇଛନ୍ତି | ତାଙ୍କର ପୂର୍ବ ସଂଗଠନ ଓ ବର୍ତମାନ ବିଜେପିର ସଂଗଠନ ସହାୟତାରେ ସେ ମଧ୍ୟ ମଜବୁତ ସ୍ଥିତିରେ ଅଛନ୍ତି |

ଅପରପକ୍ଷରେ ମନ୍ତ୍ରୀ ରମେଶ ମାଝୀ ବିଜେଡିର ପ୍ରାର୍ଥୀ ହୋଇଛନ୍ତି | କିନ୍ତୁ ରମେଶ କଂଗ୍ରେସ ଓ ବିଜେପି ପ୍ରାର୍ଥୀଙ୍କୁ ଟକ୍କର ଦେଲେବେଳେ ପଛରେ ପଡିଯାଉଥିବା ଆଲୋଚନା ହେଉଛି |ନବରଙ୍ଗପୁର, ଉମରକୋଟ, ଝରୀଗାଁ ଓ ଡାବୁଗାଁରେ କଂଗ୍ରେସ ପ୍ରାର୍ଥୀ ପ୍ରଦୀପ ମାଝୀଙ୍କ ସ୍ଥିତିରେ ଉନ୍ନତି ପରିଲକ୍ଷିତ ହୋଇଥିବାବେଳେ ବଳଭଦ୍ର ମାଝୀ ତାଙ୍କ ନିର୍ବଚନୀ କାର୍ଯ୍ୟକ୍ରମ ସଠିକ ଦେଖାରେଖା କରିପାରୁନଥିବାରୁ ସାମାନ୍ୟ ଅସୁବିଧାର ସମ୍ମୁଖୀନ ହୋଇଛନ୍ତି | ତେବେ ନବରଙ୍ଗପୁର ଲୋକସଭା ଆସନ ଅନ୍ତର୍ଗତ ବିଭିନ୍ନ ବିଧାନସଭା ନିର୍ବାଚନ ମଣ୍ଡଳୀର ଦଳୀୟ ପ୍ରାର୍ଥୀଙ୍କ ସଫଳତା ଓ ବିଫଳତାର ପ୍ରଭାବ ଲୋକସଭା ପ୍ରାର୍ଥୀଙ୍କୁ ଭୋଗିବାକୁ ପଡିବ |


ଆସନ୍ତୁ ନଜର ପକାଇବା ନବରଙ୍ଗପୁର ଲୋକସଭା ଅନ୍ତର୍ଗତ ୭ଟି ବିଧାନସଭା ନିର୍ବାଚନ ମଣ୍ଡଳୀରେ କେଉଁ ଦଳର ପ୍ରାର୍ଥୀଙ୍କ କଣ ରହିଛି ସ୍ଥିତି :


ଉମରକୋଟ : ଉମରକୋଟ ବିଧାନସଭା ନିର୍ବାଚନ ମଣ୍ଡଳୀରେ ବିଜେଡି ସୁବାସ ଗଣ୍ଡଙ୍କୁ ପ୍ରାର୍ଥୀ କରିଥିବାବେଳେ ବିଜେପି ନିତ୍ୟାନନ୍ଦ ଗଣ୍ଡ ଓ କଂଗ୍ରେସ ଯଶୋଦାରାଣୀ ଗୌଡ଼ଙ୍କୁ ପ୍ରାର୍ଥୀ କରିଛି | ଏହି ନିର୍ବାଚନ ମଣ୍ଡଳୀରେ ବଙ୍ଗାଳି ଭୋଟରମାନେ ନିର୍ଣ୍ଣାୟକ ଭୂମିକା ଗ୍ରହଣ କରିବେ | ବିଜେଡି ଓ ବିଜେପି ଭିତରେ ଏଠାରେ ସିଧାସଳଖ ଲଢେଇ ହେଉଥିବାବେଳେ ସୁବାସ ଗଣ୍ଡଙ୍କ ସ୍ଥିତି ସାମାନ୍ୟ ମଜବୁତ ରହିଛି |


ଝରୀଗାଁ : ଝରୀଗାଁ ବିଧାନସଭା ନିର୍ବାଚନ ମଣ୍ଡଳୀରେ ଲୋକସଭା ପ୍ରାର୍ଥୀ ରମେଶ ମାଝୀଙ୍କ ସାନ ଭାଇ ପ୍ରକାଶ ମାଝୀଙ୍କୁ ବିଜେଡି ପ୍ରାର୍ଥୀ କରିଛି | ଏଠାରେ ବିଜେପି ପର୍ଶୁ ମାଝୀଙ୍କୁ ପ୍ରାର୍ଥୀ କରିଥିବା ବେଳେ କଂଗ୍ରେସ ଉଳଧାରା ମାଝୀଙ୍କୁ ପ୍ରାର୍ଥୀ କରିଛି | କଂଗ୍ରେସ ଓ ବିଜେପି ପ୍ରାଥୀଙ୍କ ସ୍ଥିତି ଭଲ ରହିଛି | ପ୍ରକାଶ ମାଝୀ ବିଭିନ୍ନ ଉଦ୍ୟମ କରି ନିଜ ସ୍ଥିତି ସୁଧରାଇବା ପାଇଁ ଚେଷ୍ଟା ଜାରି ରଖିଛନ୍ତି | ବିଭିନ୍ନ ସ୍ଥାନରେ ପ୍ରକାଶ ମାଝୀଙ୍କୁ ଭୋଟରଙ୍କ ଆକ୍ରୋଶର ଶିକାର ହୋଇଥିବା ଦେଖିବାକୁ ମିଳିଛି |


ନବରଙ୍ଗପୁର : ନବରଙ୍ଗପୁର ବିଧାନସଭା ଆସନରେ ବିଜେଡି ବିଧାୟକ ମନୋହର ରନ୍ଧାରୀଙ୍କ ବଦଳରେ ସଦାଶିବ ପ୍ରଧାନୀଙ୍କୁ ପ୍ରାର୍ଥୀ କରିଛି | ବିଜେପି ପ୍ରାର୍ଥୀ କରିଛି ନବରଙ୍ଗପୁର ଜିଲ୍ଲା ହାବିଲ୍ଦାର କନେଷ୍ଟବଳ ସଂଘର ସଭାପତି ଗୌରୀ ଶଙ୍କର ମାଝୀ | କଂଗ୍ରେସ ପ୍ରାର୍ଥୀ କରିଛି ବରିଷ୍ଠ ନେତା ସଦନ ନାୟକଙ୍କୁ | ସଦାଶିବ ପ୍ରଧାନୀ ହେଉଛନ୍ତି ପୂର୍ବତନ କଂଗ୍ରେସ ସାଂସଦ ଖଗପତି ପ୍ରଧାନୀଙ୍କ ପୁତୁରା ଏବଂ ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷ ଗୋପୀନାଥ ପ୍ରଧାନୀଙ୍କ ପୁଅ | ନାଲକୋ ଚାକିରୀ ଛାଡି ସେ ପ୍ରଥମଥର ପାଇଁ ନିର୍ବାଚନ ମୈଦାନକୁ ଓହ୍ଲାଇଛନ୍ତି | ଦୀର୍ଘ ୩୦ ବର୍ଷ ହେଲା ନବରଙ୍ଗପୁର ସହିତ ତାଙ୍କର କୌଣସି ସମ୍ପର୍କ ନଥିଲା | ଏଠାରେ ସେ ଦଳୀୟ ଅନ୍ତଃ କନ୍ଦଳର ମଧ୍ୟ ସମ୍ମୁଖୀନ ହେଉଛନ୍ତି | କହିବାକୁ ଗଲେ ବିଜେପିର ସ୍ଥିତି ଏଠାରେ ବିଜେପିର ସ୍ଥିତି ମଜବୁତ ଥିବାବେଳେ ଶେଷ ମୁହୂର୍ତ୍ତରେ ବିଜେଡିର ଗୋଟି ଚାଳନା ପରିସ୍ଥିତିକୁ ଓଲଟପାଲଟ କରିଦେଇପାରେ |


ମାଲକାନଗିରି : ମାଲକାନଗିରି ବିଧାନସଭା ନିର୍ବାଚନ ମଣ୍ଡଳୀରେ ବିଜେଡି ମୁକୁନ୍ଦ ସୋଡିଙ୍କୁ ପ୍ରାର୍ଥୀଙ୍କୁ କରିଥିବାବେଳେ ବିଜେପି ଆଦିତ୍ୟ ମାଢିଙ୍କୁ ପ୍ରାର୍ଥୀ କରିଛି | କଂଗ୍ରେସ ପ୍ରାର୍ଥୀ ହୋଇଛନ୍ତି ମାଳା ମାଢି | ଏଠାରେ ଗତ ୩ ଦିନ ତଳ ପର୍ଯ୍ୟନ୍ତ ବିଜେପିର ସ୍ଥିତି ଭଲ ଥିଲା | ତେବେ ପ୍ରଚାର ପାଇଁ ପ୍ରତିଶୃତି ଦେଇ ତୁଙ୍ଗ ନେତାମାନେ ନିର୍ବାଚନୀ ସଭାରେ ନପହଞ୍ଚିବା ଯୋଗୁଁ ସ୍ଥିତି ବିଗିଡି ଯାଇଛି | ଅପରପକ୍ଷରେ ମୁକୁନ୍ଦ ସୋଡି ଏହାର ଫାଇଦା ନେବା ପାଇଁ ଉଦ୍ୟମ ଜାରି ରଖିଛନ୍ତି |


ଚିତ୍ରକୋଣ୍ଡା : ଚିତ୍ରକୋଣ୍ଡାରେ ଏଥର କାକ ଝିଆରୀ ମଧ୍ୟରେ ଫାଇଟ ଦେଖିବାକୁ ମିଳିଛି | ବିଜେଡି ଏଠାରେ ପୂର୍ଣଚନ୍ଦ୍ର ବକାଙ୍କୁ ପ୍ରାର୍ଥୀ କରିଥିବାବେଳେ ବିଜେପି ପ୍ରାର୍ଥୀ କରିଛି ପଦୁ ମାଝୀଙ୍କୁ | କଂଗ୍ରେସରୁ ପ୍ରାର୍ଥୀ ହୋଇଛନ୍ତି ଲକ୍ଷ୍ମୀ ପ୍ରିୟ ନାୟକ | ପୂର୍ଣଚନ୍ଦ୍ର ବକା ଓ ଲକ୍ଷ୍ମୀପ୍ରିୟା ନାୟକ ସମ୍ପର୍କରେ ଦାଦା ଝିଆରୀ | ଏଠାରେ ବିଜେଡି ଓ କଂଗ୍ରେସ ମଧ୍ୟରେ ଜୋରଦାର ଟକ୍କର ହେଉଛି |


ଡାବୁଗାଁ : ଡାବୁଗାଁ ବିଧାନସଭା ନିର୍ବାଚନ ମଣ୍ଡଳୀରେ ବିଜେଡିରୁ ମନୋହର ରନ୍ଧାରୀ, ବିଜେପିରୁ ପଦ୍ମାନ ନାୟକ ଓ କଂଗ୍ରେସରୁ ଭୁଜବଳ ମାଝୀ ପ୍ରାର୍ଥୀ ହୋଇଛନ୍ତି | ତେବେ ଲଢେଇ ମନୋହର ରନ୍ଧାରୀ ଓ ଭୁଜବଳ ମାଝୀଙ୍କ ମଧ୍ୟରେ ଜୋରଦାର ହେଉଥିବା ଦେଖିବାକୁ ମିଳିଛି |


କୋଟପାଡ଼ : କୋଟପାଡ଼ରେ ମନୋହର ରନ୍ଧାରୀଙ୍କ ଭଉଣୀ ପଦ୍ମିନୀ ଦିଆନଙ୍କୁ ବିଜେଡି ପ୍ରାର୍ଥୀ କରିଛି | ବିଜେପିରୁ ପ୍ରାର୍ଥୀ ହୋଇଛନ୍ତି ଖଗେଶ୍ୱର ପୂଜାରୀ ଓ କଂଗ୍ରେସରୁ ପ୍ରାର୍ଥୀ ହୋଇଛନ୍ତି ବିଧାୟକ ଚନ୍ଦ୍ରଶେଖର ମାଝୀ | ମନୋହର ରନ୍ଧାରୀ ଓ ଚନ୍ଦ୍ରଶେଖର ମାଝୀଙ୍କ ମଧ୍ୟରେ କଡା ଟକ୍କର ହେବ |

   Related Posts