ବାରିପଦା, ୦୫।୦୯: ପାରିବାରିକ କଳହରୁ ଜଘନ୍ୟ ହତ୍ୟାକାଣ୍ଡ । ଜନ୍ମଦାତ୍ରୀକୁ କୋଦାଳରେ ହାଣି ହତ୍ୟା କଲା ପୁଅ । ମୟୂରଭଞ୍ଜ ଜିଲ୍ଲା ବାରିପଦା ଦୁଧିଆଶୋଳ ଗ୍ରାମରେ ଏହି ଘଟଣା ଆଲୋଡନ ସୃଷ୍ଟି କରିଛି ।
ସୂଚନାନୁସାରେ, ଦୁଧିଆଶୋଳ ଗ୍ରାମରେ ରୁହନ୍ତି ବୁଧୁ ସିଂ । ଗତ କିଛିଦିନ ହେବ ସେ ଓ ତାଙ୍କ ମାଆ ଗୁରୁବାରୀ ସିଂଙ୍କ ମଧ୍ୟରେ ଲଗାତାର ଭାବେ କଳହ ହେଉଥିଲା । ତେବେ ଶନିବାର ଏହା ଉଗ୍ର ରୂପ ଧାରଣ କରିଥିଲା । ପାରିବାରିକ କାରଣ ପାଇଁ ଉଭୟଙ୍କ ମଧ୍ୟରେ ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ ବୁଧୁ ସିଂ ଏକ କୋଦାଳ ଆଣି ମାଆ ଗୁରୁବାରୀଙ୍କୁ ହାଣି ପକାଇଥିଲେ । ଫଳରେ ଘଟଣାସ୍ଥଳରେ ହିଁ ଗୁରୁବାରୀଙ୍କ ପ୍ରାଣବାୟୁ ଉଡିଯାଇଥିଲା । ଘଟଣାସ୍ଥଳରେ ପୋଲିସ ପହଁଚି ବୁଧୁ ସିଂଙ୍କୁ ଗିରଫ କରିବା ସହ ମୃତଦେହକୁ ପୋଷ୍ଟ ମଟର୍ମ ପାଇଁ ପଠାଇଛି ।
