କନ୍ଧମାଳ ୦୫।୦୪: ୬ଦିନ ପରେ ମିଳିଲା ନିଖୋଜ ଯୁବତୀଙ୍କ ପତ୍ତା । ତାହା ପୁଣି ଝୁଲନ୍ତା ଅବସ୍ଥାରେ ଠାବ ହେଲା ମୃତଦେହ । ମୃତକ ହରପ୍ରିୟା ମଲିକ । କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ପବିଙ୍ଗିଆ ପଞ୍ଚାୟତ ପୁଟୁକିପଡ଼ାରେ ଟୁକେଲପଦର ପାହାଡରୁ ଠାବ ହୋଇଛି ମୃତଦେହ ।
ଖବର ଅନୁଯାୟୀ, ପୁଟୁକିପଡ଼ା ଗ୍ରାମର କିସ୍ତାର ମଲିକଙ୍କ ଝିଅ ହରପ୍ରିୟା ମଲ୍ଲି କ ଗତ ମଙ୍ଗଳବାର ଠାରୁ କାହାକୁ ନଜଣାଇ କୁଆଡେ ଚାଲିଯାଇଥିଲେ । ବହୁ ଖୋଜାଖୋଜି ପରେ ବି କୌଣସି ପତ୍ତା ମିଳିନଥିଲା । ସୋମବାର ଦିନ ସକାଳ ସମୟରେ ନିଖୋଜ ଯୁବତୀଙ୍କ ମାଆ ପାହାଡ଼କୁ ମହୁଲ ଫୁଲ ଗୋଟାଇବାକୁ ଯାଇଥିଲେ । ହଠାତ୍ ଜଙ୍ଗଲରେ ଥିବା ଏକ ମହୁଲ ଗଛରେ ଝିଅର ମୃତଦେହ ଝୁଲୁଥିବାର ଦେଖିବାକୁ ମିଳିଥିଲା । ଏହାପରେ ତୁରନ୍ତ ପୋଲିସକୁ ଜଣାଇଥିଲେ । ପୋଲିସ ଖବର ପାଇ ପାହାଡ଼ ଉପରେ ପହଞ୍ଚି ମୃତଦେହକୁ ଜବତ କରିଛି । ପୋଲିସ ମୃତଦେହକୁ ଜବତ କରି ଫୁଲବାଣୀ ସଦର ମହକୁମାକୁ ବ୍ୟବଚ୍ଛେଦ ପାଇଁ ପଠାଇଛନ୍ତି । ରିପୋର୍ଟ ଆସିବା ପରେ ଘଟଣା ଉପରୁ ପରଦା ହଟିବ ବୋଲି ସ୍ଥାନୀୟଲୋକ ଆଶା କରିଛନ୍ତି ।
ନିଖୋଜ ଥିବା ଯୁବତୀଙ୍କ ମୃତଦେହ ଏଠାରେ କିପରି , ସେନେଇ ପୋଲିସ ଛାନ୍ଭିନ୍ ଜାରି ରଖିଛି । ପାରିପାର୍ଶିକ ସ୍ଥିତିକୁ ଦେଖିଲେ ଏହା ଆତ୍ମହତ୍ୟା ବୋଲି ପୋଲିସ ସନ୍ଦେହ କରୁଛି । ତେବେ ଘଟଣାର ଫୁଙ୍ଗାନୁଫୁଙ୍ଖ ତଦନ୍ତ ହେଲେ, ଘଟଣା ଉପରୁ ପରଦା ହଟିପାରିବ ବୋଲି ତଦନ୍ତକାରୀ ଅଧିକାରୀ କହିଛନ୍ତି ।
