ମାଲକାନଗିରି,୨୨/୦୫: ଶବକୁ ମିଳିଲା ନାହିଁ ସମ୍ମାନ । ପୁଣି ବାଇକରେ ବୁହା ହେଲା ମୃତ ଦେହ । ମାଲକାନଗିରି ଜିଲ୍ଲା ଖୈରପୁଟ ବ୍ଲକ ଅନ୍ତର୍ଗତ କଦମଗୁଡା ଗ୍ରାମରେ ଜଣେ ବ୍ୟକ୍ତିଙ୍କ ମୃତଦେହକୁ ବାଇକ୍ରେ ବୁହା ହୋଇଛି ।
ସୂଚନାନୁସାରେ, ଖୈରପୁଟରେ ରହୁଥିବା ଶୁକ୍ରା ଶିଶାଙ୍କ ହୃତଘାତରେ ମୃତ୍ୟୁ ହୋଇଥିଲା । ଶୁକ୍ରା ନିଜ ହୋଟେଲରେ ଚାହା ବିକ୍ରି କରିବା ସମୟରେ ହଠାତ୍ ଛାତିରେ ଯନ୍ତ୍ରଣା ଅନୁଭବ କରିଥିଲେ । ଛଟପଟ ହେଉଥିବା ଦେଖି ପଡୋଶୀ ଲୋକେ ଖୈରପୁଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ । ହେଲେ କିଛି ସମୟର ଚିକିତ୍ସା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
କିନ୍ତୁ ମୃତ୍ୟୁ ପରେ ମୃତଦେହକୁ ଘରକୁ ନେବା ପାଇଁ ମେଡିକାଲ ପକ୍ଷରୁ କୌଣସି ଗାଡି ଯୋଗାଇ ଦିଆଯାଇନଥିଲା । ଶେଷରେ ବାଧ୍ୟ ହୋଇ ଗାଁ ଲୋକେ ଏକ ବାଇକ ଯୋଗେ ମୃତଦେହ ନିଜ ଗାଁ କଦମଗୁଡାକୁ ନେଇଥିଲେ ।