ଦେବଗଡ ୨୮।୪: ଦେବଗଡ ଜିଲ୍ଲାରେ କରୋନାର ଦ୍ବିତୀୟ ଲହର କାୟା ବିସ୍ତାର କରିବାରେ ଲାଗିଛି । ପରିସ୍ଥିତି ଏଭଳି ହୋଇଛି ଯେ ମୃତ୍ୟୁ ପରେ ଶ୍ମଶାନକୁ ନେବାପାଇଁ ଚାରି କାନ୍ଧ ମିଳୁନାହିଁ । ଏଭଳି ଏକ ଘଟଣା ସାମ୍ନାକୁ ଆସିଛି ତିଲେଇବଣୀ ବ୍ଲକ୍ ଅନ୍ତର୍ଗତ ସୁଗୁଡା ଗ୍ରାମରେ । ସୁଗୁଡା ଗ୍ରାମର ଚନ୍ଦ୍ରଶେଖର ସାହୁ ପେଶାରେ କବିରାଜ ହୋଇଥିବା ବେଳେ ଚଳିତ ମାସ ୧୫ ତାରିଖରେ କରୋନାରେ ଆକ୍ରାନ୍ତ ହୋଇଥିବା ଚିହ୍ନଟ ହୋଇଥିଲେ । ସେହିଦିନଠାରୁ ସେ ନିଜ ଘରେ ସଂଗରୋଧରେ ରହି ଚିକିତ୍ସିତ ହେଉଥିଲେ ।
ମଙ୍ଗଳବାର ରାତିରେ ତାଙ୍କର ଅବସ୍ଥା ଗୁରୁତର ହେବାରୁ ପରିବାର ପକ୍ଷରୁ ଦେବଗଡ କୋଭିଡ୍ କେୟାର ସେଣ୍ଟରକୁ ଫୋନ୍ କରି ଜଣାଇଥିଲେ । ମାତ୍ର ପରେ ତାଙ୍କର ମୃତ୍ୟୁ ଘଟିଥିଲା । ମୃତ୍ୟୁ ପରେ ପାଖ ପଡୋଶୀ, ଆତ୍ମୀୟସ୍ବଜନ କେହି ମଧ୍ୟ ଆସିନଥିଲେ । ଫଳରେ ତାଙ୍କର ଏକମାତ୍ର ପୁଅ ଏନେଇ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଫୋନ୍ କରି ଜଣାଇଥିଲେ । ଦେବଗଡ କୋଭିଡ୍ ସହାୟତା କେନ୍ଦ୍ର ପକ୍ଷରୁ ଦେବଗଡ ପୌର ପରିଷଦର ୪ ଜଣ ସଫେଇ କର୍ମଚାରୀଙ୍କୁ ଶବ ଦାହ ସଂସ୍କାର ପାଇଁ ପଠାଯାଇଥିଲା ।
ସଫେଇ କର୍ମଚାରୀମାନେ ଶବକୁ ଶ୍ମଶାନକୁ ନେବାପାଇଁ କୌଣସି ଉପାୟ ନପାଇ ଏକ ଶଗଡ ଗାଡିର ଆଶ୍ରୟ ନେଇଥିଲେ । ଚାରି ସଫେଇ କର୍ମଚାରୀ ମିଳିତ ହୋଇ ପିପିଇ କିଟ୍ ପିନ୍ଧି ମୃତଦେହକୁ ଶଗଡରେ ବୋହି ଶ୍ମଶାନ ପର୍ଯ୍ୟନ୍ତ ନେଇଥିଲେ । ପରେ ଶବକୁ ତାଙ୍କ ପୁଅ ମୁଖାଗ୍ନି ଦେଇଥିଲେ । ଏହି ଘଟଣା ସାମ୍ନାକୁ ଆସିବା ପରେ କରୋନା କାଳରେ ମଣିଷ ପଣିଆ ଆଉ ନାହିଁ ହଜିଯାଇଛି ବୋଲି ଚର୍ଚ୍ଚା ଚାଲିଛି ।
