ଧାମନଗର,୨୮/୦୧: ରାସ୍ତା ମରାମତିକରଣ ବେଳେ ନିମ୍ନମାନର କାର୍ଯ୍ୟ ଅଭିଯୋଗ କରିଥିଲେ ସ୍ଥାନୀୟ ଲୋକେ । ଏମିତିକି ରାସ୍ତା ମରାମତି ନ ସରୁଣୁ ପିଚୁ ଉଠି ଯାଉଥିଲା । ଅଭିଯୋଗ ପରେ ସାଂସଦ, ବିଭାଗୀୟ ଯନ୍ତ୍ରୀ, ବ୍ଲକ ଅଧକ୍ଷ ଓ ବ୍ଲକ ସଭାପତିଙ୍କ ସହ ଯାଇ ରାସ୍ତା ମରାମତି କାର୍ଯ୍ୟ ତଦାରଖ କରିବା ସହ ସ୍ଥାନୀୟ ବାସିନ୍ଦାଙ୍କ ସହ ଆଲୋଚନା କରିଛନ୍ତି ।
ସୂଚନାନୁସାରେ, ଭଦ୍ରକ ଜିଲ୍ଲା ଧାମନଗର ଫଳପୁର ରାସ୍ତା କାର୍ଯ୍ୟର ତଦାରଖ କରିଛନ୍ତି ଭଦ୍ରକ ସାଂସଦ ମଞ୍ଜୁଲତା ମଣ୍ଡଳ । ଏହି ରାସ୍ତାର ଲମ୍ବ ପ୍ରାୟ ୬ କିଲୋମିଟର ହୋଇଥିବା ବେଳେ ୧ କୋଟି ୧୮ ଲକ୍ଷ ଟଙ୍କା ବ୍ୟୟରେ ମରାମତିକରଣ କାର୍ଯ୍ୟ ଚାଲିଥିଲା । ତେବେ କେତେକ ସ୍ଥାନରେ ରାସ୍ତାରୁ ପିଚୁ ଉଠିଯାଇଥିବା ଦେଖିବାକୁ ମିଳିଥିଲା ।
ଏବେ ଭଦ୍ରକ ସାଂସଦ ବିଭାଗୀୟ ଯନ୍ତ୍ରୀଙ୍କୁ ନେଇ ରାସ୍ତା କାର୍ଯ୍ୟର ତଦାରଖ କରିଛନ୍ତି । ତେବେ ରାସ୍ତା କାମ ଠିକ ହେଉଥିବା କହିଛନ୍ତି ଓ ରାସ୍ତା କାର୍ଯ୍ୟରେ ଠିକାଦାର ସାମନ୍ୟ ଅବହେଳା କରିଥିବା କହିଛନ୍ତି ବିଭାଗୀୟ ଯନ୍ତ୍ରୀ । ପିଚୁ ଉଠିଥିବା ସ୍ଥାନର ମରାମତି ହୋଇଛି ଓ ଆବଶ୍ୟକ ସ୍ଥାନରେ ପୁନଃ ମରାମତି କରାଯିବ । ରାସ୍ତାର ଉଭୟ ପାର୍ଶ୍ୱରୁ ୩ ଫୁଟ ଲେଖାଏଁ ବଢିବା ନେଇ ସାଂସଦ ପ୍ରତିଶ୍ରୁତି ମଧ୍ୟ ଦେଇଛନ୍ତି ।
