ଭୁବନେଶ୍ୱର ୨୬।୦୪: ରାଜ୍ୟର ବିଭିନ୍ନ ଜିଲ୍ଲାରେ ହୋଇଥିବା ଅସ୍ଥାୟୀ କ୍ୟାମ୍ପରେ ଶ୍ରମିକମାନେ ଫସି ରହିଛନ୍ତି । ଅନେକ ଶ୍ରମିକଙ୍କର କାର୍ଯ୍ୟସ୍ଥଳ ଅନ୍ୟ ଜିଲ୍ଲାରେ ହୋଇଥିବାରୁ କଟକଣା ଯୋଗୁ ପହଞ୍ଚି ପାରୁନାହାନ୍ତି । ସେମାନଙ୍କୁ ସୁବିଧାରେ ନେଇ ସେହି ଜିଲ୍ଲାରେ କାର୍ଯ୍ୟସ୍ଥଳରେ ପହଞ୍ଚାଇବାକୁ ସରକାର ବ୍ୟବସ୍ଥା କରିଛନ୍ତି । ରାଜ୍ୟ ଭିତରେ ଗୋଟିଏ ଜିଲ୍ଲାରୁ ଅନ୍ୟ ଜିଲ୍ଲାକୁ ଶ୍ରମିକଙ୍କ ପରିବହନକୁ ଅନୁମତି ଦେଇଛନ୍ତି ।
ରାଜ୍ୟ ଭିତରେ ଶ୍ରମିକଙ୍କ ଯାତାୟାତ ଓ ପରିବହନ ନେଇ ସରକାର ଶନିବାର ଦିନ ବିସ୍ତୃତ ନିର୍ଦ୍ଦେଶନାମା ଜାରି କରିଛନ୍ତି । ସ୍ୱତନ୍ତ୍ର ରିଲିଫ କମିଶନର ଜାରି କରିଥିବା ଏହି ନିର୍ଦ୍ଦେଶନାମାରେ ଦର୍ଶାଇଛନ୍ତି ଯେ, ରାଜ୍ୟର ସରକାରଙ୍କ ପକ୍ଷରୁ ହୋଇଥିବା ୨୬୧୦ଟି କ୍ୟାମ୍ପରେ ୮୬ହଜାର ଶ୍ରମିକ ଫସି ରହିଛନ୍ତି । ଏଥିରୁ ୧୬ହଜାର ହେଉଛନ୍ତି ଓଡିଆ ଶ୍ରମିକ ଓ ବାକି ଅନ୍ୟମାନେ ରାଜ୍ୟ ବାହାରୁ । ଫସି ରହିଥିବା ଏହି ଶ୍ରମିକମାନେ ରାଜ୍ୟ ଭିତରେ ଅନ୍ୟ ଜିଲ୍ଲାରେ ଥିବା ନିଜ କାର୍ଯ୍ୟସ୍ଥଳରୁ ଯାଇପାରିବେ । ଯେଉଁ ଏଜେନ୍ସି, ଶିଳ୍ପ ସଂସ୍ଥା ବା ଠିକାଦାର ଶ୍ରମିକଙ୍କୁ କ୍ୟାମ୍ପରୁ କାର୍ଯ୍ୟସ୍ଥଳକୁ ନେବାକୁ ଚାହୁଁଥିବେ ସେମାନେ ସ୍ୱୀକୃତିପ୍ରାପ୍ତ ବସ୍ରେ ନେଇପାରିବେ। ସରକାରଙ୍କ ସାମାଜିକ ଦୂରତ୍ୱ ନିୟମ ସହ ଅନ୍ୟ ସୁରକ୍ଷା ସମ୍ପର୍କିକ ପଦକ୍ଷେପ ନେବାକୁ ପଡ଼ିବ । ଶ୍ରମିକଙ୍କୁ ପରିବହନ କରିବାକୁ ଚାହୁଥିବା ଶିଳ୍ପ ସଂସ୍ଥା ଓ ଏଜେନ୍ସୀମାନେ ଜିଲ୍ଲା ଶ୍ରମ ଅଧିକାରୀଙ୍କ ମାଧ୍ୟମରେ ଜିଲ୍ଲାପାଳଙ୍କ ପାଖକୁ ଏଥିପାଇଁ ଅନୁମତି ଆଣିବାକୁ ପଡ଼ିବ। ଜିଲ୍ଲାପାଳ ଏଥିପାଇଁ ମୁଭ୍ମେଣ୍ଟ ପାସ୍ ଦେବେ। ଏହି ଶ୍ରମିକ ପରିବହନ ପାଇଁ ଜିଲ୍ଲାପାଳ ବସ୍ ରିକ୍ୟୁଜିସନ୍ କରି ନିୟୋଜିତ କରିପାରିବେ । ଏ ବାବଦରେ ଖର୍ଚ୍ଚ ସଂପୃକ୍ତ ଶିଳ୍ପ ସଂସ୍ଥା, ଏଜେନ୍ସି ବା ଠିକାଦାର ବହନ କରିବେ ।
ସେହିଭଳି ଯେଉଁଠାରେ ଫସିଥିବା ଶ୍ରମିକମାନେ କୌଣସି ନିଦ୍ଦିଷ୍ଟ ଶିଳ୍ପ ସଂସ୍ଥା ବା ଏଜେନ୍ସୀ ଅଧୀନରେ କାମ କରୁନଥିବେ ସେମାନଙ୍କୁ କାର୍ଯ୍ୟସ୍ଥଳରେ ପହଞ୍ଚାଇବାକୁ ମଧ୍ୟ ସରକାର ବ୍ୟବସ୍ଥା କରିଛନ୍ତି । ବିଡିଓ ବା ଜିଲ୍ଲା ଶ୍ରମ ଅଧିକାରୀ ଏଭଳି ଶ୍ରମିକଙ୍କ ପରିବହନ ସମ୍ପର୍କରେ ଜିଲ୍ଲାପାଳ ଓ ପିଡି ଡିଆରଡିଓଙ୍କୁ ଅବଗତ କରିବେ । ଜିଲ୍ଲାପାଳ ଏହା ଉପରେ ପଦକ୍ଷେପ ନେବେ । ଏହି କ୍ଷେତ୍ରରେ ଶ୍ରମିକ ପରିବହନ ପାଇଁ ଆରଟିଓଙ୍କଠାରୁ ବସ୍ ରିକ୍ୟୁଜିସନ୍ କରାଯିବ । ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଏ ବାବଦ ସମସ୍ତ ଖର୍ଚ୍ଚ ବ୍ୟୟ କରାଯିବ । ଏହି ଉଦ୍ଦେଶ୍ୟରେ ରିକ୍ୟୁଜିସନ୍ ହୋଇଥିବା ବସ୍ଗୁଡ଼ିକର ରୋଡ୍ ଟ୍ୟାକ୍ସ ଛାଡ଼ କରାଯିବ ।
ବିଭିନ୍ନ କ୍ୟାମ୍ପରେ ଏହି ଶ୍ରମିକମାନେ ଫସି ରହିଥିବାରୁ ସେମାନେ ଅନ୍ୟ ଜିଲ୍ଲାରେ କାର୍ଯ୍ୟସ୍ଥଳକୁ ଯିବାବେଳେ ଆଉ କ୍ୱାରେଣ୍ଟାଇନ୍ରେ ରହିବେ ନାହିଁ । ସେମାନେ ୧୪ଦିନିଆ କ୍ୱାରେଣ୍ଟାଇନ୍ରେ ରହି ସାରିଛନ୍ତି । ସଂପୃକ୍ତ ଜିଲ୍ଲାର ଜିଲ୍ଲାପାଳ, ପୌର କାର୍ଯ୍ୟନିର୍ବାହୀ ଅଧିକାରୀ ଓ ସରପଞ୍ଚ ସେମାନଙ୍କୁ କ୍ୱାରେଣ୍ଟାଇନ୍ରେ ରଖିବାକୁ ବାଧ୍ୟ ନକରି ସେମାନଙ୍କୁ କାର୍ଯ୍ୟସ୍ଥଳୀରେ ପହଞ୍ଚାଇବା ବ୍ୟବସ୍ଥା କରିବେ । ଜିଲ୍ଲାର ଜିଲ୍ଲାପାଳ ଓ ଅନ୍ୟ ଅଧିକାରୀମାନେ ସମନ୍ୱୟ ରକ୍ଷା କରି ଶ୍ରମିକଙ୍କୁ ସୁବିଧାରେ କାର୍ଯ୍ୟସ୍ଥଳରେ ପହଞ୍ଚାଇବାକୁ ପଦକ୍ଷେପ ନେବେ । ଜିଲ୍ଲା ଶ୍ରମ ଅଧିକାରୀମାନେ ସଂପୃକ୍ତ ବିଡିଓଙ୍କ ସହ ସମନ୍ୱୟ ରକ୍ଷା କରି ଦୈନିକ ଶ୍ରମିକଙ୍କ ଯାତାୟାତ ତଥ୍ୟ ପ୍ରସ୍ତୁତ କରି ରଖିବେ ବୋଲି ଏସ୍ଆର୍ସି ନିର୍ଦ୍ଦେଶ ଦେଇଛନ୍ତି।
