ଗଜପତି ୧୮।୧୨: ଘରକୁ ଫେରିଲା ନିଖୋଜ ଶିଶୁ । ଗଜପତି ଜିଲ୍ଲା କାଶୀନଗର ବ୍ଲକ୍ କୁମୁଟିସାହିରେ ନିଖୋଜ ହୋଇଥିବା ୬ ବର୍ଷର ଶିଶୁ ଜାମି ହାର୍ଦ୍ଦିକ ଘରକୁ ଫେରିଛି । କାଶୀନଗର କଇଥପଦର ସ୍ଥିତ ସମ୍ପର୍କୀୟଙ୍କ ଘର ନିକଟରୁ ଉଦ୍ଧାର କରାଯାଇଛି । ତେବେ ହାର୍ଦ୍ଦିକଙ୍କୁ ତାଙ୍କ ସମ୍ପର୍କୀୟଙ୍କ ଘର ନିକଟରେ କେହି ଛାଡି ଦେଇଥିବା ସୂଚନା ମିଳିଛି ।
ସୂଚନାଯୋଗ୍ୟ ଯେ, ଗତ ବୁଧବାର ସନ୍ଧ୍ୟାରେ ଘର ପାଖରେ ଖେଳୁଥିବା ବେଳେ ବାପାଙ୍କ ଠିକଣା ପଚାରିଥିଲେ ଏବଂ କାଜୁ ଫ୍ୟାକ୍ଟ୍ରି ଦେଖାଇ ଦେବାକୁ କହି ବାଇକ୍ରେ ଆସି ଦୁଇ ଅଜଣା ବ୍ୟକ୍ତି ଉଠାଇ ନେଇଥିଲେ । ଏହା ପରଠାରୁ ହାର୍ଦ୍ଦିକଙ୍କ କୌଣସି ଖୋଜ ଖବର ମିଳିନଥିଲା । ଏହାପରେ ହାର୍ଦ୍ଦିକଙ୍କ ସାଙ୍ଗସାଥୀଠୁ ଖବର ପାଇ କାଶୀନଗରର ବିଭିନ୍ନ ସ୍ଥାନରେ ପରିବାର ଲୋକେ ଖୋଜାଖୋଜି କରିଥିଲେ । କିନ୍ତୁ ପିଲାଟିର କୌଣସି ପତ୍ତା ମିଳିନଥିଲା । ପରେ ପରିବାର ଲୋକ ବ୍ୟସ୍ତ ହୋଇ କାଶୀନଗର ଥାନାରେ ଲିଖିତ ଭାବେ ଏତଲା ଦାଏର କରିଥିଲେ ।
