ପୁରୀ ୧୭|୧୨: ପୁରୀରେ ଦିନ ଦ୍ବିପହରେ ଘରେ ପଶି ମହିଳାଙ୍କୁ ନିର୍ମମ ଭାବେ ହତ୍ୟା କରାଯାଇଛି । ପୁରୀ ରେଲୱେ କଲୋନୀରେ କ୍ବାର୍ଟରରେ ହତ୍ୟା କାଣ୍ଡ ଘଟିଛି । ଚାଣକ୍ୟ ବିଏନଆର ହୋଟେଲର ଠିକ୍ ପଛପଟେ ଥିବା ରେଲୱେ କଲୋନୀର ସି-୭୫ ନମ୍ବର କ୍ବାର୍ଟରରେ ହତ୍ୟାକାଣ୍ଡ ଘଟିଛି । ରେଲୱେ ହସପିଟାଲର ଡାକ୍ତର ଏସ. କେ. ସାହୁଙ୍କ ପତ୍ନୀ କ୍ବାଟରରେ ଏକୁଟିଆ ଥିବାବେଳେ ଦୁର୍ବୃତ୍ତମାନେ ଗଳାକାଟି ହତ୍ୟା କରିଛନ୍ତି । ମୃତ ମହିଳା ହେଲେ ସୁଜାତା ସାହୁ । ତାଙ୍କ ବୟସ ପାଖାପାଖି ୪୦ ହେବ ।
{"id":64597}
ସ୍ବାମୀ ହସପିଟାଲକୁ ପଳେଇଥିବାବେଳେ ଜାଭିଅର ସ୍କୁଲରେ ୯ମ ଶ୍ରେଣୀରେ ପଢୁଥିବା ଏକମାତ୍ର ପୁଅ ସ୍କୁଲ ପଳେଇଥିଲେ । ସୁଜାତା ଘରେ ଏକାକୀ ଥିଲେ ।କିଏ ଓ କାହିଁକି ଏଭଳି ହତ୍ୟା ଘଟାଇଛି ତାହା ଏଯାଏଁ ଜଣାପଡିନାହିଁ । ଘଟଣାସ୍ଥଳରେ ପହଞ୍ଚି ପୁରୀ ସିଟି ଡିଏସ୍ପି ଓ ସାଇଣ୍ଟିଫିକ ଟିମ୍ ତଦନ୍ତ ଚଳାଇଛନ୍ତି ।
{"id":64598}
ଖବର ନେବାରେ ଜଣାପଡିଛି ଯେ, ଡାକ୍ତର ଏସ.କେ ସାହୁଙ୍କ ଘର ବାରିପଦାରେ । ସେ ଗତ ୭ ବର୍ଷ ହେଲା ପୁରୀ ରେଲୱେ ଡାକ୍ତରଖାନାରେ ଅଛନ୍ତି । ସପରିବାର ରେଲୱେ କଲୋନିର କ୍ବାଟରରେ ରହିଆସୁଛନ୍ତି । ଖବର ପାଇବା ପରେ ଡାକ୍ତର ସାହୁ ଓ ତାଙ୍କ ପୁ୍ଅ ସ୍କୁଲରୁ ଆସି ଘଟଣାସ୍ଥଳରେ ପହଞ୍ଚିଛନ୍ତି । ପ୍ରାଥମିକ ତଦନ୍ତରୁ କାହା ସହିତ କୌଣସି ପୂର୍ବ ଶତ୍ରୁତା ନଥିବା ଜଣାପଡିଛି । ସମ୍ଭବତଃ କେହି ଲୁଟ୍ କରିବା ପାଇଁ ଉଦ୍ୟମ କରି ଏଭଳି କାଣ୍ଡ ଘଟାଇଥାଇପାରେ ବୋଲି ଆଶଂକା କରାଯାଉଛି ।
{"id":64599}
ଡ୍ରଇଁ ରୁମରେ ସୁଜାତାଙ୍କ ରକ୍ତ ଜୁଡୁବୁଡୁ ମୃତଶରୀର ମୁହଁମାଡି ପଡିଥିବାବେଳେ ଟିଭି ଚାଲୁ ରହିଛି । ସମ୍ଭବତଃ ସୁଜାତା ଟିଭି ଦେଖୁଥିବାବେଳେ ତାଙ୍କ ଉପରେ ଆକ୍ରମଣ ହୋଇଥିବା ଅନୁମାନ କରାଯାଉଛି । ଘରର ଆସବାବପତ୍ର ଠିକ୍ ଠାକ୍ ରହିଥିବାରୁ ପୋଲିସ ହତ୍ୟାକାଣ୍ଡର କାରଣ ନେଇ ଦ୍ବନ୍ଦ୍ବରେ ପଡିଛି । ଦିନ ଦ୍ବିପହରରେ କଲୋନୀ ଭିତରେ ପଶି ଏମିତି ହତ୍ୟାକାଣ୍ଡ ଘଟାଇବା ନେଇ ପୁରୀରେ ଚାଞ୍ଚଲ୍ୟ ଖେଳିଯାଇଛି ।
