ଭୁବନେଶ୍ବର ୬|୧୧: ରାଜଧାନୀରେ ମାତିଛନ୍ତି ଲୁଟେରା । ଗଲା ୩ଦିନ ଭିତରେ ଭୁବନେଶ୍ବରର ବିଭିନ୍ନ ଥାନାରେ ୮ଟି ଲୁଟ୍‌ ମାମଲା ରୁଜୁ ହୋଇଛି । ଲୋକଙ୍କୁ ମରଣାନ୍ତକ ଆକ୍ରମଣ କରି ଟଙ୍କା, ମୋବାଇଲ, ଗହଣା ଲୁଟି ନେଉଛନ୍ତି ଦୁର୍ବୃତ୍ତ । ଘଟଣାଗୁଡ଼ିକର ତଦନ୍ତ କରିବା ସହ ପାଟ୍ରୋଲିଂକୁ କଡ଼ାକଡ଼ି କରିବାକୁ କହିଛି କମିଶନରେଟ୍‌ ପୋଲିସ । ସାବଧାନ୍‌ । ରାଜଧାନୀରେ ମାତିଛନ୍ତି ଲୁଟେରା । ନିଛାଟିଆ ରାସ୍ତାରେ ଆକ୍ରମଣ କରି ଲୁଟି ନେଉଛନ୍ତି ଟଙ୍କା, ମୋବାଇଲ୍‌, ଗହଣା ଆଉ ଏଟିଏମ କାର୍ଡ଼ । ଗୋଟେ ଦିନରେ ଖୋଦ୍‌ ରାଜଧାନୀରେ ଏକାଧିକ ଲୁଟ୍‌ ଘଟଣା କମିଶନରେଟ୍‌ ପୋଲିସର ନିଦ ହଜାଇ ଦେଇଛି । ଗଲା ୩ଦିନ ଭିତରେ ଭୁବନେଶ୍ବରର ବିଭିନ୍ନ ଥାନାରେ ରୁଜୁ ହୋଇଛି ୮ ଲୁଟ୍‌ ମାମଲା । ଗଲା ଶନିବାର ଖଣ୍ଡଗିରି ଥାନା ଅଧୀନରେ ଘଟିଛି ତିନି ତିନିଟି ଲୁଟ୍‌ । ରବିବାର ଏୟାରଫିଲ୍ଡ ଥାନା ଅଧୀନରେ ଜଣେ ଯୁବକଙ୍କୁ ମରଣାନ୍ତକ ଆକ୍ରମଣ କରି ଲୁଟ୍‌ ଉଦ୍ୟମ ବେଳେ ଧରାପଡ଼ିଛି ଜଣେ ଲୁଟେରା । ସୋମବାର ରାତି ୧୧ଟା ବେଳେ ସହିଦ ନଗର ଥାନା ଅଧୀନରେ ଥିବା ସାଇମନ୍ଦିର ରାସ୍ତାରେ ଜଣେ ବ୍ୟକ୍ତିଙ୍କୁ ମରଣାନ୍ତକ ଆକ୍ରମଣ କରି ଲୁଟ୍‌ ଉଦ୍ୟମ କରିଥିବାର ଜଣାପଡ଼ିଛି । ଭୁବନେଶ୍ବରରେ କମିଶନରେଟ୍‌ ପୋଲିସ ପକ୍ଷରୁ ରାତି ଅଧିଆ ବ୍ଲକିଂ ଓ ଚେକିଂ ଚାଲିଥିବା ସତ୍ବେ ଲୁଟେରାଙ୍କ ଦୌରାତ୍ମ୍ୟ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି । ପୋଲିସର ଆକ୍ସନକୁ ଖାତିର ନାହିଁ । ରାତିର ଅନ୍ଧାରରେ ରାଜଧାନୀରେ ରାଜ୍‌ କରୁଛନ୍ତି ଅପରାଧୀ । ଏମିତିରେ ପୋଲିସ ପାଟ୍ରୋଲିଂକୁ ଆହୁରି ଅଧିକ କଡ଼ାକଡ଼ି କରିବା ଏବଂ ଅପରାଧୀଙ୍କୁ ଧରିବା କମିଶନରେଟ୍‌ ପୋଲିସ ପାଇଁ ଚାଲେଂଜ ହୋଇପଡ଼ିଛି ।