କରଞ୍ଜିଆ ୩।୩: ମୁମୂର୍ଷୁ ଅବସ୍ଥାରେ ନାବାଳିକାଙ୍କୁ ଉଦ୍ଧାର କରାଯାଇଛି । ଦୁଷ୍କର୍ମ ପରେ ଦୁର୍ବୃତ୍ତମାନେ ଫିଙ୍ଗିଦେଇ ଯାଇଥିବା ସନ୍ଦେହ କରାଯାଉଛି । ମୟୁରଭଞ୍ଜ ଜିଲ୍ଲା କରଞ୍ଜିଆ ଥାନା ଅନ୍ତର୍ଗତ ଚଢେଇଭୋଳ ନିକଟରୁ ନାବାଳିକାଙ୍କୁ ଉଦ୍ଧାର କରାଯାଇଛି ।
ସୂଚନାଯୋଗ୍ୟ ଯେ, ମୟୁରଭଞ୍ଜ ଜିଲ୍ଲା କରଞ୍ଜିଆ ଥାନା ଅନ୍ତର୍ଗତ ଚଢ଼େଇଭୋଳ ନିକଟଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥ କଡରେ ଥିବା ଏକ ନାଳ ନିକଟରେ ୭/୮ବର୍ଷର ନାବାଳିକାଙ୍କୁ ଉଦ୍ଧାର କରାଯାଇଛି । କେହି ଦୁର୍ବୃତ୍ତ ଦୁଷ୍କର୍ମ କରିବାପରେ ମୁମୂର୍ଷୁ ଅବସ୍ଥାରେ ଛାଡି ପଳାଇଥିବା ପୋଲିସ ସନ୍ଦେହ କରୁଛି । ପାରିପାର୍ଶ୍ବିକ ସ୍ଥିତିରୁ ଏହା ଦୁଷ୍କର୍ମ ହୋଇଥିବା ଅନୁମାନ କରୁଥିଲେ ବି ପ୍ରକୃତ ଘଟଣା ବର୍ତ୍ତମାନ ସୁଦ୍ଧା ଜଣା ପଡିନାହିଁ । ତେବେ ଘଟଣାସ୍ଥଳରୁ ପୋଲିସ ନାବାଳିକାଙ୍କୁ ମୁମୂର୍ଷୁ ଅବସ୍ଥାରେ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ କରଞ୍ଜିଆ ଉପଖଣ୍ଡ ଚିକିତ୍ସାଳୟକୁ ଆଣି ଚିକିତ୍ସା କରୁଛି। ନାବାଳିକା ଜଣଙ୍କ କଥା କହିପାରୁ ନଥିବାରୁ ବର୍ତ୍ତମାନ ସୁଦ୍ଧା ନାବାଳିକାଙ୍କ ପରିଚୟ ମିଳି ନ ପାରିବା ସହ ପ୍ରକୃତ ଘଟଣା ସାମ୍ନାକୁ ଆସି ପାରି ନାହିଁ । ତେବେ ଏ ନେଇ କରଞ୍ଜିଆ ପୋଲିସ ଅଧିକ ତଦନ୍ତ କରୁଛି ।