ଭଦ୍ରକ, ୧୧|୦୭: ବାହାର ରାଜ୍ୟରୁ ଫେରୁଥିବା ପ୍ରବାସୀଙ୍କ ପାଇଁ ସରକାର କ୍ୱାରେଣ୍ଟାଇନକୁ ବାଧ୍ୟତାମୂଳକ କରିଛନ୍ତି । ଏପରିକି ଅସ୍ଥାୟୀ ସ୍ୱାସ୍ଥ୍ୟ କେନ୍ଦ୍ର ବା ଟି.ଏମ.ସି.ରେ ରଖିବାର ବ୍ୟବସ୍ଥା କରିଛନ୍ତି । କିନ୍ତୁ ଅନେକ ସମୟରେ ପ୍ରବାସୀମାନେ ଆଇନକୁ ସଠିକ୍ ଭାବେ ପାଲନ କରୁନଥିବା ଅଭିଯୋଗ ହେଉଛି । ଏପରି ଏକ ଘଟଣା ଭଦ୍ରକ ଜିଲ୍ଲା ଭଣ୍ଡାରିପୋଖରୀରେ ଦେଖିବାକୁ ମିଳିଛି ।
ଭଣ୍ଡାରୀପୋଖରୀ ଥାନା ଷୋଳମପୁର ପଞ୍ଚାୟତକ ମଣିନାଥପୁର ସ୍କୁଲରେ ହୋଇଥିବା ଏକ ଟିଏମସିରୁ ଜଣେ ପ୍ରବାସୀ ଫେରାର ହୋଇଯାଇଥିବା ଅଭିଯୋଗ ହୋଇଛି । ଏନେଇ ଥାନାରେ ମଧ୍ୟ ଏକ ମାମଲା ରୁଜୁ ହୋଇଛି । ଶୁକ୍ରବାର ରାତିରୁ ସେ ଫେରାର ହୋଇଯାଇଥିବା ଜଣାପଡିଛି ।
ପ୍ରବାସୀ ଜଣକ ଗତ ୫ ତାରିଖରେ ବିମାନ ଯୋଗେ କେରଳରୁ ଫେରି ଟିଏମସିରେ ନାମ ପଞ୍ଜିକରଣ କରିଥିଲେ । କିନ୍ତୁ ଖସିପଳାଇଥିବା ପ୍ରବାସୀଙ୍କୁ ଏଯାଏଁ ପୋଲିସ ଠାବ କରିପାରିନାହିଁ ।
