ପାନାଜୀ ୦୭/୧୨: ୧୨ ଦିନ ପରେ ମିଳିଲା ମିଗ୍-୨୯କେ ପାଇଲଟଙ୍କ ମୃତଦେହ। କମାଣ୍ଡର ନିଶାନ୍ତ ସିଂହଙ୍କ ମୃତଦେହ ଗୋଆ ଉପକୂଳରୁ ୩୦ ମାଇଲ୍ ଦୂରରେ ୭୦ ମିଟର ପାଣି ତଳୁ ଉଦ୍ଧାର କଲା ଭାରତୀୟ ନୌସେନା । ୨୬ ନଭେମ୍ବରରେ ମିଗ୍-୨୯କେ ଲଢ଼ୁଆ ବିମାନ ଆରବ ସାଗର ଉପରେ ଉଡ଼ାଣ ଭରୁଥିବା ବେଳେ କ୍ରାସ୍ ହୋଇଥିଲା।
ନିଶାନ୍ତଙ୍କ ବ୍ୟତୀତ ଅନ୍ୟ ଜଣେ ପାଇଲଟଙ୍କୁ ଘଟଣା ଦିନ ଜୀବିତ ଅବସ୍ଥାରେ ଉଦ୍ଧାର କରାଯାଇଥିଲା । ଯାହାକି ଆରବ ସାଗରରେ ଘଟିଥିଲା। ଗୋଆରେ ଆଇଏନଏସ୍ ବିକ୍ରମାଦିତ୍ୟରୁ ମିଗ୍-୨୯ କେ ଏୟାରକ୍ରାଫ୍ଟ ଉଡ଼ାଣ ଭରିଥିଲା ବୋଲି ଜଣାପଡ଼ିଛି।
ମିଳିଥିବା ସୂଚନା ଅନୁସାରେ ନିଶାନ୍ତଙ୍କୁ ଖୋଜିବା ପାଇଁ ୯ ଯୁଦ୍ଧ ଜାହଜ, ୧୪ଟି ଏୟାରକ୍ରାଫ୍ଟ ନିୟୋଜିତ ହୋଇଥିଲା। ଏହା ସହ ନଭେମ୍ବର ୨୯ରେ ବିମାନର କିଛି ଅଂଶ ମିଳିଥିବା ଭାରତୀୟ ନୌସେନା ପକ୍ଷରୁ ସୂଚନା ମିଳିଥିଲା। ୯ ଯୁଦ୍ଧ ଜାହଜ, ୧୪ଟି ଏୟାରକ୍ରାଫ୍ଟ ସମେତ ସର୍ଚ୍ଚ ଅପରେସନ୍ରେ ଲାଗିଥିଲା ନୌସେନାର ଇଣ୍ଟରସେପ୍ଟର। ସେପଟେ ମେରାଇନ୍ ପୋଲିସ୍ ବି ସର୍ଚ୍ଚ ଅପରେସନ୍ ଜାରି ରଖିଥିଲା। ବିଶେଷ କରି ସ୍ଥାନୀୟ ମତ୍ସ୍ୟଜୀବୀମାନେ ମଧ୍ୟ ନୌସେନାକୁ ସହାୟତା କରିଥିଲେ ବୋଲି ଜଣାପଡ଼ିଛି।
