ନୂଆଦିଲ୍ଲୀ,୨୫।୦୧: ମେକ୍ସିକୋର ରାଷ୍ଟ୍ରପତି ଆନ୍ଦ୍ରେସ୍ ମାନୁଏଲ ଲୋପେଜ୍ ଓବ୍ରାଡର କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ମେକ୍ସିକୋ ରାଷ୍ଟ୍ରପତି କରୋନା ମୁକାବିଲା ପ୍ରସଙ୍ଗରେ ଅନେକ ସମାଲୋଚନାର ଶିକାର ହୋଇଥିଲେ । ଏପରିକି ସେ ମାସ୍କ ପିନ୍ଧିବା ପାଇଁ ମଧ୍ୟ ମନା କରିଥିଲେ ।
ଏବେ ଓବ୍ରାଡର ନିଜେ ଟ୍ୱିଟ୍ କରି କୋଭିଡ୍ ପଜିଟିଭ୍ ହୋଇଥିବା ସୂଚନା ଦେଇଛନ୍ତି । ଏହାସହ ଲକ୍ଷଣ ବାବଦରେ ମଧ୍ୟ ଉଲ୍ଲେଖ କରିଛନ୍ତି ।
ସେ ଟ୍ୱିଟ୍ କରି କହିଛନ୍ତି ଯେ, ତାଙ୍କଠାରେ କରୋନାର ସାମାନ୍ୟ ଲକ୍ଷଣ ଦେଖିବାକୁ ମିଳିଛି । ସେ ଏବେ ଡାକ୍ତରଙ୍କ ତତ୍ତ୍ୱାବଧାନରେ ରହିଛନ୍ତି । ସେ ଅତିଶୀଘ୍ର ସୁସ୍ଥ ହୋଇ ଫେରିବେ ବୋଲି ଆଶା କରିଛନ୍ତି ।
ସୂଚନାଯୋଗ୍ୟ, ମେକ୍ସିକୋରେ ଏବେସୁଦ୍ଧା ୧୭ ଲକ୍ଷ ୭୫ ହଜାର କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ଏହାମଧ୍ୟରୁ ପ୍ରାୟ ଏକ ଲକ୍ଷ ୫୦ ହଜାର ସଂକ୍ରମିତଙ୍କ ଜୀବନ ଯାଇଛି ।