କଟକ ୧।୧୦: ସାଂସଦ ଅନୁଭବ ମହାନ୍ତିଙ୍କୁ ଦୁର୍ବ୍ୟବହାର ନେଇ କଟକ ପୁରୀଘାଟ ଥାନାରେ ମାମଲା ରୁଜୁ ହେବା ପରେ ତେଜିଛି ରାଜନୀତି । ଯୁବ ବିଜେଡି ରାଜ୍ୟ ଉପସଭାପତି ମନଜିତ ଦାସଙ୍କ ନାଁରେ କଟକ ପୁରୀଘାଟ ଥାନାରେ ଲିଖିତ ଅଭିଯୋଗ କରିଥିଲେ କେନ୍ଦ୍ରାପଡା ସାଂସଦ ଅନୁଭବ ମହାନ୍ତି । ଅନୁଭବଙ୍କୁ ମଞ୍ଜିତ ଧମକଚମକ ଦେଇଥିବା ସେ ନିଜ ଅଭିଯୋଗରେ ଦର୍ଶାଇଥିଲେ । ଅନ୍ୟପଟେ ମନଜିତ ଦାସ ଅନୁଭବଙ୍କ ନାଁରେ ପାଲଟା ଅଭିଯୋଗ କରିଛନ୍ତି ।
ପ୍ରତିକ୍ରିୟା ରଖି ଯୁବ ବିଜେଡି ରାଜ୍ୟ ଉପସଭାପତି ମଞ୍ଜିତ ଦାସ କହିଛନ୍ତି ଯେ, ପୂର୍ବରୁ ଅନୁଭବଙ୍କ ସହ ଆମର ଛୋଟମୋଟ ବିବାଦ ଥିଲା । ସେଦିନ ଅନୁଭବ ହିଁ ମୋତେ ପ୍ରଥମେ ଗାଳି କରିଥିଲେ । ଅଭିନେତାରୁ ରାଜନେତା ହୋଇଥିବାରୁ ତାଙ୍କର ଅହଙ୍କାର ବଢିଛି । ନିଜ ଘରେ ରହି ନିଜ ଘର ଭାଙ୍ଗୁଛନ୍ତି ଅନୁଭବ । ଯଦି ଭିଡିଓ ପୋଷ୍ଟ କଲେ, ତାହେଲେ ଡିଲିଟ୍ କଲେ କାହିଁକି ବୋଲି ମନଜିତ୍ ପ୍ରଶ୍ନ କରିଛନ୍ତି । ତାଙ୍କର ଅନୁଭବଙ୍କ ବାବଦରେ କୌଣସି ଲିଖିତ ଅଭିଯୋଗ କରିବାର ନାହିଁ ବୋଲି ସେ କହିଛନ୍ତି । ସେ ଦଳକୁ ଭଲପାଆନ୍ତି ଏବଂ ପାର୍ଟି ଫୋରମ୍ରେ କଥା ଉଠାଇବେ ବୋଲି କହିଛନ୍ତି । ଜିଲ୍ଲା ସଭାପତି ଦେବାଶିଷ ସାମନ୍ତରାୟଙ୍କୁ ଜଣାଇ ତଦନ୍ତ ଦାବି କରିବି ବୋଲି ମଧ୍ୟ ମନଜିତ୍ କହିଛନ୍ତି ।