ଭୋପାଳ, ୦୪|୦୮: ପ୍ରଥମେ ଯୁବତୀଙ୍କୁ ଅସଦାଚରଣ କରିଥିଲେ । ଆଉ ଏବେ ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ପୀଡିତା ସଂପୃକ୍ତ ଯୁବକଙ୍କ ହାତରେ ରାକ୍ଷୀ ବାନ୍ଧିବେ । ଏପରି ଏକ ଘଟଣା ସାମ୍ନାକୁ ଆସିଛି ମଧ୍ୟପ୍ରଦେଶରେ ।
ସୂଚନାନୁସାରେ, ଜଣେ ୨୬ ବର୍ଷର ଯୁବକ ଜଣେ ଯୁବତୀଙ୍କୁ ଅସଦାଚରଣ କରିଥିଲେ । ସେ ୩୦ ବର୍ଷୀୟା ପୀଡିତାଙ୍କ ଘରେ ଜୋର୍ ଜବରଦସ୍ତି ପସିଥିଲେ । ମାମଲା କୋର୍ଟକୁ ଯାଇଥିଲା । ଏହାର ଶୁଣାଣି କରି କୋର୍ଟ କହିଥିଲେ ଯେ, ଅଭିଯୁକ୍ତ ଯୁବକ ୧୧ ହଜାର ଟଙ୍କା ପୀଡିତାଙ୍କୁ ପ୍ରଦାନ କରିବେ । ଏହାସହ ଉଭୟ ଭାଇ-ଭଉଣୀ ସମ୍ପର୍କରେ ରହିବେ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି ।
ଏହାପୂର୍ବରୁ ହାଇକୋର୍ଟରେ ଜଷ୍ଟିସ ରୋହିତ ଆର୍ଯ୍ୟଙ୍କ ବେଞ୍ଚ୍ ଅଭିଯୁକ୍ତ ବିକ୍ରମ ବାଗ୍ରୀଙ୍କୁ ଗତ ୩୦ ତାରିଖରେ ସର୍ତ୍ତମୂଳକ ଜାମିନ୍ ପ୍ରଦାନ କରିଥିଲେ । କୋର୍ଟ ଆହୁରି କହିଥିଲେ ଯେ, ଅଭିଯୁକ୍ତ ଓ ତାଙ୍କ ପତ୍ନୀ ପୀଡିତାଙ୍କ ଘରକୁ ରାକ୍ଷୀପୂର୍ଣ୍ଣିମାରେ ଯିବେ । ଅଭିଯୁକ୍ତ ହାତରେ ମିଠା ପ୍ୟାକେଟ୍ ଧରି ପୀଡିତାଙ୍କ ଘରକୁ ଯିବେ । ଏହାସହ ପୀଡିତା ଅଭିଯୁକ୍ତଙ୍କ ହାତରେ ରାକ୍ଷୀ ବାନ୍ଧିବେ । ଏହାସହ ପୀଡିତାଙ୍କ ପୁତ୍ରକୁ ମଧ୍ୟ ୫ ହଜାର ଟଙ୍କା ଦେବା ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ ।
ଏପରି ରାୟ ବିରଳ ବୋଲି କୁହାଯାଉଛି । ତେବେ ବୁଦ୍ଧିଜୀବୀମାନେ କୋର୍ଟଙ୍କ ଏହି ନିଷ୍ପତ୍ତିକୁ ସ୍ୱାଗତ କରିଛନ୍ତି ।
