କୋଲକାତା ୨୦/୧୬: ହଜିଗଲାଣି ମାନବିକତା ! ଆଇନ୍ ହାତକୁ ନେଇ ଲୋକେ ନେଉଛନ୍ତି ନିଷ୍ପତ୍ତି। ପୋଲିସ ପହଞ୍ଚିବା ପୂର୍ବରୁ ସବୁ କିଛି ସରିଯାଉଛି। ପଶ୍ଚିମବଙ୍ଗ ୨୪ ପ୍ରାଗଣା ଜିଲ୍ଲାରେ ଘଟିଛି ଏକ ଅଭାବନୀୟ ଘଟଣା। ଚୋର ସନ୍ଦେହରେ ଜଣେ ୪୧ ବର୍ଷୀୟା ମହିଳାଙ୍କୁ ପିଟି ପିଟି ହତ୍ୟା କରିବା ସହ ତାଙ୍କ ସ୍ବାମୀଙ୍କୁ ଗୁରୁତର କରିଦେଇଛନ୍ତି ଲୋକେ ।
କାଶିପୁର ଥାନା ଅନ୍ତର୍ଗତ ଚୀନପୁକୁର ଗାଁରେ ୧୬ ଅକ୍ଟୋବରେ ଏଭଳି ଏକ ଘଟଣା ଘଟିଥିଲା। ଏହି ଘଟଣାରେ ସମ୍ପୃକ୍ତ ୪ ଅଭିଯୁକ୍ତଙ୍କୁ ପୋଲିସ ଗିରଫ କରିଛି। ମୃତ ମହିଳାଙ୍କ ସ୍ବାମୀଙ୍କ ଅଭିଯୋଗ କ୍ରମେ ମହିଳାଙ୍କୁ ଚୋର ବୋଲି କହି ୧୪ ଜଣ ତାଙ୍କୁ ବାଡ଼ି ଓ ଳୁହା ଛଡ଼ରେ ପିଟିଥିଲେ। ସେ ବିରୋଧ କରିବାରୁ ତାଙ୍କୁ ମଧ୍ୟ ଆକ୍ରମଣ କରାଯାଇଥିଲା। ପରେ ସେ ବେହୋସ ହୋଇଯାଇଥିଲେ। ତେବେ ଅଭିଯୁକ୍ତ ମହିଳାଙ୍କ ପଡ଼ୋଶୀ ବୋଲି ଜଣାପଡ଼ିଛି।
ସ୍ଥାନୀୟ ଲୋକଙ୍କ ସହାୟତାରେ ଦୁଇ ଜଣଙ୍କୁ ପ୍ରଥମେ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓ ପରେ କୋଲକାତାର ଏକ ଘରୋଇ ହସ୍ବିଟାଲକୁ ସ୍ଥାନାନ୍ତର କରାଯାଇଥିଲା। ହସ୍ପିଟାଲ ନେବା ବାଟରେ ହିଁ ମହିଳାଙ୍କ ମୃତ୍ୟୁ ହୋଇଥିବା ନେଇ ପୋଲିସ୍ କହିଛି। ତେବେ ଏନେଇ ଅଭିଯୋଗ ପରେ ମୁଖ୍ୟ ଅଭିଯୁକ୍ତ ସହ ଅନ୍ୟ ୩ ଜଣଙ୍କୁ ପୋଲିସ ଗିରଫ କରିଥିବା ଜଣାପଡ଼ିଛି।