ଗାଜିଆବାଦ ୩୧/୧- ଆଜି ବି ରହିଛି ପୁଅ-ଝିଅକୁ ନେଇ ପ୍ରଭେଦ । ଝିଅ ଜନ୍ମଦେବାରୁ ସ୍ତ୍ରୀକୁ ଘରୁ ବାହାର କରିଦେଲା ଯୁବକ ଓ ଅନ୍ୟ ଜଣେ ମହିଳାଙ୍କୁ ବିବାହ ହେଲା । ଏହି ଅଭିଯୋଗ ଥାନାରେ ଆଣିବା ପରେ ଯୁବକଙ୍କ ବିରୋଧରେ ଥାନାରେ ହୋଇଛି ମାମଲା ଦାୟର ।
ଏହିଭଳି ଘଟଣା ଘଟିଛି ମେରଠର ଖରଖୌଦା ଅଂଚଳରେ । ଯୁଵକ ରାଜନଗରରେ ଆରଡ଼ିସି ନାମକ ଏକ ଫାଇନାନ୍ସ କଂପାନୀ କରିଥିଲେ । ଏହି କଂପାନୀରେ ମହିଳା କାଉଁସେଲର ଭାବେ କାମ କରୁଥିଲେ । ଚାକିରି କରିବା ଭିତରେ ସେମାନଙ୍କ ଭିତରେ ପ୍ରେମ ସଂପର୍କ ଗଢ଼ିଉଠିଥିଲା । ଯୁବକ ନିଜକୁ ଅବିବାହିତ କହି ଯୁବତୀଙ୍କୁ କୋର୍ଟ ମ୍ୟାରେଜ କରିଥିଲା । ତାପରେ ରୀତିନୀତି ଅନୁସାରେ ବିବାହ ମଧ୍ୟ ହୋଇଥିଲା । ଏହି ବିବାହ ପାଇଁ ଜଳବିଭାଗରେ କାମ କରୁଥିବା ଯୁବତୀଙ୍କ ବାପା ଉପହାର ସ୍ଵରପ ୧ଲକ୍ଷ ଟଂକା ମଧ୍ୟ ଦେଇଥିଲେ ।
କିଛିଦିନ ପରେ ଫାଇନାନ୍ସ କଂପାନୀ ବନ୍ଦ କରି ଯୁବକ ସ୍ତ୍ରୀକୁ ଧରି ଗାଁ ଖରଖୌଦାକୁ ପଳାଇଆସିଥିଲେ । ମାର୍ଚ୍ଚମାସ ୨୫ ତାରିଖ ୨୦୧୭ ମସିହାରେ ଝିଅଟିଏ ଜନ୍ମ ଦେଇଥିଲେ ମହିଳା ।
ଝିଅ ଜନ୍ମ ଦେବାକୁ ନେଇ ପରିବାର ମଧ୍ୟରେ କଳି ଲାଗୁଥିଲା । ପରିବାର ଲୋକ ପୁଅଟିଏ ଜନ୍ମ ହେଉ ବୋଲି ଚାହୁଁଥିଲେ । ଏହି ଘଟଣାକୁ ନେଇ ସ୍ଵାମୀ-ସ୍ତ୍ରୀ ଭିତରେ ବି ମନାନ୍ତର ଦେଖାଦେଇଥିଲା ।
ଝିଅ ଜନ୍ମ ହେବାର ୧୦ ଦିନପରେ ମହିଳାଙ୍କୁ ଘରୁ ତଡ଼ି ଦେଇଥିଲେ । ମହିଳା ନିଜ ନବଜାତ ଶିଶୁକନ୍ୟାକୁ ଧରି ବାପ ଘରକୁ ଚାଲିଯାଇଥିଲେ ।
ମହିଳାଙ୍କୁ ଘରୁ ବାହାର କରିଦେବା ପରେ ଆଉ ଜଣେ ଝିଅ ସହିତ ଯୁବକଙ୍କ ବିବାହ ସ୍ଥିର କରାଯାଇଥିଲା । ମହିଳା ଏହି ବିବାହକୁ ମଧ୍ୟ ବିରୋଧ କରିଥିଲେ ।
ପ୍ରଥମ ସ୍ତ୍ରୀର କଥା ନ ଶୁଣି ଯୁବକ ଆଉ ଜଣେ ମହିଳାଙ୍କୁ ବିବାହ କରିଥିଲେ । ଏହି ଘଟଣାରେ ମହିଳା ଥାନାରେ ଦ୍ଵାରସ୍ଥ ହେବା ପରେ ଯୁବକଙ୍କ ବିରୋଧରେ ମାମଲା ରୁଜୁ କରିଛି ପୋଲିସ ।
