ତେଲକୋଇ, ୦୧/୦୭: ଗାଧୋଇବାକୁ ଯାଇ ବୁଡିଗଲେ ଯୁବକ । ଏଭଳି ଘଟଣା ଦେଖିବାକୁ ମିଳିଛି ତେଲକୋଇ ଥାନା ଅନ୍ତର୍ଗତ ଝୁମୁକାପଶି ଗାଁରେ । ଯୁବକ ଜଣକ ଜମିରେ ଧାନତଳା ଉପାଡିବା କାମ କରୁଥିଲେ । କାମ ସରିବା ପରେ ଅପରାହ୍ନ ୪ ବେଳକୁ ଗାଧୋଇ ଘରକୁ ଯିବା ପାଇଁ ବାହାରିଥିଲେ । ଜମି ନିକଟରେ ଥିବା ପୋଖରୀରେ ଗାଧୋଇବା ବେଳେ ଅସାବଧାନତା ବଶତଃ ପୋଖରୀରେ ବୁଡିଯାଇଥିଲେ ।
ଯୁବକଙ୍କ ନାମ ଯୁଧିଷ୍ଠିର ବୋଲି ଜଣାପଡ଼ିଛି । ପୋଖରୀକୁ ଗାଧୋଇବା ପାଇଁ ଯାଇଥିବା ଯୁଧିଷ୍ଠିର ଅଧିକ ସମୟ ଧରି ନଫେରିବାରୁ ସାଥି ଶ୍ରମିକଙ୍କ ସନ୍ଦେହ ବଢିଥିଲା ଏବଂ ସେମାନେ ଘଟଣା ସ୍ଥଳରେ ପହଞ୍ଚି ଦେଖଲା ବେଳକୁ ଯୁଧିଷ୍ଠିରଙ୍କ ଶବ ପାଣିରେ ଭାସୁଥିଲା । ସଙ୍ଗେ ସଙ୍ଗେ ଅଗ୍ନିଶ୍ରମ ବିଭାଗକୁ ଖବର ଦିଆଯାଇଥିଲା । ଖବର ପାଇ ଅଗ୍ନିଶ୍ରମ ବିଭାଗ କର୍ମଚାରୀ ଘଟଣା ସ୍ଥଳରେ ପହଞ୍ଚି ଶବକୁ ଉଦ୍ଧାର କରି ବ୍ୟବଛେଦ ପାଇଁ ତେଲକୋଇ ମେଡିକାଲ କୁ ପଠାଇଥିଲେ । ପୋଲିସ ଏନେଇ ଏକ ଅପମୃତ୍ୟୁ ମାମଲା ରୁଜୁ କରିଛି ।
