Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଝାଳବୁହା ପରିଶ୍ରମ କରି ବି ମହୁଲ ଗୋଟାଳିଙ୍କୁ ମିଳୁନି ଉପଯୁକ୍ତ ମୂଲ୍ୟ

26/04/2019 at 6:19 PM

ଭବାନୀପାଟଣା/ଫୁଲବଣୀ ୨୬|୪: ଝାଳବୁହା ପରିଶ୍ରମ କରିବି ମହୁଲ ଗୋଟାଳିଙ୍କୁ ମିଳୁନି ଉପଯୁକ୍ତ ମୂଲ୍ୟ । ଖରାତାତିକୁ ଖାତିର ନକରି କନ୍ଧମାଳର ଆଦିବାସୀ ମହିଳାମାନେ ପ୍ରତିଦିନ ସକାଳ ହେଲେ ବାହାରି ପଡୁଛନ୍ତି ମହୁଲ ସଂଗ୍ରହରେ । ହେଲେ ମହୁଲଫୁଲର ଦାମ ଚଳିତବର୍ଷ କମ୍ ରହିଛି । ଯାହା ମହୁଲ ଗୋଟାଳିଙ୍କ ପାଇଁ ଚିନ୍ତାର କାରଣ ପାଲଟିଛି ।

ସକାଳୁ ସକାଳୁ ଆଦିବାସୀ ମହିଳା ମାନେ ହାତରେ ଟୋକେଇ ଧରି ଜଙ୍ଗଲକୁ ବାହାରି ପଡନ୍ତି ମହୁଲ ସଂଗ୍ରହ ପାଇଁ । କେହି କେହି ସାଙ୍ଗରେ କୁନି କୁନି ପିଲାଙ୍କୁବି ନେଇ ଯାଇଥାନ୍ତି । ଅଧିକା ମହୁଲ ସଂଗ୍ରହ କଲେ ଅଧିକ ଦି ପଇସା ରୋଜଗାର ହୋଇପାରିବ। ଚଳିତ ବର୍ଷ ମାତ୍ର ମହୁଲ କିଲୋ ପିଛା ମାତ୍ର ୧୫ରୁ ୨୦ ଟଙ୍କାରେ ବିକ୍ରି ହେଉଛି ।

ଜଣେ ମହିଳା ଅତିବେଶିରେ ଦିନକୁ ୫ କେଜିରୁ ୧୦ କେଜି ମଧ୍ୟରେ ମହୁଲ ଗୋଟାଇଥାନ୍ତି। ହେଲେ ଶୁଖିଗଲେ ୫୦ ଭାଗ ଓଜନ କମିଯାଏ। ଆଉ ଖୁବ କମ୍ ଟଙ୍କା ପାଇପାରନ୍ତି ମହୁଲ ସଂଗ୍ରହକାରୀ ।

 ଜଙ୍ଗଲରୁ ମହୁଲ ଫୁଲ ଆଣିବା ପରେ ତାକୁ  ଖରାରେ ଶୁଖାଯାଏ । ପୁରା ଶୁଖିଗଲା ପରେ ବିକ୍ରି ପାଇଁ ଯାଏ । ମହୁଲ ଫୁଲରେ ଆଦିବାସୀ ଲୋକେ ପିଠା ପ୍ରସ୍ତୁତ କରୁଥିବା ବେଳେ ଗୋଖାଦ୍ୟ ପ୍ରସ୍ତୁତରେ ମଧ୍ୟ ଏହା ବ୍ୟବହାର ହୁଏ। ତେବେ କମ୍ ଟଙ୍କା ପାଇଲେ ବି ମହୁଲ ଗୋଟାଇବା ଲାଗି ଆଦିବାସୀ ମାନେ ବେଶ୍ ଆଗ୍ରହ ପ୍ରକାଶ କରିଥାନ୍ତି।

ମହୁଲ ଗୋଟାଇ ଯାହା କିଛି ପାରିଶ୍ରମିକ ପାଆନ୍ତି ସେଥିରେ ପରିବାରର ବୋଝ କିଛିଟା ହାଲକା ହୋଇଯାଏ । ହେଲେ ଚଳିତ ଥର ମହୁଲଫୁଲ ଦର କମ ଥିବାରୁ ଚିନ୍ତାରେ ପଡିଛନ୍ତି ମହୁଲ ତୋଳାଳୀ ।

   Related Posts