ବାସୁଦେବପୁର ୬।୩: ଭଦ୍ରକ ବାସୁଦେବପୁର ବୃଦ୍ଧଙ୍କଠୁ ଟଙ୍କା ଝାମ୍ପି ନେବାବେଳେ ଧରାପଡ଼ିଲେ ଯୁବକ । ବୃଦ୍ଧ ଜଣଙ୍କ ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ ଶାଖାରୁ ସାଢେ ୪ ଲକ୍ଷ ଟଙ୍କା ଉଠାଇ ଯାଉଥିବା ବେଳେ ଝାମ୍ପି ନେଉଥିଲେ ଯୁବକ । ସ୍ଥାନୀୟ ଲୋକେ ଯୁବକଙ୍କୁ ଧରି ନିସ୍ତୁକ ପିଟି ପୋଲିସ ଜିମା ଦେଇଛନ୍ତି ।
ସୂଚନାଯୋଗ୍ୟ ଯେ, ବାସୁଦେବପୁର ସାନ କୃଷ୍ଣଚନ୍ଦ୍ରପୁରର ପୂର୍ବତନ ସରପଞ୍ଚ ଗୌରହରି ଜେନା (୬୫) ସାଢେ ୪ ଲକ୍ଷ ଟଙ୍କା ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ ଶାଖାରୁ ଉଠାଇ ଜଣଙ୍କୁ ଦେବାକୁ ଗ୍ରାମ୍ୟ ବ୍ୟାଙ୍କରେ ଅପେକ୍ଷା କରିଥିଲେ । ଏହି ସମୟରେ ଜଣେ ଯୁବକ ଆସି ତାଙ୍କ ଠାରୁ ଟଙ୍କା ଛଡାଇ ନେଇଥିଲେ । ଲୁଟ୍ ପରେ ବୃଦ୍ଧ ଜଣଙ୍କ ଚିତ୍କାର କରି ଡାକ ପକାଇବାରୁ ଲୋକେ ସମ୍ପୃକ୍ତ ଯୁବକକୁ ଗୋଡ଼ାଇ ମାଡ଼ି ବସିଥିଲେ । ପରେ ସଂପୃକ୍ତ ଯୁବକଙ୍କୁ ପୋଲିସର ଜିମା ଦେଇଛନ୍ତି ଲୋକେ । ଅଭିଯୁକ୍ତ ଯୁବକ ଜଣଙ୍କ ହେଲେ ଶ୍ରୀରାମ ଦାଶ । ତାଙ୍କ ଘର ଗଞ୍ଜାମ ଜିଲ୍ଲା ଆସ୍କା ଅଂଚଳରେ।