କେନ୍ଦୁଝର ୧୧।୧୧: ବାଇକକୁ ପଛପଟୁ ଧକ୍କାଦେଇ ଲୁଟିନେଲେ ଲକ୍ଷେ ୨୫ ହଜାର ଟଙ୍କା । କେନ୍ଦୁଝର, ଚମ୍ପୁଆ ଥାନା ରିମୁଳି ନିକଟରେ ଏହି ଲୁଟ୍ ହୋଇଛି । ଘଟଣାରେ ପୋଲିସ ଲୁଟେରାଙ୍କୁ ଗିରଫ କରିବାରେ ସଫଳ ହୋଇଛି । ସେମାନଙ୍କ ଅଟକ ରଖି ତଦନ୍ତ ଜାରି ରଖିଛି ।
ଚମ୍ପୁଆ ବ୍ଲକ୍, ବିରିକୁଆଁ ଗ୍ରାମର ମଂଗଳୁ ମହାନ୍ତ ଓ ଯଦୁମଣି ମହାନ୍ତଙ୍କ ଅଭିଯୋଗ ଅନୁଯାୟୀ, ସେମାନେ ରିମୁଳି ସ୍ଥିତ ବ୍ୟାଙ୍କ ଅଫ୍ ଇଣ୍ଡିଆ ଶାଖାରୁ ୧ ଲକ୍ଷ ୨୫ ହଜାର ଟଙ୍କା ଉଠାଇ ବାଇକ୍ ଯୋଗେ ନିଜ ଗାଁକୁ ଫେରୁଥିଲେ । ଏହି ସମୟରେ ୪ ଜଣ ଯୁବକ ଏକ ପଲସର ବାଇକ୍ ଓ ଏକ ସ୍କୁଟିରେ ଆସି ରିମୁଳି - କାଳିକା ପ୍ରସାଦ ରାସ୍ତାର ଏକ ନାଳ ନିକଟରେ ଧକ୍କା ଦେଇଥିଲା ।
ଉଭୟ ତଳେପଡି ଗୁରୁତର ଆହତ ହୋଇଥିଲେ । ଏହି ସମୟରେ ତାଙ୍କ ଟଙ୍କା ବ୍ୟାଗକୁ ଛଡ଼।ଇ ନେଇ ଦୃବୃତ୍ତମାନେ ଫେରାର ହୋଇଯାଇଥିଲେ । ଗ୍ରାମବାସୀଙ୍କ ସହାୟତାରେ ଉଭୟଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ପୋଲିସ ଘଟଣାରେ କାର୍ଯ୍ୟାନୁଷ୍ଠାନ ନେଇ ଲୁଟେରାମାନଙ୍କୁ ଗିରଫ କରିଛି ।
ସେପଟେ ବାଲେଶ୍ବର ଜଗନ୍ନାଥପୁର ଗାଁର ଜଣେ ଛାତ୍ରୀ ଜୋତ୍ସ୍ନା ପ୍ରିୟଦର୍ଶନୀ ସେଠୀ ଗୋପାଳପୁରରୁ କମ୍ପ୍ୟୁଟର କ୍ଲାସ ସାରି ଫେରିବା ବେଳେ ଲୁଟ୍ର ଶିକାର ହୋଇଛନ୍ତି । ଜାଗେଶ୍ୱର ପଦା ଆରୁଆ ରାସ୍ତା ଗିଲଟିଆ ଛକରେ ବାଇକରେ ଆସି ତିନି ଲୁଟେରା ଗୁଳି ଫୁଟାଇ ଲୁଟ କରିଥିବା ଅଭିଯୋଗ ହୋଇଛି । ଆହତ ଜୋତ୍ସ୍ନା ପ୍ରିୟଦର୍ଶନୀକୁ ଗୋପାଳପୁର ଡାକ୍ତରଖାନାରେ ଭର୍ତ୍ତି କରାଯାଇଛି ।
