ଲାହୋର ୨୩।୧୨: କରୋନା ଭାଇରସ ମହମାରୀ ମିଥ୍ୟା ଓ ଏଥିଲାଗି ଟିକା କ୍ରୟ କରି ରାଜକୋଷରୁ କୋଟି କୋଟି ଟଙ୍କା ବୃଥାବ୍ୟୟକୁ କୋର୍ଟରେ ଚାଲେଞ୍ଜ କରିଥିବା ଜନୈକ ବ୍ୟକ୍ତିଙ୍କୁ ଲାହୋର ଉଚ୍ଚ ନ୍ୟାୟାଳୟ ୨ ଲକ୍ଷ ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି। ସେହିପରି ଭବିଷ୍ୟତରେ ସମ୍ପୃକ୍ତ ବ୍ୟକ୍ତି ଯେପରି ଦେଶର କୌଣସି ନ୍ୟାୟାଳୟରେ ଏପରି ମୋକଦ୍ଦମା ରୁଜୁ ନ କରନ୍ତି ସେଥିଲାଗି ମଧ୍ୟ କୋର୍ଟ ସତର୍କ କରାଇଛନ୍ତି।
ଅଜହର ଆବ୍ବାସ ନାମକ ଏହି ବ୍ୟକ୍ତି ଲାହୋର ଉଚ୍ଚନ୍ୟାୟାଳୟରେ ପିଟିସନ ଦାୟର କରି କୋଭିଡ ଏକ ଅନ୍ତର୍ଜାତୀୟ ଷଡ଼ଯନ୍ତ୍ର ଓ ଲୋକେ ହାତ ମିଳାଇଲେ ଏହା ବ୍ୟାପେନି ବୋଲି ଆବେଦନରେ ଉଲ୍ଲେଖ କରିଥିଲେ। ସେହିପରି କୋଭିଡ ମଣିଷ ସହ ଦୀର୍ଘ ଦିନରୁ ଅଛି ଓ ଏହା ଘାତକ ନୁହେଁ ଏଣୁ ଏଥିଲାଗି ସରକାର ଜାରି କରୁଥିବା ବିଭିନ୍ନ ମାର୍ଗଦର୍ଶନ ଓ ନିରାକରଣ ଲାଗି ବିଦେଶରୁ କୋଟି କୋଟି ଟଙ୍କା ମୂଲ୍ୟ ଟିକା ମଗାଇବାର ଆବଶ୍ୟକତାକୁ ନେଇ ପ୍ରଶ୍ନବାଚୀ ଲଗାଇଥିଲେ।
ଆବେଦନକୁ ବିଚାର ଲାଗି ଗ୍ରହଣ କରି ବିଚାରପତି ମୁହମ୍ମଦ କାଶୀମ ଖାନ୍ କୋଭିଡ ନେଇ ଏଣୁ ତେଣୁ କଥା ନ କହି ତାଙ୍କ ଯୁକ୍ତି ନେଇ ଥିବା ଡାକ୍ତରୀ ପ୍ରମାଣ ଉପସ୍ଥାପନ କରନ୍ତୁ ବୋଲି କହିଥିଲେ। ତେବେ ମାମଲାରେ ଅଜହର ସେପରି କୌଣସି ତଥ୍ୟ ଉପସ୍ଥାପନ ନ କରି କୋର୍ଟଙ୍କୁ ଭ୍ରମିତ କରିବାରେ ଲାଗିଥିଲେ। ଶେଷ କୋର୍ଟ ମାମଲାକୁ ଅଗ୍ରାହ୍ୟ କରିବା ସହ ଅଜହରଙ୍କୁ ୨ଲକ୍ଷ ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି। ଅଜହର ପେଷାରେ ଜଣେ ଶୀତତାପକ ଯନ୍ତ୍ର ମେକାନିକ୍ ବୋଲି ଜଣାପଡିଛି।