ଜୟପୁର ୬|୧୨: ଜୟପୁରଠାରେ  ଥିବା କୋରାପୁଟ ଜିଲ୍ଲା ମୁଖ୍ୟ ଡାକ୍ତରଖାନାରେ ଅବ୍ୟବସ୍ଥା । ଜିଲ୍ଲା ମୁଖ୍ୟ ଡାକ୍ତରଖାନାର ମାନ୍ୟତା ପାଇବା ପରେ ଏହା ଫୁଲବାଡସ୍ଥିତ ନୂଆଁ କ୍ୟାମ୍ପସକୁ ସ୍ଥାନାନ୍ତର ହୋଇଛି । ଡାକ୍ତରଖାନା ସିନା ସ୍ଥାନାନ୍ତର ହୋଇ ଗଲା ହେଲେ କ୍ୟାମ୍ପସ ମଧ୍ୟରେ ଥିବା ଆହାର କେନ୍ଦ୍ର କିନ୍ତୁ ଆଜି ଯାଏଁ ସ୍ଥାନାନ୍ତର ହୋଇନି । ଡାକ୍ତରଖାନାଟି ସହରଠାରୁ ୪ କିଲୋମିଟର ଦୂରରେ । ତେଣୁ ପ୍ରତିଦିନ ଡାକ୍ତରଖାନାକୁ ଆସୁଥିବା ରୋଗୀ ଓ ସେମାନଙ୍କ ସଂପର୍କୀୟ ଗଣ୍ଡେ ଖାଇବା ପାଇଁ  ନାହିଁ ନଥିବା ଅସୁବିଧା ଭୋଗୁଛନ୍ତି । ନିରୁପାୟ ରୋଗୀଙ୍କ ସଂପର୍କୀୟ ଡାକ୍ତରଖାନା କ୍ୟାମ୍ପସ ମଧ୍ୟରେ ଟାଇଁ ଟାଇଁ ଖରାରେ ଖୋଲା ଆକାଶ ତଳେ ରୋଷେଇ କରିବାକୁ ବାଧ୍ୟ ହେଉଛନ୍ତି। ମୁଣ୍ଡ ଉପରେ ଟାଇଁ ଟାଇଁ ଖରା । ତଥାପି ଖୋଲା ଆକାଶ ତଳେ ଚାଲିଛି ରୋଷେଇ । ଏ ଦୃଶ୍ୟ ହେଉଛି ଜୟପୁରଠାରେ ଥିବା କୋରାପୁଟ ଜିଲ୍ଲା ମୁଖ୍ୟ ଚିକିତ୍ସାଳୟର । ଜିଲ୍ଲା ମୁଖ୍ୟ ଚିକିତ୍ସାଳୟଟି ଫୁଲବାଡ ସ୍ଥିତ ନୂଆଁ କ୍ୟାମ୍ପସକୁ ସ୍ଥାନାନ୍ତର ହେବାର ଦେଢ ମାସ ବିତି ଗଲାଣି ।ହେଲେ ଆହାର କେନ୍ଦ୍ରଟି କିନ୍ତୁ ପୁରୁଣା କ୍ୟାମ୍ପସରୁ ଆଜି ଯାଏଁ ଏଠାକୁ ସ୍ଥାନାନ୍ତର ହୋଇ ପାରିଲାନି । ଡାକ୍ତରଖାନାଟି ସହରଠାରୁ ୪ କିଲୋମିଟର ଦୂରରେ ।  ଡାକ୍ତରଖାନା ଆଖ ପାଖରେ ସେମିତି କିଛି ଖାଇବା ବ୍ୟବସ୍ଥା ନାହିଁ । କ୍ୟାମ୍ପସ ବାହାରେ ଯେଉଁ କେତୋଟି ହାତ ଗଣତି ଅସ୍ଥାୟୀ ହୋଟେଲ ଅଛି ସେମାନେ ଚଢା ଦର ନେଉଛନ୍ତି । ତେଣୁ ଏମିତି ରୋଷେଇ ନକଲେ ଖାଇବେ କଣ ? ଆଉ ସେପଟେ ଡାକ୍ତରଖାନା ସ୍ଥାନାନ୍ତର ପରେ ପୁରୁଣା କ୍ୟାମ୍ପସରେ ଥିବା ଆହାର କେନ୍ଦ୍ରରେ  ପୂର୍ବ ଭଳି ଆଉ ଲୋକଙ୍କ ଭିଡ ବି ହେଉନି। ଡାକ୍ତରଖାନା ମଧ୍ୟରେ ଖୁବ୍ ଶୀଘ୍ର ଆହାର କେନ୍ଦ୍ର ଖୋଲାଯିବ । ଏ ନେଇ ପ୍ରଶାସନ ନିଷ୍ପତ୍ତି ନେଇ ସାରିଛି । କିନ୍ତୁ କେବେ ଏହା ଖୋଲାଯିବ ଏ ନେଇ ତାଙ୍କ ପାଖରେ ନିର୍ଦ୍ଧିଷ୍ଟ ସୂଚନା ନଥିବା କହିଛନ୍ତି ଜୟପୁର ଉପଜିଲ୍ଲାପାଳ । ସେପଟେ ସେହି ଏକା ଢଙ୍ଗରେ  ଏ ନେଇ ପ୍ରତିକ୍ରିୟା ରଖିଛନ୍ତି ଅତିରିକ୍ତ ଜିଲ୍ଲା  ଚିକିତ୍ସା ଅଧିକାରୀ । ଡାକ୍ତରଖାନା ମଧ୍ୟରେ ଆହାର କେନ୍ଦ୍ର ପାଇଁ ସ୍ଥାନ ଚିହ୍ନଟ ହୋଇ ସାରିଛି । ତେବେ ପୁରୁଣା କ୍ୟାମ୍ପସରୁ ଆହାର କେନ୍ଦ୍ର ଏଠାକୁ ଆଉ ସ୍ଥାନାନ୍ତର ହେବନି ।  ବରଂ ଏଠାରେ ଆଉ ଏକ ନୂଆ ଆହାର କେନ୍ଦ୍ର ଖୋଲାଯିବ । ସେଥି ପାଇଁ ପ୍ରକ୍ରିୟା ବିଳମ୍ବ ହେଉଥିବାରୁ ଆହାର କେନ୍ଦ୍ର ଖୋଲା ଯାଇ ପାରୁନଥିବା ସେ କହିଛନ୍ତି। [embed]https://youtu.be/Ls7UGx2-U0Y[/embed] ଗଣ୍ଡେ ଖାଇବାକୁ ରୋଗୀଙ୍କ ସଂପର୍କୀୟ ନାହିଁ ନଥିବା ହଇରାଣ ହେଉଛନ୍ତି । ତେଣୁ ଡାକ୍ତରଖାନା କ୍ୟାମ୍ପସରେ କିପରି ଆହାର କେନ୍ଦ୍ର ଖୋଲା ଯାଇ ପାରିବ ସେଥି ପାଇଁ ପ୍ରଶାସନ ତୁରନ୍ତ ଆବଶ୍ୟକ ପଦକ୍ଷେପ ନେବା  ଜରୁରୀ।