ପୁରୀ ୧୦|୧୧: ବିଶ୍ବ ପ୍ରସିଦ୍ଧ କୋଣାର୍କ ସୂର୍ଯ୍ୟ ମନ୍ଦିର ଏବେ ସଙ୍କଟରେ । ଧୀରେ ଧୀରେ ଲୋପ ପାଉଛି କୋଣାର୍କ ସୂର୍ଯ୍ୟ ମନ୍ଦିରର କଳା ଓ ସଂସ୍କୃତି । ମନ୍ଦିରର କାରୁକାର୍ଯ୍ୟ ହଟାଯାଇ ସାଧାପଥର ଲଗାଯାଉଛି । ଫଳରେ ଏହାର ସୌନ୍ଦର୍ଯ୍ୟକୁ ଉପଭୋଗ କରିପାରୁନାହାଁନ୍ତି ଦେଶ ବିଦେଶରୁ ଆସିଥିବା ପର୍ଯ୍ୟଟକ ।
ଦିନକୁ ଦିନ ମନ୍ଦିରରେ ଶୋଭାପାଉଥିବା କାରୁକାର୍ଯ୍ୟପୂର୍ଣ୍ଣ ମୂର୍ତ୍ତି ସଂଖ୍ୟା କମିବାରେ ଲାଗିଛି । ସୂକ୍ଷ୍ମ କାରୁକାର୍ଯ୍ୟ ହଟାଯାଇ ସାଧା ପଥର ଲଗାଯାଉଛି । ବାର ଶହ ବଢ଼େଇଙ୍କ ନିହାଣ ମୁନରୁ ସୃଷ୍ଟି ବିଶ୍ବ ଐତିହ୍ୟ କୋଣାର୍କ ସୂର୍ଯ୍ୟ ମନ୍ଦିରରେ ବଡ ଧରଣର ଷଡଯନ୍ତ୍ର ମୁଣ୍ଡ ଟେକିଛି । ଗୋଟିଏ କି ଦୁଇଟି ନୁହେଁ ମୁଖଶାଳାର ୪୦ ପ୍ରତିଶତ କାରୁକାର୍ଯ୍ୟ ହଜିଯାଇ ତା ସ୍ଥାନରେ ସାଧା ପଥରଖଣ୍ଡ ଲଗାଇ ଦିଆଯାଇଛି । ଏହି ଘଟଣା ଜାଣାପଡିବା ପରେ ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
ଏଏସଆଇ ଅଧୀକାରୀଙ୍କ ହାତରେ କୋଣାର୍କ ଭାଗ୍ୟ । ଭାରତୀୟ ପ୍ରତ୍ନତତ୍ବ ବିଭାଗ ୧୯୩୯ ମସିହାରେ ମନ୍ଦିରକୁ ନିଜ ହାତକୁ ନେଇଥିଲା। ୧୯୮୦ରେ ମନ୍ଦିର ୪ ଦ୍ବାରକୁ ଏଏସଆଇ ବନ୍ଦ କରିଦେଇଥିଲା । ମନ୍ଦିର କାରୁକାର୍ଯ୍ୟ ପଥରକୁ କାଢ଼ି ଦିଆ ଯାଇ ସାଧା ପଥର ଲଗାଇବା ଦ୍ବାରା କଳା, ସଂସ୍କୃତି ଧୀରେ ଧୀରେ ଲୋପ ପାଇବାରେ ଲାଗିଛି । ପର୍ଯ୍ୟଟକଙ୍କ ସଂଖ୍ୟା ମଧ୍ୟ କମିବାର ଆଶଙ୍କା ରହିଛି । ସ୍ଥିତି ଅତି ଗମ୍ଭୀର ଆଡକୁ ଗତି କରୁଥିଲେ କେନ୍ଦ୍ର ଓ ରାଜ୍ୟ ସରକାର ବେଫିକର ।
ସେପଟେ ଏଥି ପ୍ରତି ଏସଆଇ ବିଭାଗ ଦୃଷ୍ଟି ନଦେଲେ ଆଗାମୀ ଦିନରେ ବଡଧରଣର ଆନ୍ଦୋଳନ କରାଯିବ ବୋଲି କୋଣାର୍କ ସୁରକ୍ଷା ସମିତି ଚେତାବନୀ ଦେଇଛି । ଯଦି ଏବେ ଠାରୁ ସରକାର ସତର୍କ ନ ହୁଅନ୍ତି, ତେବେ ଆଗାମୀ ପୀଢ଼ି ବେଳକୁ ସୂର୍ଯ୍ୟ ମନ୍ଦିରର ଅସ୍ତିତ୍ବ ମାଟିରେ ମିଶିଯିବାର ଆଶଙ୍କାକୁ ଏଡାଇ ଦେଇ ହେବ ନାହିଁ।