Tuesday, October 15, 2019

Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଚଳିତ ବିଶ୍ବକପ୍‌ରେ ରେକର୍ଡ ଅପେକ୍ଷା ବିବାଦର କାହାଣୀ ବେଶୀ, ବିଶ୍ବକପ୍‌ର ଘଟଣା ବହୁଳ ବିବାଦର କିଛି କାହାଣୀ ସଂପର୍କରେ ଜାଣନ୍ତୁ

କ୍ରିକେଟ ମହାକୁମ୍ଭ, ବିଶ୍ବକପ୍‌ ମେ ୩୦ରୁ ଜୁଲାଇ ୧୪ । ୧୫ ଦିନର ମହାପର୍ବ । ଲିଗ୍‌ ସେମିଫାଇନାଲ ପରେ ଫାଇନାଲରେ ବାଜି ମାରିଛି ଆୟୋଜକ ଇଂଲଣ୍ଡ । ଏହା ସହିତ ଅନେକ କଳ୍ପନା ଜଳ୍ପନାର ଅନ୍ତ ମଧ୍ୟ ଘଟିଛି । ତେବେ ଚଳିତ ବିଶ୍ବକପ୍‌ରେ ରେକର୍ଡ ଅପେକ୍ଷା ବିବାଦର କାହାଣୀ ବେଶୀ । ସତେ ଯେମିତି ସ୍କୋର ବୋର୍ଡକୁ ବଳି ଯାଇଛି ବିବାଦ । ପ୍ରତି ମ୍ୟାଚରେ ଦେଖିବାକୁ ମିଳିଥିଲା ଭିନ୍ନ ଭିନ୍ନ ଘଟଣା । କେବେ ଆଇସିସି ନିୟମକୁ ନେଇ ତ ଆଉ କେବେ ଖେଳାଳିଙ୍କ ପ୍ରଫମାନ୍ସ ତଥା ଆଚରଣ ଉଚାରଣକୁ ନେଇ ।ତେବେ ଚାଲନ୍ତୁ ଦେଖିବା ବିଶ୍ବକପ୍‌ର ଘଟଣା ବହୁଳ ବିବାଦର କାହାଣୀ…

ଲର୍ଡସରେ ନୂଆ ଇତିହାସ, ସୁପର ଓଭରରେ ସୁପର ଫଇସଲା । ଲଢ଼େଇ କରି ହାରିଲା ନ୍ୟୁଜିଲାଣ୍ଡ, ପ୍ରଥମ ଥର ପାଇଁ ବିଶ୍ବବିଜେତାର ମୁକୁଟ ପିନ୍ଧିଲା ଇଂଲଣ୍ଡ ।ସରିଲା କ୍ରିକେଟ ବିଶ୍ବକପ୍‌ । ଇତିହାସ ରଚିବା ଲକ୍ଷ୍ୟରେ ଥିବା ଦୁଇ ଦଳ ମଧ୍ୟରୁ ଜଣେ ହେଲା ବିଜୟୀ, ଅନ୍ୟ ଜଣେ ହେଲା ନିରାଶ । ପ୍ରତି ମ୍ୟାଚ ପରି ଫାଇନାଲରେ ମଧ୍ୟ ଦେଖିବାକୁ ମିଳିଥିଲା ରୋମାଞ୍ଚକର ଲଢ଼େଇ । ସତେ ଯେମିତି ଟାଇ… ଟାଇ… ଟାଇଟଲ ପରିସ୍ଥିତି ସୃଷ୍ଟି ହୋଇଥିଲା । ବେଶ ସଙ୍ଘର୍ଷ କରି ଫାଇନାଲରେ ପ୍ରବେଶ କରିଥିଲେ ଇଂଲଣ୍ଡ ଓ ନ୍ୟୁଜିଲାଣ୍ଡ । ଆଉ ଶେଷରେ ଏକ ରୋମାଞ୍ଚକର ଲଢ଼େଇରେ ନ୍ୟୁଜିଲାଣ୍ଡକୁ ହରାଇ ୨୭ ବର୍ଷ ପରେ ବିଶ୍ବକପ୍ ହାତେଇଛି ଇଂଲଣ୍ଡ ।ଯାହାକୁ ନେଇ କ୍ରିକେଟ ଇତିହାସରେ ସୃଷ୍ଟି ହୋଇଛି ସବୁଠାରୁ ବଡ଼ ବିବାଦ । ଆଇସିସି ନିୟମକୁ ନେଇ ସରା ବିଶ୍ବରେ ଦେଖା ଦେଇଛି ପ୍ରତିକ୍ରିୟା । ପ୍ରଥମେ  ମ୍ୟାଚ ଟାଇ ହେବା ପରେ ଖେଳାଯାଇଥିଲା ସୁପର ଓଭର । କିନ୍ତୁ ସୁପର ଓଭର ମଧ୍ୟ ଟାଇ ହେବାରୁ ଅଧିକ ବାଉଣ୍ଡାରି ଆଧାରରେ ଇଂଲଣ୍ଡକୁ ବିଶ୍ବ ବିଜେତା ଘୋଷଣା କରିଛି ଆଇସିସି ।

ଇଂଲଣ୍ଡ ବିଜେତା ଘୋଷଣା ହେବା ପରେ ଆଇସିସିର ନିୟମକୁ ନେଇ ଅଙ୍ଗୁଳି ଉଠାଇଛନ୍ତି ପ୍ରଶଂସକ । ବିଭିନ୍ନ ଦେଶର ଖେଳାଳିଙ୍କ ଠାରୁ ଆରମ୍ଭ କରି ନ୍ୟୁଜିଲାଣ୍ଡ ପର୍ଯ୍ୟନ୍ତ ସଭିଏଁ ଆଇସିସିକୁ ତାତ୍ସଲ୍ୟ କରିଛନ୍ତି । ତେବେ ଏହି ବାଉଣ୍ଡାରି ଆଧାର କଣ ? କେଉଁ ଆଧାରରେ ଏହି ନିଷ୍ପତି ନେଇଥାନ୍ତି ମ୍ୟାଚ ରେଫେରି ? ବାଉଣ୍ଡାରି ରୁଲ୍‌ର ଆଧାର ହେଉଛି ସମ୍ପୂର୍ଣ୍ଣ ଇନିଂସରେ ଉଭୟ ପକ୍ଷର ବ୍ୟାଟସ୍‌ ମ୍ୟାନ କେତେ ଥର ବଲ ବାଉଣ୍ଡାରି ପାର କରିଛନ୍ତି । ରବିବାର ଫାଇନାଲରେ ନ୍ୟୁଜିଲାଣ୍ଡ ବ୍ୟାଟସ୍‌ ମ୍ୟାନ ୧୪ଟି ଚୌକା ସହିତ ୨ଟି ଛକା ମାରି ୧୬ ଥର ବଲ ବାଉଣ୍ଡାରି ପାର କରିଥିଲେ । କିନ୍ତୁ ୨୨ଟି ଚୌକା ଓ ଦୁଇଟି ଛକା ମାରି  ସହିତ ୨୪ ଥର ପଡ଼ିଆ ବାହାରକୁ ବଲ ପଠାଇ ଥିବାରୁ ବିଜୟୀ ହୋଇଛି ଇଂଲଣ୍ଡ । ମାନେ ସମୁଦାୟ ଇନିଂସର ଚୌକା ଓ ଛକାକୁ ନେଇ କରାଯାଇଛି ବାଉଣ୍ଡାରି ରୁଲ୍‌ ।

ବିଶିଷ୍ଟ ଲେଖକ ଚେତନ ଭଗତ, ବରିଷ୍ଠ କଳାକାର ପରେଶ ରାୱଲ ମଧ୍ୟ ଆଇସିସିକୁ କଡ଼ା ଭାଷାରେ ସମାଲୋଚନା କରିଛନ୍ତି । ଗୁରୁଶିଷ୍ୟଙ୍କ ମଧ୍ୟରେ କଥା ବାର୍ତ୍ତାକୁ ନେଇ ଚେତନ ଆଇସିସିକୁ ତାତ୍ସଲ୍ୟ କରିଛନ୍ତି । ସେମିତି ପରେଶ କହିଛନ୍ତି ଯେଉଁ ଆଇସିସି ଧୋନୀଙ୍କ ଗ୍ଲୋବସ୍‌ ବଦଳାଇଦେଲା ବଳୀଦାନ ଲୋଗୋ ପାଇଁ ସେହି ଆଇସିସିକୁ ଏହି ସୁପର ଓଭର ନିୟମ ବଦଳାଇବାର ଆବଶ୍ୟତା ରହିଛି ।

କେବଳ ଫାଇନାଲ ମ୍ୟାଚ ନୁହେଁ । ଚଳିତ ଥର ବିଭିନ୍ନ ସମୟରେ ନିଷ୍ପତି ପାଇଁ ଆଇସିସିକୁ ସମାଲୋଚନାର ସରବ୍ୟ ହେବାକୁ ପଡ଼ିଛି । ଲିଗ୍‌ ପର୍ଯ୍ୟାୟରେ  ପାକିସ୍ତାନ ନ୍ୟୁଜିଲାଣ୍ଡକୁ ହରାଇଥିଲେ ମଧ୍ୟ ସେମିଫାଇନାଲକୁ ଯାଇପାରିନଥିଲା । ପଏଣ୍ଟ ମାମଲାକୁ ନେଇ ଆଇସିସି ପାକିସ୍ତାନର ବାଟ ରୋକି ନ୍ୟୁଜିଲାଣ୍ଡକୁ ସେମିଫାଇନାଲ ଟିକେଟ ଦେଇଥିଲା । ଯେଉଁଥି ପାଇଁ ଆଇସିସିକୁ ଭତ୍ସନା କରିଥିଲେ ପାକ୍‌ କର୍ତ୍ତୃପକ୍ଷ ।

ସେହିପରି ଅମ୍ପେୟାରଙ୍କ ନିଷ୍ପତି ମଧ୍ୟ ବିଭିନ୍ନ ମ୍ୟାଚରେ ବେଶ ବିବାଦୀୟ ହୋଇଛି । ଭାରତ- ୱେଷ୍ଟଇଣ୍ଡିଜ୍‌ ମ୍ୟାଚରେ ଥାର୍ଡ ଅମ୍ପାୟାର ଏମିତି ନିଷ୍ପତି ନେଇଥିଲେ । ଯାହାକୁ ନେଇ ଷ୍ଟାଡିୟମରେ ତୁମ୍ବି ତୋଫାନ କରିଥିଲେ ଭାରତୀୟ ପ୍ରଶଂସକ । ଏହି ମୁକାବିଲାରେ ରୋଚଙ୍କ ବୋଲିଂରେ କଟ୍ ବିହାଇଣ୍ଡ ଘୋଷଣା କରିଥିଲେ ଥାର୍ଡ ଅମ୍ପାୟାର । ରିଭ୍ୟୁ ନେଲା ବେଳେ ଥାର୍ଡ ଅମ୍ପାୟର ଯେଉଁ ଚିତ୍ର ଦେଖୁଥିଲେ, ଟିଭି ପରଦାରେ ସେହି ସମାନ ଚିତ୍ର ଦର୍ଶକ ଦେଖୁଥିଲେ। ହେଲେ ସମସ୍ତଙ୍କ ଆଖିରେ ଧୂଳି ଦେଲା ଭଳି ନିଷ୍ପତି ଦେଇଥିଲେ ଥାର୍ଡ ଅମ୍ପାୟର ମାଇକେଲ ଗଭ୍ । ପରେ ଅମ୍ପାୟାର ନଟ୍‌ ଆଉଟ ଘୋଷଣା କରିଥିଲେ କିନ୍ତୁ ସେତେବେଳକୁ ପ୍ୟାଭିଲିୟନ ଫେରିଯାଇଥିଲେ ରୋହିତ ଶର୍ମା ।

ବେଲସ୍‌ ବିବାଦ ମଧ୍ୟ ଏଥର ବିଶ୍ବକପ୍‌ରେ ଥିଲା ଆଉ ଏକ ପ୍ରମୁଖ ବିବାଦ । ଷ୍ଟମ୍ପସ୍‌ରେ ବଲ୍‌ ବାଜିବା ସତ୍ତ୍ବେ ଏହି ଜିଙ୍ଗ୍‌ ବେଲ୍‌ସ ଖସୁନଥିବାରୁ ଏହାର ସ୍ଥାୟିତ୍ବ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ବେଲ୍‌ସ ଖସୁନଥିବାରୁ ବ୍ୟାଟ୍‌ସମ୍ୟାନ୍‌ଙ୍କୁ ଫାଇଦା ମିଳୁଛି ଏବଂ ବୋଲର ନିରାଶ ହେଉଛନ୍ତି। ଏଭଳି ଘଟଣା ଏଥର ପ୍ରାୟ ୫ ଥର ଦେଖାଯାଇଛି । ଯାହାର ସମାଧାନ ପାଇଁ କୋହଲି ଓ ଫିଞ୍ଚ୍‌ଙ୍କ ଆଇସିସିକୁ ଆହ୍ବାନ ମଧ୍ୟ ଦେଇଛନ୍ତି ।

ଅତୀତରେ ବିଶ୍ବକପ୍‌ରେ ଅନେକ ବିବାଦ ଦେଖା ଦେଇଛି । ୧୯୯୬ରେ, ଅଷ୍ଟ୍ରେଲିଆ ୱେଷ୍ଟଇଣ୍ଡିଜ୍‌ ମ୍ୟାଚ ଛାଡ଼ିବା ହେଉ କିମ୍ବା ୨୦୦୭ ଉଲମରଙ୍କ ରହସ୍ୟ ମୟ ମୃତ୍ୟୁ ଅବା ଅଜବ ବର୍ଷା ନିୟମ ପାଇଁ ଦକ୍ଷିଣ ଆଫ୍ରିକାର ପ୍ରଥମ ବିଶ୍ବକପ୍‌ ପଦାର୍ପଣ ଅପ୍ରୀତିକର ପରିସ୍ଥିତିରେ ଶେଷ ହେବା ଘଟଣା । ଘଟଣା ଯାହା ହେଉନା କାହିଁକି ଅନ୍ତର୍ଜାତୀୟ ସ୍ତରରେ ବ୍ୟକ୍ତିଗତ ଭୁଲ୍‌ ପାଇଁ ଯଦି ଖେଳାଳିଙ୍କ ଉପରେ  ଲଗାମ ଲଗାଇ ଦଣ୍ଡିତ କରୁଛି ଆଇସିସି । ତେବେ ଭୁଲ୍‌ ପାଇଁ ଆଇସିସି କାହିଁକି ଦଣ୍ଡିତ ନହେବ ।

538 Views

   ସମ୍ବନ୍ଧିତ ଖବର