ଯାଜପୁର ରୋଡ୍ ୧୭।୪: ଯାଜପୁର ଜିଲ୍ଲା ଯାଜପୁର ରୋଡ୍ ଥାନା ପନାସିଆ ଗାଁ ନିକଟ ରେଳ ଧାରଣାରୁ ଜଣେ କିନ୍ନରଙ୍କ ମୃତଦେହ ଉଦ୍ଧାର କରାଯାଇଛି । ମୃତ୍ୟୁର କାରଣ ଅସ୍ପଷ୍ଟ ଥିବାବେଳେ ସେ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । ମୃତ କିନ୍ନର ଜଣଙ୍କ ଭଦ୍ରକ ଜିଲ୍ଲା ଅର୍ଣ୍ଣପାଳ ଗାଁର ଫତୁଆ ଜେନା ବୋଲି ଜଣାପଡିଛି । ସେ ଦୀର୍ଘ ଦିନରୁ ଯାଜପୁର ରୋଡ଼ ଅଞ୍ଚଳରେ ରହି ଭିକ୍ଷାବୃତ୍ତି କରୁଥିଲେ । ହେଲେ ଶନିବାର ସକାଳୁ ତାଙ୍କ ମୃତଦେହ ରେଳଧାରଣାରେ ପଡିଥିବାର ସ୍ଥାନୀୟ ଲୋକେ ଦେଖିବାକୁ ପାଇଥିଲେ ।
ଖବର ପାଇ ଯାଜପୁର ରୋଡ଼ ରେଳବାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ଶବ ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି । ଘଟଣାସ୍ଥଳରୁ ମୃତ କିନ୍ନରଙ୍କ ମୋବାଇଲ୍ ଫୋନ୍ ଜବତ କରାଯାଇଛି ।
ସୂଚନା ଅନୁସାରେ ମୃତ କିନ୍ନରଙ୍କର ପାଣିକୋଇଲି ଥାନା ଷଠିପୁର ଅଞ୍ଚଳର ଜଣେ ଯୁବକଙ୍କ ସହ ପ୍ରେମ ସମ୍ପର୍କ ରହିଥିଲା । ମାତ୍ର ଗତ କିଛି ଦିନ ହେବ କୌଣସି କାରଣରୁ ଉଭୟଙ୍କ ମଧ୍ୟରେ ତିକ୍ତତା ସୃଷ୍ଟି ହୋଇଥିଲା । ଯୁବକ ଜଣକ ବିଭିନ୍ନ ଆଳରେ କିନ୍ନରଙ୍କଠାରୁ ଲକ୍ଷାଧିକ ଟଙ୍କା ହଡ଼ପ କରିଥିବା କିନ୍ନର ଗତ କିଛି ଦିନ ତଳେ ପାଣିକୋଇଲି ଥାନାରେ ଅଭିଯୋଗ କରିଥିଲେ।
