ବାଲିଗୁଡା୮/୧: ସରୁନି ଦାଦନ ଦୁଃଖ। ପେଟ ପାଟଣା ପାଇଁ ଦାଦନ ଖଟିବାକୁ କେରଳ ଯାଇଥିବା ବାଲିଗୁଡା ସୁନାପଙ୍ଗା ସାହିର ଅନିଲ ବିଶୋଇଙ୍କ ପୁଅ ଶ୍ରୀଧର ବିଶୋଇଙ୍କ ମୃତଦେହ ଗାଁରେ ପହଞ୍ଚି ପାରୁନି। ଏ ନେଇ ପରିବାର ଲୋକେ ପ୍ରଶାସନ ନିକଟରେ ଆକୁଳ ନିବେଦନ କରିଛନ୍ତି l ଶ୍ରୀଧର ଏକମାତ୍ର ରୋଜଗାରିଆ ପୁଅ ଥିଲେ l ଘରର ଆର୍ଥିକ ଅବସ୍ଥା ସ୍ବଚ୍ଛଳ ନଥିବାରୁ ଦୁଇବର୍ଷ ତଳେ ଦାଦନ ଖଟିବାକୁ ଯାଇ କେରଳର ଏର୍ଣ୍ଣାକୁଲମ ଜିଲ୍ଲାର ଜର୍ଜ କାର୍ଟୁନ କମ୍ପାନୀରେ ଶ୍ରମିକଭାବେ କାମ କରୁଥିଲେ।
{"id":388812,"sizeSlug":"large","linkDestination":"none"}ବୁଧବାର ସକାଳୁ ସକାଳୁ କେରଳ ପୋଲିସ ଶ୍ରୀଧରଙ୍କ କ୍ଷତ ବିକ୍ଷତ ମୃତଦେହକୁ ଉଦ୍ଧାର କରି ବାଲିଗୁଡା ଥାନାକୁ ଖବର ଦେଇଥିଲେ । ବାଲିଗୁଡା ପୋଲିସ ସୂତ୍ରରୁ ଖବର ପାଇବା ପରେ ପରିବାର ଲୋକେ ଦୁଃଖରେ ଭାଙ୍ଗି ପଡିଛନ୍ତି l କେହି ଦୁର୍ବୁତ୍ତ ଶ୍ରୀଧରଙ୍କୁ ହତ୍ୟାକରି ଟ୍ରେନ ଲାଇନରେ ଫିଙ୍ଗି ଦେଇଥିବା ଅଭିଯୋଗ କରିଛନ୍ତି ପରିବାର ଲୋକେ । କାନ୍ଦ ବୋବାଳିରେ ଗାଁ ଫାଟି ପଡୁଛି l ଶ୍ରୀଧରଙ୍କ ମଲା ମୁହଁ ଟିକେ ଦେଖିବାକୁ ସାହିପଡିଶା ଆତ୍ମୀୟମାନେ ଚାତକଭଳି ଚାହିଁ ରହିଛନ୍ତି l ନ ଖାଇ ନ ପିଇ ପୁଅର ଫେରିବା ବାଟକୁ ଅପେକ୍ଷା କରିଛନ୍ତି ମାଆ l ମୃତ ଶ୍ରୀଧରଙ୍କ ବାପା ଅତ୍ୟନ୍ତ ଗରିବ ହୋଇଥିବାରୁ କେରଳରୁ ଶବ ଆଣିବା ସାମର୍ଥ୍ୟନାହିଁ l ପ୍ରଶାସନ ଶ୍ରୀଧରଙ୍କ ଶବକୁ ଫେରାଇ ଆଣିବା ସହିତ ସରକାରୀ ନିୟମ ଅନୁସାରେ କ୍ଷତି ପୂରଣ ଦେବାକୁ ଦାବୀହୋଇଛି l