ନୂଆଦିଲ୍ଲୀ,୧୨/୦୩: ମିଆଁମାରରେ ମାନବାଧିକାର ହନନ ହେଉଛି । ସେନା ଅନେକ ଆନ୍ଦୋଳନରତ ନୀରିହ ନାଗରିକଙ୍କୁ ଅମାନୁଷିକ ଭାବେ ହତ୍ୟା କରୁଛି । ଏନେଇ ଅନେକ ତଥ୍ୟ ଜାତିସଂଘର ଏକ ରିପୋର୍ଟରେ ସାମ୍ନାକୁ ଆସିଛି । ଏହାସହ ଘଟଣାକୁ ଜାତିସଂଘ ନିନ୍ଦା ମଧ୍ୟ କରିଛି ।
ମିଆଁମାରରେ ଅବସ୍ଥାପିତ ୟୁଏନର ବିଶେଷଜ୍ଞଙ୍କ ଥୋମାସ ଆଣ୍ଡ୍ର୍ୟୁଙ୍କ କହିବାନୁସାରେ, ମିଆଁମାର ସେନାର ନେତୃତ୍ୱ ନେଉଥିବା ଜୁଣ୍ଟା ସରକାର ପ୍ରାୟ ୭୦ ନୀରିହ ନାଗରିକଙ୍କୁ ହତ୍ୟା କରିଛି । ଯାହା ମାନବାଧିକାର ପ୍ରତି ଏହ ବଡ ଅପରାଧ । ଯେଉଁମାନଙ୍କୁ ହତ୍ୟା କରାଯାଇଛି ସେମାନଙ୍କ ମଧ୍ୟରୁ ଅନେକଙ୍କ ବୟସ ୨୫ ବର୍ଷରୁ କମ୍ । ମିଆଁମାରରେ ୨୫ ବର୍ଷରୁ କମ୍ ବୟସର ନାଗିରକଙ୍କୁ ଜେନେରେସନ ଜେଡ୍ ବୋଲି କୁହାଯାଏ । ସେମାନଙ୍କ ମଧ୍ୟରୁ ଅଧିକାଂଶ ଶିକ୍ଷିତ, ଇଞ୍ଜିନିୟର ଓ ଛାତ୍ରଛାତ୍ରୀ ଅଟନ୍ତି । ଗୋଟିଏ ପରିବାରର ବାପା, ପୁଅ, ଝିଅ, ସ୍ତ୍ରୀ ଓ ମାଆଙ୍କୁ ନିର୍ମମ ଭାବେ ହତ୍ୟା କରାଯାଇଛି । ଏପରିକି ମିଆଁମାରରେ ବାକ୍ ସ୍ୱାଧିନତାକୁ ହନନ କରାଯାଇଛି ।
ଆହୁରି ମଧ୍ୟ ବିଶେଷଜ୍ଞଙ୍କ କହିବାନୁସାରେ, ମିଆଁମାରର ଶାସନ ଏବେ ଅପରାଧୀଙ୍କ ହାତରେ ରହିଛି । ଜାତିଆଣ ଭିତ୍ତିରେ ମଧ୍ୟ ଅନେକ ଅପରାଧ ହେଉଛି । ରୋହିଙ୍ଗ୍ୟାଙ୍କ ଉପରେ ମଧ୍ୟ ଅତ୍ୟାଚାର ସୀମା ଟପିଛି । ତେବେ ସମସ୍ତ ରିପୋର୍ଟକୁ ଗତ ସପ୍ତାହରେ ଜାତିସଂଘକୁ ପ୍ରଦାନ କରାଯାଇଛି । ଏହା ଉପରେ ତର୍ଜମା କରାଯିବ । ଏହା ପରେ ହିଁ ଆଗାମୀ ପଦକ୍ଷେପ ନେବ ବୋଲି ସୂଚନା ମିଳିଛି ।
ସୂଚନାଯୋଗ୍ୟ, ଗତ ୧ ମାସ ଧରି ମିଆଁମାରରେ ହିଂସା ଲାଗି ରହିଛି । ସେନା ଜବରଦସ୍ତି ଦେଶର ଶାସନ ଭାର ନେଇଛି । ଏହାସହ ଦେଶରେ ଗୋଟିଏ ବର୍ଷ ପାଇଁ ଜରୁରୀକାଳିନ ସ୍ଥିତି ଲାଗୁ କରିବା ସହ ଡେମୋକ୍ରାଟିକ୍ ନେତା ଆୟୁଙ୍ଗ ସାଲ ସୁକିଙ୍କୁ ଗିରଫ କରିଛି ।