ପାଟଣା୩/୧: ଠେଙ୍ଗାରେ ପିଟି ପିଟି ହତ୍ୟା ଘଟଣାରେ ୩ ଅଭିଯୁକ୍ତଙ୍କୁ ଗିରଫ କଲା ପୁଲିସ। କେନ୍ଦୁଝର ଜିଲ୍ଲାପାଟଣା ଥାନା ଏରେଣ୍ଡେଇ ଗାଁ ରଜାଭାଡ଼ି ସାପ୍ତାହିକ ହାଟରେ ଯୁବକଙ୍କୁ ଠେଙ୍ଗାରେ ପିଟି ହତ୍ୟା କରାଯାଇଛି। ଏହି ହତ୍ୟାକାଣ୍ଡରେ ସଂପୃକ୍ତ ୩ ଜଣଙ୍କୁ ପାଟଣା ପୁଲିସ ଗିରଫ କରିଛି। ଅଭିଯୁକ୍ତମାନେ ହେଲେ ଏରେଣ୍ଡେଇ ଗାଁର ରଥ ମୁଣ୍ଡା, ଶିବ ମୁଣ୍ଡା ଓ ଟିମା ମୁଣ୍ଡା। ପ୍ରେମ ବ୍ୟାପରକୁ ନେଇ ସଂଘବଦ୍ଧ ଭାବେ ତାଙ୍କୁ ଆକ୍ରମଣ କରିଥିଲେ।
ଗତ ଶୁକ୍ରବାର କୁମୁଳାବାହାଳୀ ଗ୍ରାମର ହେମନ୍ତ ମହାନ୍ତଙ୍କୁ ପିଟି ପିଟି ୩ ଜଣ ଯୁବକ ତାଙ୍କୁ ହତ୍ୟା କରିଥିଲେ। ସୂଚନାଯୋଗ୍ୟ ଯେ, ରଥ ମୁଣ୍ଡାଙ୍କ ଏରେଣ୍ଡେଇ ଗାଁର ଜଣେ ଯୁବତୀଙ୍କ ସହିତ ପ୍ରେମ ସମ୍ପର୍କ ଗଢ଼ି ଉଠିଥିଲା। ସଂପୃକ୍ତ ଯୁବତୀଙ୍କ ସହ ହେମନ୍ତ କଥାବାର୍ତ୍ତା ହେବା ବେଳେ ଉତ୍ତ୍ୟକ୍ତ ହୋଇ ରଥ ମୁଣ୍ଡା ନିଜର ୨ ଜଣ ସହଯୋଗୀଙ୍କ ସହ ମିଶି ହେମନ୍ତଙ୍କୁ ଠେଙ୍ଗାରେ ମରଣାନ୍ତକ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା।
