ଓ୍ବାଶିଂଟନ୍ ୧୬।୮: ଆମେରିକାର ରାଷ୍ଟ୍ରପତି ନିର୍ବାଚନରେ ଡେମୋକ୍ରାଟିକ୍ ପାର୍ଟିର ପ୍ରାର୍ଥୀ ଜୋ ବିଡେନଙ୍କ ପ୍ରଚାର ଅଭିଯାନ ଶନିବାର (ଅଗଷ୍ଟ ୧୫) କହିଛି ଯେ ଭାରତ-ଆମେରିକା ସମ୍ପର୍କକୁ ଲଗାତର ମଜବୁତ କରିବା ପାଇଁ ତାଙ୍କ ପ୍ରଶାସନ ପ୍ରାଥମିକତା ଦେବ। ଭାରତୀୟ-ଆମେରିକୀୟ ନାଗରିକଙ୍କ ସହ ଜଡିତ ଏକ ଗୁରୁତ୍ବପୂର୍ଣ୍ଣ ନୀତିଗତ ଦସ୍ତାବେଜରେ ବିଡେନଙ୍କ ପ୍ରଚାର ଅଭିଯାନରେ ଦର୍ଶାଯାଇଛି ଯେ ବିଡେନ ବିଶ୍ବାସ କରୁଛନ୍ତି ଯେ ଦକ୍ଷିଣ ଏସିଆରେ, ଗୋଟିଏ ଦେଶରୁ ଅନ୍ୟ ଦେଶକୁ କିମ୍ବା ଅନ୍ୟ ରୂପରେ ଆତଙ୍କବାଦକୁ ବରଦାସ୍ତ କରାଯାଇପାରିବ ନାହିଁ।
ପ୍ରଚାର ଅଭିଯାନରେ କୁହାଯାଇଛି ଯେ ବିଡେନ ପ୍ରଶାସନ ଏକ ନିୟମ ଭିତ୍ତିକ ତଥା ସ୍ଥିର ଇଣ୍ଡୋ-ପାସିଫିକ୍ ଅଞ୍ଚଳକୁ ସମର୍ଥନ କରିବା ଜାରି ରଖିବ ଯେଉଁଥିରେ ଚୀନ୍ ସମେତ ଯେକୌଣସି ଦେଶ ପଡୋଶୀ ଦେଶକୁ ଧମକ ଦେଇପାରିବ ନାହିଁ । ବିଡେନଙ୍କ ପ୍ରଚାର ଅଭିଯାନରେ କୁହାଯାଇଛି ଯେ, ବିଡେନ ତାଙ୍କର ଦୀର୍ଘ ସମୟ ଧରି ଚାଲିଆସୁଥିବା ନିଜର ଏଭଳି ବିଶ୍ବାସକୁ ପୂରଣ କରିବେ ଯେ ଭାରତ ଏବଂ ଆମେରିକା ସ୍ବାଭାବିକ ସହଯୋଗୀ ଅଟନ୍ତି । ଆମେରିକା-ଭାରତ ସମ୍ପର୍କକୁ ମଜବୁତ କରିବା ପାଇଁ ବିଡେନ ପ୍ରଶାସନ ଅଧିକ ପ୍ରାଥମିକତା ଦେବ।
ଡେମୋକ୍ରାଟିକ୍ ପାର୍ଟିର ପ୍ରଚାର ଅଭିଯାନ ଭାରତୀୟ-ଆମେରିକୀୟ ସମ୍ପ୍ରଦାୟ ପାଇଁ ଜୋ ବିଡେନଙ୍କ ଏଜେଣ୍ଡା ଜାରି କରି କହିଛି ଯେ, ଭାରତ ଏବଂ ଆମେରିକା ମଧ୍ୟରେ ଦାୟିତ୍ବପୂର୍ଣ୍ଣ ସହଯୋଗ ବିନା କୌଣସି ସହଭାଗୀ ବିଶ୍ବସ୍ତରୀୟ ସମସ୍ୟାର ସମାଧାନ ହୋଇପାରିବ ନାହିଁ । ସେ କହିଛନ୍ତି ମିଳିତ ଭାବେ ଆମେ ଭାରତର ପ୍ରତିରକ୍ଷା କ୍ଷମତାକୁ ମଜବୁତ କରିପାରିବା ଏବଂ ଆତଙ୍କବାଦ ବିରୋଧୀ ସହଯୋଗୀ ଭାବରେ କାର୍ଯ୍ୟ କରିପାରିବା । ସ୍ବାସ୍ଥ୍ୟ ବ୍ୟବସ୍ଥାରେ ଉନ୍ନତି ଆଣିବା ଏବଂ ମହାମାରୀର ମୁକାବିଲା ପାଇଁ ଉନ୍ନତ ପଦକ୍ଷେପ ଗ୍ରହଣ କରିବା । ଉଚ୍ଚଶିକ୍ଷା, ସ୍ଥାନ ଏବଂ ମାନବିକ ସହାୟତା କ୍ଷେତ୍ରରେ ସହଯୋଗକୁ ଆହୁରି ମଜବୁତ କରିପାରିବ।