ଟାଙ୍ଗି ୨୨।୧୧: ଗାଁ ମଶାଣି ନିକଟରେ ଥିବା ତେନ୍ତୁଳି ଗଛରେ ଝୁଲୁଛି ନାବାଳକର ମୃତଦେହ। ତାହା ପୁଣି ଉଲଗ୍ନ ଅବସ୍ଥାରେ । ମୃତ ନାବାଳକଙ୍କ ବୟସ ୧୪ ବର୍ଷ ହେବ । ମୃତଦେହର ଆଖିରେ କଳାପଟି ବନ୍ଧା ଯାଇଛି । ନାବାଳକଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଛି । ସେ ଆତ୍ମହତ୍ୟା କରିଛନ୍ତି ନା ତାଙ୍କୁ ହତ୍ୟା କରାଯାଇଛି ସେ ନେଇ ପୋଲିସ ତଦନ୍ତ ଆରମ୍ଭ କରିଛି। ଏପରି ଘଟଣା ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା ବାଲୁଗାଁ ରଘୁନାଥପୁର ଗାଁରେ।
ଖବର ଅନୁଯାୟୀ, ଗାଁର ନାରାୟଣ ପ୍ରଧାନଙ୍କ ପୁଅ ପିଣ୍ଟୁ ପ୍ରଧାନ ଗତକାଲି ଅପରାହ୍ନରେ ଘରୁ କେନାଲ ବନ୍ଧକୁ ଶୌଚ ହେବା ପାଇଁ ଯାଇଥିଲେ। ଦୀର୍ଘ ସମୟ ପର୍ଯ୍ୟନ୍ତ ଘରକୁ ନଫେରିବାରୁ ଘର ଲୋକେ ଖୋଜାଖୋଜି କରିଥିଲେ। ବିଳମ୍ବିତ ରାତ୍ରିରେ ପିଣ୍ଟୁଙ୍କ ମୃତଦେହ ଝୁଲୁଥିବା ଦେଖିବାକୁ ମିଳିଥିଲା। ପୁଅକୁ ହତ୍ୟା କରାଯାଇଥିବା ନାବାଳକର ମାଆ କୋହଭରା କଣ୍ଠରେ ଅଭିଯୋଗ କରିଛନ୍ତି । ପୋଲିସ ଏକ ହତ୍ୟା ମାମଲା ରୁଜୁ କରି ତଦନ୍ତ କରୁଛି । ସାଇଣ୍ଟିଫିକ ଟିମ୍ ସହାୟତାରେ ଛାନଭିନ ଜାରି ରଖିଛି ବାଲୁଗାଁ ପୋଲିସ। ନାବାଳକର ମୃତ୍ୟୁ ନେଇ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି।