ନୂଆଦିଲ୍ଲୀ, ୨୧|୦୭: ଏସିଆ କପ୍ ଓ ଟି୨୦ ବିଶ୍ୱକପ୍ ରବ୍ଦ ହେବା ପରେ ଆଇପିଏଲ ୨୦୨୦ ହେବା ନେଇ ସ୍ପଷ୍ଟ ହୋଇଛି । ତେବେ ଏହି ଟୁର୍ଣ୍ଣାମେଣ୍ଟ ଭାରତରେ ହେବ ନାହିଁ । ୟୁଏଇରେ ହିଁ ଏହାର ଆୟୋଜନ ହେବ ବୋଲି କହିଛନ୍ତି ଆଇପିଏଲ ଗଭର୍ଣ୍ଣିଂ କାଉନସିଲର ସଭାପତି ବୃଜେଶ ପଟେଲ । ଏକ ସାକ୍ଷାତକାରରେ ସେ ଏହି ସୂଚନା ଦେଇଛନ୍ତି ।
ସେ କହିଛନ୍ତି ଯେ, ୨୦୨୦ ଆଇପିଏଲ ୟୁଏଇରେ ହେବ । ତେବେ କେଉଁ ତାରିଖରେ ହେବ ତାହା ସ୍ପଷ୍ଟ ହୋଇନାହିଁ । ଆସନ୍ତା ସପ୍ତାହରେ ଆଇପିଏଲ ଗଭର୍ଣ୍ଣିଂ କାଉନସିଲ୍ ବୈଠକ ଭିଡିଓ କନଫରେନ୍ସିଂ ଜରିଆରେ ହେବ । ଯେଉଁଥିରେ ତାରିଖ ବାବଦରେ ଆଲୋଚନା ହେବ ।
ସେ ଆହୁରି କହିଛନ୍ତି ଯେ, ଭାରତ ସରକାରଙ୍କ ପକ୍ଷରୁ ମଞ୍ଜୁରୀ ମିଳିବା ପରେ ଆଇପିଏଲ ୨୦୨୦ର ଖେଳସୂଚୀ ପ୍ରସ୍ତୁତ କରାଯିବ । ସେପ୍ଟେମ୍ବର ୨୮ରୁ ନଭେମ୍ବର ୮ ମଧ୍ୟରେ ଏହାର ଆୟୋଜନ ହୋଇପାରେ । ତେବେ ବୈଠକ ପରେ ହିଁ ଚୁଡାନ୍ତି ନିଷ୍ପତ୍ତି ନିଆଯିବ । ୟୁଏଇ ଆଇପିଏଲ ଆୟୋଜନ ପାଇଁ ଅଫର ଦେଇଛି ।
ସୂଚନାଯୋଗ୍ୟ, ୟୁଏଇ ପୂର୍ବରୁ ଆଇପିଏଲ ପାଇଁ ପ୍ରସ୍ତୁତି ଆରମ୍ଭ କରିଦେଇଛି । ଦୁବାଇ ସ୍ପୋର୍ଟସ୍ ସିଟିର କ୍ରିକେଟ୍ ମୁଖ୍ୟ ଏହି ସୂଚନା ଦେଇଛନ୍ତି । ଦୁବାଇ ଇଣ୍ଟରନ୍ୟାଶନାଲ ଷ୍ଟାଡିୟମରେ ୯ଟି ପିଚ୍ ପ୍ରସ୍ତୁତ କରାଯାଇଛି । ଫଳରେ ଆୟୋଜନରେ କୌଣସି ଅସୁବିଧା ଉପୁଜିବ ନାହିଁ ।
