ଦୁବାଇ, ୧୭/୧୦: ଆଜି ଆଇପିଏଲ୍ର ଏକ ଗୁରୁତ୍ୱପୂର୍ଣ୍ଣ ଲିଗ୍ ମ୍ୟାଚ୍ରେ ମୁହାଁମୁହିଁ ହେବେ ଦିଲ୍ଲୀ କ୍ୟାପିଟାଲ୍ସ ଓ ଚେନ୍ନାଇ ସୁପର କିଙ୍ଗ୍ସ । ପ୍ରଥମ ପର୍ଯ୍ୟାୟରେ ଫେଲ ମାରିଥିବା ସୁପର କିଙ୍ଗ୍ସ ଦ୍ୱିତୀୟ ପର୍ଯ୍ୟାୟରେ ସନ୍ରାଇଜର୍ସ ହାଇଦ୍ରାବାଦକୁ ହରାଇ ମନୋବଳ ଦୃଢ଼ କରିଛି। ପ୍ଲେ-ଅଫ୍ ଯୋଗ୍ୟତା ପାଇଁ ପ୍ରତ୍ୟେକ ମ୍ୟାଚ୍ ଦଳ ପାଇଁ ଗୁରୁତ୍ୱପୂର୍ଣ୍ଣ ରହିଛି। ଅନ୍ୟ ପଟରେ ଆଧିପତ୍ୟ ଜାରି ରଖିବା ଦିଲ୍ଲୀ କ୍ୟାପିଟାଲ୍ସର ଲକ୍ଷ୍ୟ ହେବ ।
ପ୍ରଥମ ପର୍ଯ୍ୟାୟରେ କ୍ୟାପିଟାଲ୍ସ ୪୪ରନ୍ରେ ସୁପର କିଙ୍ଗ୍ସକୁ ହରାଇଥିଲା । ପ୍ରଥମେ ବ୍ୟାଟିଂ କରି ପୃଥ୍ୱୀ ଶ’ଙ୍କ ଅର୍ଦ୍ଧଶତକ ବଳରେ କ୍ୟାପିଟାଲ୍ସ ୩/୧୭୫ରନ୍ କରିଥିଲା । ଏହାର ଜବାବରେ ସୁପର କିଙ୍ଗ୍ସ ୭/୧୩୧ରନ୍ କରିବାକୁ ସକ୍ଷମ ହୋଇଥିଲା । ପେସ୍ ବୋଲର କାଗିସୋ ରାବାଡ଼ା (୩ଟି) ଓ ଆନରିଚ୍ ନର୍ଜ (୨ଟି) ସୁପର କିଙ୍ଗ୍ସ ବିପର୍ଯ୍ୟୟର ମୁଖ୍ୟ କାରଣ ହୋଇଥିଲେ ।
ଦ୍ୱିତୀୟ ପର୍ଯ୍ୟାୟର ଏକ ମ୍ୟାଚ୍ରେ ସୁପର କିଙ୍ଗ୍ସ ୨୦ରନ୍ରେ ସନ୍ରାଇଜର୍ସକୁ ପରାସ୍ତ କରିଥିଲା । ଧୋନିଙ୍କ ସମସ୍ତଙ୍କ ନିଷ୍ପତ୍ତି ସଠିକ୍ ସାବ୍ୟସ୍ତ ହୋଇଥିଲା । ବ୍ୟାଟିଂ ଓ ବୋଲିଂ ରଣନୀତି ସଫଳ ହୋଇଥିଲା । ସାମ୍ କୁରାନ ଇନିଂସ୍ ଓପନ କରି ଦଳକୁ ଭଲ ଆରମ୍ଭ ଦେଇଥିଲେ । ତେଣୁ ଆସନ୍ତାକାଲି ଡୁ’ପ୍ଲେସିଙ୍କ ସହ କୁରାନ ଇନିଂସ୍ ଓପନ କରିବେ । ସେନ୍ ୱାଟସନ୍ ଓ ଅମ୍ଭାତି ରାୟୁଡୁ ଫର୍ମରେ ଥିବାବେଳେ ବୋଲିଂ ବିଭାଗରେ ଡ୍ୱେନ ବ୍ରାଭୋ, ଦୀପକ ଚହର ଓ ସ୍ପିନର କରଣ ଶର୍ମା ଭଲ ପ୍ରଦର୍ଶନ କରୁଛନ୍ତି । ସାରଜା ଗ୍ରାଉଣ୍ଡରେ ଧୋନିଙ୍କଠୁ ବଡ଼ ଇନିଂସ୍ ଆଶା କରାଯାଉଛି ।
କ୍ୟାପିଟାଲ୍ସ ଦଳ ୮ଟି ମ୍ୟାଚ୍ରୁ ୬ଟିରେ ବିଜୟୀ ହୋଇଛି। ଦଳ ସବୁ ବିଭାଗରେ ଭଲ ପ୍ରଦର୍ଶନ କରୁଛନ୍ତି । କିନ୍ତୁ ଆହତ ସମସ୍ୟା ଚିନ୍ତାଜନକ ରହିଛି । ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ୍ରେ ଅଧିନାୟକ ଶ୍ରେୟାସ ଆୟର ଆହତ ହୋଇଥିଲେ। ସେ ଫିଟ୍ ଅଛନ୍ତି କି ନାହିଁ ଜଣାପଡ଼ିନି । ଯଦି ସେ ଆଜି ନ ଖେଳନ୍ତି, ତା’ହେଲେ ଶିଖର ଧାୱନ ନେତୃତ୍ୱ ନେବେ।
ଆଜି ଯୁବ ବ୍ୟାଟିଂ ବିସ୍ମୟ ପୃଥ୍ୱୀ ଶ’ଙ୍କ ନିକଟରୁ ବଡ଼ ଇନିଂସ୍ ଆଶା କରାଯାଉଛି । ଦଳର ବୋଲିଂ ବିଭାଗ ସବୁଠୁ ଅଧିକ ଶକ୍ତିଶାଳୀ । ରାବାଡ଼ା ଓ ନର୍ଜ ପ୍ରଭାବୀ ପ୍ରଦର୍ଶନ କରି ସମ୍ପ୍ରତ୍ତି ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଥିବାବେଳେ ସ୍ପିନ ଯୋଡ଼ି ରବିଚନ୍ଦ୍ରନ ଅଶ୍ୱିନ ଓ ଅକ୍ଷର ପଟେଲ ଦଳ ଆବଶ୍ୟକ ବେଳେ ୱିକେଟ୍ ବାହାର କରିପାରୁଛନ୍ତି। ପୂର୍ବ ମ୍ୟାଚ୍ରେ ପଦାର୍ପଣ ସୁଯୋଗ ପାଇଥିବା ଯୁବ ବୋଲର ତୁଷାର ଦେଶପାଣ୍ଡେଙ୍କ ଉପରେ ସମସ୍ତଙ୍କ ନଜର ରହିବ।
