Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଗିନିଜ୍ ଅଫ ଓ୍ଵାର୍ଲ୍ଡ ରେକର୍ଡରେ ଭାରତର ବାଘ ଗଣନା ସର୍ଭେ, ୪ ବର୍ଷ ପୂର୍ବରୁ ଟାର୍ଗେଟ୍ ପୂରା

11/07/2020 at 7:28 PM

ଭୁବନେଶ୍ଵର ୧୧।୦୭: ଗିନିଜ୍ ରେକର୍ଡରେ ସ୍ଥାନ ପାଇଲା ଭାରତର ବାଘ ଗଣନା ସର୍ଭେ । ୨୦୧୮ ବାଘ ଗଣନା ସର୍ଭେକୁ ବିଶ୍ଵର ସବୁଠୁ ବଡ ବାଘ ଗଣନା ସର୍ଭେ ବୋଲି କୁହାଯାଇଛି । ଏବେ ଦେଶରେ ୨ ହଜାର ୯୬୭ ଟି ବାଘ ଥିବାବେଳେ ଓଡ଼ିଶାରେ ମାତ୍ର ୨୮ଟି ବାଘ ଥିବା ଜଣାପଡିଛି । ବାଘ ଗଣନା ପ୍ରତି ୪ ବର୍ଷରେ ଥରେ ହୋଇଥାଏ ।

କ୍ୟାମେରା ଟ୍ରାପିଙ୍ଗ ମେଥଡ୍‌ରେ ପ୍ରାୟ ୧ ଲକ୍ଷ ୨୧ ହଜାର ବର୍ଗ କିଲୋମିଟର ଅଞ୍ଚଳରେ ଏହି ସର୍ଭେ କରାଯାଇଥିଲା  । ଏଥିପାଇଁ ୨୬ ହଜାର ୮୩୮ ସ୍ଥାନରେ କ୍ୟାମେରା ଲଗାଯାଇଥିଲା । ଯେଉଁଥିରେ ପ୍ରାୟ ୩ କୋଟି ୪୮ ଲକ୍ଷ ଫଟୋଗ୍ରାଫ୍ ଉତ୍ତୋଳନ ହୋଇଥିଲା । ଏହି ରେକର୍ଡକୁ ଗିନିଜ୍ ବୁକ୍ ଚଳିତ ବର୍ଷ ସ୍ଥାନ ଦେଇଛି ।

ଏବେ ଦେଶରେ ୨ ହଜାର ୯୬୭ ଟି ବାଘ ଅଛନ୍ତି । ସେଥିରୁ ୨୪୬୧ ବଡ଼ ବାଘ ଥିବା ବେଳେ ବାକି ବାଘ ଛୁଆ। ଏହା ମଧ୍ୟରେ ମଧ୍ୟପ୍ରଦେଶ, କର୍ଣ୍ଣାଟକ ଏବଂ ଉତ୍ତରାଖଣ୍ଡରେ ୧୪୯୨ଟି ବାଘ ଅଛନ୍ତି । ଏନେଇ କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରୀ ପ୍ରକାଶ ଜାଭେଦକର ଟ୍ବିଟ୍ କରି ଏହା ଏକ ଏକ ବଡ଼ ସଫଳତା ବୋଲି କହିଛନ୍ତି ।

୨୦୨୨ ସୁଦ୍ଧା ଭାରତରେ ବାଘ ସଂଖ୍ୟା ଦୁଇଗୁଣ କରିବାକୁ ଯେଉଁ ଟାର୍ଗେଟ ଥିଲା ତାହା ୪ ବର୍ଷ ପୂର୍ବରୁ ସଫଳ ହୋଇଛି । ଅର୍ଥାତ ୨୦୨୨ ସୁଦ୍ଧା ବାଘ ସଂଖ୍ୟା ୨୮୦୦ ରେ ପହଞ୍ଚାଇବାକୁ ଲକ୍ଷ୍ୟ ଥିବା ବେଳେ ୨୦୧୮ ରେ ଏହା ୨୯୬୭ ଛୁଇଁଛି । ଏବେ ବିଶ୍ବର ବାଘ ସଂଖ୍ୟାର ୭୦ ପ୍ରତିଶତ ବାଘ କେବଳ ଭାରତରେ ଅଛନ୍ତି । ଗ୍ରାଉଣ୍ଡ ସର୍ଭେ ଓ କ୍ୟାମେରା ଟ୍ରାପ୍ ତଥ୍ୟ ଅନୁସାରେ ଏବେ ଭାରତର ୨୦ ଟି ରାଜ୍ୟରେ ବାଘ ଅଛନ୍ତି । ତେବେ ୨୦୧୮ ବାଘ ଗଣନା ଅନୁଯାୟୀ ଓଡିଶାରେ ୨୮ ଟି ବାଘ ଥିବା ଏନଟିସିଏ ଦର୍ଶାଇଛି ।

   Related Posts