Sunday, July 21, 2019

Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ଭାରତ ସୀମାକୁ ପଶି ଚାଷୀକୁ ମାଡ ମାରି ଘୋଷାଡ଼ି ନେବାପାଇଁ ଉଦ୍ୟମ କରୁଥିଲା ପାକିସ୍ତାନୀ ଯୁବକ, ହାତରେ ଥିଲା ବନ୍ଧୁକ

ଚଣ୍ଡୀଗଡ଼ ୧୭/୪ : ଭାରତୀୟ ସୀମାରେ ପ୍ରବେଶ କରି ଜଣେ ଚାଷୀଙ୍କୁ ମାଡ ମାରିଛି ଜଣେ ପାକିସ୍ତାନୀ | ମାଡ ମାରିବା ସହ ଭାରତୀୟ ଚାଷୀଙ୍କୁ ଘୋଷାଡ଼ି ନେବା ପାଇଁ ଚେଷ୍ଟା କରୁଥିଲା ପାକିସ୍ତାନୀ ଯୁବକ | ଘଟଣା ପଞ୍ଜାବ ପଠାନକୋଟ ଅନ୍ତର୍ଗତ କଷବା ଖୁଦେଇପୁର ଗାଁରେ ଘଟିଛି | ଜଣେ ଚାଷୀ ନିଜ ବିଲରେ କାମ କରୁଥିଲେ | ଏତିକିବେଳେ ସୀମା ପାରି କରି ଜଣେ ପାକିସ୍ତାନୀ ଯୁବକ ଗାଁକୁ ଆସିଥିଲା ଏବଂ ଚାଷୀଙ୍କୁ ଘୋଷାଡ଼ି ନେବାକୁ ଚେଷ୍ଟା କରିଥିଲା | ଚାଷୀ ଜଣକ ଜୀବନ ବିକଳରେ ପାଟି କରିଥିଲେ | ଚାଷୀଙ୍କ ପାଟି ଶୁଣି ଆଖପାଖ ବିଲରେ କାମ କରୁଥିବା ଲୋକେ ଦୌଡ଼ି ଆସିଥିଲେ | ଲୋକଙ୍କୁ ଦେଖି ଅଭିଯୁକ୍ତ ପାକିସ୍ତାନ ଆଡକୁ ଦୌଡ଼ି ପଳାଇଥିଲା | ଅଭିଯୁକ୍ତର ଆଉ ୩ଜଣ ସହଯୋଗୀ ଥିଲେ ଏବଂ ତାଙ୍କ ହାତରେ ଅସ୍ତ୍ର ଥିଲା | ମାରପିଟ କରିବାପରେ ୪ଜଣ ପାକିସ୍ତାନୀ ରେଞ୍ଜର ଆଡକୁ ଚାଲିଯାଇଥିଲେ | ଏହାସବୁ ପାକିସ୍ତାନୀ ରେଞ୍ଜରଙ୍କ କାରନାମା ବୋଲି ଆଶଙ୍କା କରାଯାଉଛି |

ଚାଷୀ ସୁଖବିର ସିଂ ଘଟଣା ସମ୍ପର୍କରେ ଥାନାରେ ଏତଲା ଦେଇଛନ୍ତି | ତାଙ୍କ ଅଂଚଳରେ ଏହା ପ୍ରଥମ ଘଟଣା ବୋଲି ସେ କହିଛନ୍ତି | ଘଟଣା ପରେ ଗ୍ରାମବାସୀ ପାକିସ୍ତାନ ବିରୋଧରେ ନାରା ବାଜି କରିଥିଲେ | ଗାଁର ସରପଂଚ ରଣଜିତ ସିଂ କହିଛନ୍ତି ଯେ, ସୀମା ନିକଟବର୍ତ୍ତୀ ନାଳକୁ ପାରି କରି ଯେତେବେଳେ ଚାଷୀମାନେ ନିଜ ଚାଷ ଜମି ଯାଆନ୍ତି, ସେତେବେଳେ ସୁରକ୍ଷାକର୍ମୀ ତାଙ୍କ ସହିତ ନ ଥାଆନ୍ତି | ସେଥିପାଇଁ ଏହିଭଳି ଘଟଣା ଘଟିଛି | ସୁଖବିର ସିଂଙ୍କ ଅଭିଯୋଗ ପରେ ଥାନା ଅଧିକାରୀ ଘଟଣାସ୍ଥଳକୁ ତଦନ୍ତ କରିଛନ୍ତି | ତଦନ୍ତ ପରେ ମାମଲା ବିଏସଏଫକୁ ହସ୍ତାନ୍ତର କରିଦିଆଯିବ ବୋଲି ସେ କହିଛନ୍ତି |


ସୁଖବିର ସିଂ ସକାଳେ ଅନ୍ତର୍ଜାତୀୟ ସୀମାରେ ୯ ନମ୍ବର ଗେଟ ଦେଇ କଣ୍ଟା ଯୁକ୍ତ ତାର ପାରିକରି ନିଜ ଚାଷୀ ଜମିରେ ପଶୁଙ୍କୁ ଚାରା ଦେବା ପାଇଁ ଯାଇଥିଲେ | ପାଖାପାଖି ସାଢେ ୧୦ଟା ବେଳେ ଚାରା କାଟୁଥିବା ବେଳେ ଅଚାନକ ଜଣେ ଯୁବକ ଆସି ତାଙ୍କୁ ମାଡ ମାରିବା ଆରମ୍ଭ କରିଥିଲା | ମାସ ମାରି ସେ ସୁଖବିରଙ୍କୁ ପାକିସ୍ତାନ ଆଡକୁ ନେଇଯିବା ପାଇଁ ଉଦ୍ୟମ କରୁଥିଲା |


ସେତେବେଳେ ସୁଖବିରଙ୍କ ନଜର ଅଚାନକ ପାକିସ୍ତାନ ସୀମାରେ ଛିଡା ହୋଇଥିବା ୩ଜଣ ଯୁବକଙ୍କ ଉପରେ ପଡିଥିଲା | ସେମାନେ ସିଭିଲ ଡ୍ରେସ ପିନ୍ଧିଥିଲେ ଏବଂ ତାଙ୍କ ହାତରେ ରାଇଫଲ ଥିଲା | ଏହା ଦେଖି ସୁଖବିର ସିଂ ସାହାଯ୍ୟ ପାଇଁ ପାଟି କରିଥିଲେ | ତାଙ୍କ ପାଟି ଶୁଣି ପାଖରେ ଚାଷ ଜମିରେ କାମ କରୁଥିବା ଚାଷୀ ଦୌଡ଼ି ଆସିଥିଲେ | ଫଳରେ ଅଭିଯୁକ୍ତ ଜଣକ ସୁଖବିରଙ୍କୁ ଧକ୍କା ଦେଇ ସୀମା ପାରିକରି ଚାଲିଯାଇଥିଲା | ସୁଖବିର କହିଛନ୍ତି ଯେ, ଯେଉଁ ଜାଗାରେ ସେ ଚାରା କାଟୁଥିଲେ ସେହି ଜାଗା ପାକିସ୍ତାନ ସୀମାରୁ ପାଖାପାଖି ୫୦୦ ମିଟର ଦୂରରେ ଥିଲା | ସୁଖବିରଙ୍କ ଚାଷ ଜମି ଜଲାଲିୟା ନାଳ ଅରପରି ଅଛି | ଏହି ନାଳ ଭାରତ ସୀମାରେ ରହିଛି |

566 Views

   ସମ୍ବନ୍ଧିତ ଖବର