ନୂଆଦିଲ୍ଲୀ : ଦେଶର ସୁରକ୍ଷା ବଳଙ୍କ ଉପରେ ଶୁକ୍ରବାର ବଡ ଧରଣର ସାଇବର ଆକ୍ରମଣ ହୋଇଥିବା ଜଣାପଡିଛି। ଏହା ପରେ ସେନାର ୩ ବାହିନୀଙ୍କୁ ଏଥିଲାଗି ସତର୍କ କରି ଦିଆଯାଇଛି। ମିଳିଥିବା ସୂଚନା ମୁତାବକ ସୁରକ୍ଷା ବଳଙ୍କୁ ‘ନୋଟିସ୍ ’ଶିର୍ଷକରେ ପଠାଯାଇଥିବା କୌଣସି ଇ-ମେଲ ଅଥବା ଆଟାଚ୍ମେଣ୍ଟ ନଖୋଲିବା ଲାଗି ସତର୍କ କରାଯାଇଛି। ଏ ନେଇ ଜାରୀ ଜରୁରୀକାଳୀନ ଚେତାବନୀରେ ସୁରକ୍ଷାବଳଙ୍କୁ ଏକ ଫିସିଂ ଇ-ମେଲ ପଠାଇଥିବା ଜଣାଇ ଦିଆଯାଇଛି।
ନୋଟିସ୍ ଶିର୍ଷକ ଏହି ଇ-ମେଲ ସହ HNQ Notice File.xls ନାମରେ ଆଟାଚ୍ମେଣ୍ଟ ମଧ୍ୟ ରହିଛି। ପ୍ରାୟ ସୁରକ୍ଷା କର୍ମୀଙ୍କୁ ଏହା [email protected] ନାମକ ଏକ ଆଇଡିରୁ ମିଳିଛି। ସୁରକ୍ଷା କର୍ମୀଙ୍କୁ ଏହି ଭଳି ଇ-ମେଲ ଲାଗି ସାବଧାନ ରହିବା ଲାଗି କୁହାଯାଇଛି। ଯଦି ଏଭଳି କୌଣସି ମେଲ ଇନବକ୍ସରେ ସୋ କରୁଥାଏ ତେବେ ତାକୁ ଆକ୍ସେସ ନ କରି ଏହାକୁ ତୁରନ୍ତ ହଟାନ୍ତୁ ଅଥବା ରିପୋର୍ଟ କରନ୍ତୁ ବୋଲି ଜଣାଇ ଦିଆଯାଇଛି।
ତେବେ ଭାରତୀୟ ସୁରକ୍ଷା ବ୍ୟବସ୍ଥା ଉପରେ ସାଇବର ଆଟାକ କିଛି ନୂଆ କଥା ନୁହେଁ । ଏହା ପୂର୍ବରୁ ମଧ୍ୟ ଏପରି ଅନେକବାର ହୋଇଛି। ୨୦୧୬ ମସିହାରେ ସାଇବର ବଦମାସମାନେ ସ୍କୋରପିୟନ ବୁଡାଜାହାଜ ସମ୍ପର୍କିତ ହଜାର ହଜାର ଫାଇଲ ଚୋରାଇ ନେଇଥିଲେ। ଏହି ଆକ୍ରମଣରେ ୬ଟି ବୁଡା ଜାହାଜର ଯୁଦ୍ଧ କ୍ଷମତା ସମ୍ପର୍କିତ ଗୋପନୀୟ ଡାଟା ଚୋରାଇ ନେଇଥିଲେ।