ଜମ୍ମୁ ୨୫/୦୧ : ଜାମ୍ମୁ-କାଶ୍ମୀରରେ ବାୟୁ ସେନାର ଏକ ହେଲିକପ୍ଟର କ୍ରାସ୍‌ ହୋଇଥିବା ସୂଚନା ମିଳିଛି । ହେଲିକପ୍ଟରରେ ଥିବା ଦୁଇ ଜଣ ପାଇଲଟ୍‌ ଗୁରୁତର ଆହତ ହୋଇଛନ୍ତି । ଗୁରୁତର ବାୟୁ ସେନାର ଦୁଇ ପାଇଲଟଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଛି ।

ସୂଚନା ଅନୁଯାୟୀ ଜମ୍ମୁ-କାଶ୍ମୀରର କାଠୁଆ ଜିଲ୍ଲା ଲଖନପୁର-ପଞ୍ଜାବ ସୀମା ନିକଟରେ ସେନାର ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି । କ୍ରାସ୍‌ ପଛରେ ଯାନ୍ତ୍ରିକ ତ୍ରୁଟି ଥିବା ଅନୁମାନ କରାଯାଉଛି । ସେନାର ଏକ ଲଢୁଆ ହେଲିକପ୍ଟର କାଶ୍ମୀର-ପଞ୍ଜାବ ସୀମାରେ ପାଟ୍ରୋଲିଂ କରୁଥିଲା ।

ତେବେ ହଠାତ ହେଲିକପ୍ଟରଟି ଭାରସାମ୍ୟ ହରାଇ ଜଳିଯାଇଥିଲା । ଏଥିରେ ଥିବା ଦୁଇ ଜଣ ପାଇଲଟ ଅଳ୍ପକେ ବର୍ତ୍ତି ଯାଇଥିଲେ ସୁଦ୍ଧା ଗୁରୁତର ଆହତ ହୋଇଥିବା ସୂଚନା ମିଳିଛି । ତେବେ ଦୁର୍ଘଟଣା ପଛରେ କଣ କାରଣ ରହିଛି ତାହାର ତଦନ୍ତ ଆରମ୍ଭ କରିଛନ୍ତି ଭାରତୀୟ ବାୟୁ ସେନାର ବରିଷ୍ଠ ଅଧିକାରୀ ।