Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • ବୈଠକ ପରେ ବୈଠକ କିନ୍ତୁ ଫଳ ଶୂନ ! ୧୯’ରେ ପୁଣି ଚାଷୀ-ସରକାର ଆଲୋଚନା
  • ||
  • ବରଗଡ଼: ବ୍ୟବସାୟୀଙ୍କ ଘରୁ ଲକ୍ଷାଧିକ ଟଙ୍କାର ସୁନା-ଗହଣା ଲୁଟ, ୩ ଲୁଟେରା ଗିରଫ
  • ||
  • ବ୍ରିସବେନ୍ ଟେଷ୍ଟ୍ : ପ୍ରଥମ ଦିନରେ ଲାବୁସେନଙ୍କ ଶତକ, କଙ୍ଗାରୁ ଟିମ୍ ୨୭୪/୫
  • ||
  • ଭୁବନେଶ୍ବର: ଗୁରୁତର-ଗର୍ଭବତୀ-ହସ୍ପିଟାଲରେ ଆଡମିଟ୍‌ ବ୍ୟକ୍ତିଙ୍କୁ ଦିଆଯିବ ନାହିଁ ଟିକା, ପରିବାର କଲ୍ୟାଣ ନିର୍ଦ୍ଦେଶକ ଡାକ୍ତର ବିଜୟ ପାଣିଗ୍ରାହୀ
  • ||
  • ଶ୍ରମିକମାନଙ୍କ ସହ ମିଶି ମାଟି ଖୋଳିଲେ ଜିଲ୍ଲା ପ୍ରକଳ୍ପ ନିର୍ଦ୍ଦେଶକ
  • ||
  • ଭୁବନେଶ୍ବର : ରାଜ୍ୟରେ ଆଉ ଦୁଇ ଜଣ କରୋନା ସଂକ୍ରମିତ ପ୍ରାଣ ହରାଇଲେ, ୧୮୯୮ ଛୁଇଁଲା ମୃତକଙ୍କ ସଂଖ୍ୟା
  • ||
  • ଚିଲିକାରେ ଆରମ୍ଭ ହୋଇଛି ଫ୍ଲୋରା ଫୋନା ସର୍ଭେ
  • ||
  • ଯାଜପୁର ଶିଶୁ ନିଖୋଜ ଘଟଣା: ନିଖୋଜ ପିହୁ ପରିବାରକୁ ଭେଟିଲେ ଏସ୍‌ପି ରାହୁଲ ପି.ଆର
  • ||
  • ନକଲି ସାମଗ୍ରୀର ପେଣ୍ଠସ୍ଥଳୀ ପାଲଟିଛି କଟକ, ପୁଣି ଅପମିଶ୍ରିତ ଗୁଣ୍ଡି ଜବତ
  • ||
  • ଗଞ୍ଜାମ: ଅଜଣା ଜନ୍ତୁ ଆତଙ୍କ, ଭୟଭୀତ ଅବସ୍ଥାରେ ସ୍ଥାନୀୟ ଲୋକେ
  • ||

ରାଜ୍ୟରେ ଆସନ୍ତା ଦୁଇଦିନ ଶୀତରୁ ନିସ୍ତାର ନାହିଁ – ସାରା ଭାରତରେ ଭୀଷଣ ଶୀତ ଲହରୀ

29/12/2019 at 11:30 AM

ନୂଆଦିଲ୍ଲୀ ୨୯।୧୨- ଉତ୍ତରଭାରତରେ ପ୍ରବଳ ଥଣ୍ଡାର ପ୍ରକୋପ । ଦିଲ୍ଲୀରେ ରେକର୍ଡ ଭାଙ୍ଗିଛି ଶୀତ । ଦିଲ୍ଲୀରେ ଶୀତ ୧୨୦ ବର୍ଷର ରେକର୍ଡ ଭାଙ୍ଗିଲାଣି। ଦିଲ୍ଲୀ ବାସିନ୍ଦା ୧୦ ଦିନ ହେଲାଣି ପ୍ରବଳ ଶୀତରେ ଥରୁଛନ୍ତି । ଭାରତୀୟ ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ଉତ୍ତର, ପୂର୍ବ ଏବଂ ମଧ୍ୟ ଭାରତରେ ଆଜି ଏବଂ ଆସନ୍ତାକାଲି ଦୁଇ ଦିନ ଧରି ଶୀତଲହରୀର ପ୍ରକୋପ ଦେଖିବାକୁ ମିଳିବ । ଦୁଇ ଦିନ ଧରି ପଞ୍ଜାବ, ହରିୟାଣା, ଚଣ୍ଡିଗଡ, ଦିଲ୍ଲୀ, ଉତ୍ତର ରାଜସ୍ଥାନକୁ ପ୍ରବଳରୁ ପ୍ରବଳତର ଶୀତ ଅନୁଭୂତ ହେବ ବୋଲି ପାଣିପାଗ ବିଭାଗ ସତର୍କ କରିଛି । ଏପରିକି ୩୧ ତାରିଖରୁ ୨ ତାରିଖ ମଧ୍ୟରେ ଦିଲ୍ଲୀରେ ବର୍ଷା ସମ୍ଭାବନା ରହିଛି।

ରାଜସ୍ଥାନ ମାଉଣ୍ଟ ଆବୁରେ ସର୍ବନିମ୍ନ ତାପମାତ୍ରା ୧ ଡିଗ୍ରୀ ସେଲ୍ସିୟସ୍ ରେକର୍ଡ କରାଯାଇଛି । ଘନ କୁହୁଡ଼ି ସମସ୍ୟା ଯୋଗୁଁ ଦିଲ୍ଲୀରେ ଆଜି ୪ଟି ବିମାନର ଦିଗ ପରିବର୍ତ୍ତନ କରାଯାଇଛି। ପଂଜାବ, ହରିୟାଣ, ଚଣ୍ଡିଗଡ଼, ଦିଲ୍ଲୀ, ଉତ୍ତରପ୍ରଦେଶ ଏବଂ ଉତ୍ତର ରାଜସ୍ଥାନରେ ପ୍ରବଳ କୁହୁଡ଼ି ହୋଇଛି। ଉତ୍ତରପ୍ରଦେଶରେ ମଧ୍ୟ ଶୀତ ଲହରି ପୂର୍ବ ରେକର୍ଡ ଭାଙ୍ଗିଛି।

ଲକ୍ଷ୍ନୌ, ବାଗପତ, ମିରଟ ଏବଂ ହାପୁରରେ ସମସ୍ତ ସ୍କୁଲ୍ କଲେଜ୍ ବନ୍ଦ ରହିଛି। ଅସହ୍ୟ ଥଣ୍ଡାରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ମଧ୍ୟପ୍ରଦେଶରେ ବର୍ଷା, କୁହୁଡ଼ି ଓ କାଲୁଆ ପବନ ଯୋଗୁଁ ସ୍ଥିତି ଅସହ୍ୟ ହୋଇପଡ଼ିଛି । ବିହାରରେ ଅତ୍ୟଧିକ ଥଣ୍ଡା ଯୋଗୁଁ ଯୀବନଯାତ୍ରା ପ୍ରଭାବିତ ହୋଇଛି । ସେପଟେ ହିମାଚଳ ପ୍ରଦେଶ ଏବଂ ଉତ୍ତରାଖଣ୍ଡର ଉଚ୍ଚ ପାର୍ବତ୍ୟାଞ୍ଚଳରେ ପ୍ରବଳ ତୁଷାରପାତ ହେଉଛି । ସେହିପରି ଜାମ୍ମୁ କାଶ୍ମୀର ଓ ଲଦାଖରେ ମାଇନସ ୧୦ ରୁ ୧୫ ଡିଗ୍ରୀ ସେଲ୍ସିୟସ୍କୁ ଖସିଆସିଛି

ପାଣିପାଗ ପୂର୍ବାନୁମାନ କହୁଛି, ଆସନ୍ତା ଦୁଇଦିନ ଶୀତରୁ ନିସ୍ତାର ନାହିଁ । ଭୀଷଣ ଶୀତ ଲହରୀରେ ଥରିବ ସାରା ଓଡ଼ିଶା। ଆଭ୍ୟନ୍ତରୀଣରୁ ଉପକୂଳ ଯାଏଁ ଶୀତ ମାଡ଼ି ବସିବ । ଭୀଷଣ ଶୀତକୁ ଲକ୍ଷ୍ୟ ରଖି ଜିଲ୍ଲାପାଳମାନଙ୍କୁ ସତର୍କ କରାଇ ଦେଇଛନ୍ତି ସ୍ୱତନ୍ତ୍ର ରିଲିଫ୍‌ କମିଶନର ପ୍ରଦୀପ ଜେନା । ଏସଆରସି ଶ୍ରୀ ଜେନା ନିର୍ଦ୍ଦେଶ ଦେଇଛନ୍ତି, ଶୀତ ଲହରୀ ସ୍ଥିତି ମୁକାବିଲା ପାଇଁ ଆବଶ୍ୟକୀୟ ପଦକ୍ଷେପ ନିଅନ୍ତୁ । ସମସ୍ତ ବ୍ଲକ, ତହସିଲ ଓ ପଞ୍ଚାୟତସ୍ତରରେ ଲୋକଙ୍କୁ ସଚେତନ କରାଇବା ସହ ଆବଶ୍ୟକୀୟ ପଦକ୍ଷେପ ଗ୍ରହଣ କରନ୍ତୁ । ଆବଶ୍ୟକ ସ୍ଥଳେ ଗରିବ ଓ ଘରହୀନ ଲୋକଙ୍କ ପାଇଁ ରାତ୍ରି ଆଶ୍ରୟସ୍ଥଳୀ କିମ୍ବା ସରକାରୀ ସ୍କୁଲ କିମ୍ବା ସରକାରୀ କୋଠାବାଡ଼ିରେ ରାତ୍ରି ରହଣୀ ବ୍ୟବସ୍ଥା କରାଯାଉ ।

ଶୁକ୍ରବାର ରାତିରେ ଉତ୍ତର ଦିଗରୁ କାଲୁଆ ପବନ ଏମିତି ବହିଲା, ହେମାଳ କରିଦେଲା । କେନ୍ଦୁଝରରେ ଆଜି ତୁଷାରପାତ ହୋଇଛି ବାଂଶପାଳ ବ୍ଲକରେ ପାରଦ ୩.୨ ଡିଗ୍ରୀକୁ ଖସି ଆସିଛି । କେନ୍ଦୁଝରରେ ଗୁରୁବାର ରାତିରେ ସର୍ବନିମ୍ନ ତାପମାତ୍ରା ୧୪ ଡିଗ୍ରୀ ଥିଲା । ଶୁକ୍ରବାର ରାତିରେ ୫.୬ ଡିଗ୍ରୀକୁ ଖସି ଆସିଲା । ରାତିକରେ ଖସିଲା ୮.୪ ଡିଗ୍ରୀ । ୨୦୦୯ରୁ ଆଜି ପର୍ଯ୍ୟନ୍ତ ଡିସେମ୍ବରରେ କେନ୍ଦୁଝର ତାପମାତ୍ରା କେବେ ଏତେ ତଳକୁ ଖସିନଥିଲା । ଯଦିଓ ୨୦୧୪ ଡିସେମ୍ବର ୨୪ ତାରିଖରେ କେନ୍ଦୁଝରର ସର୍ବନିମ୍ନ ତାପମାତ୍ରା ୫.୯ ଡିଗ୍ରୀ ଥିଲା, ଆଜି ପାରଦ ଏହି ରେକର୍ଡକୁ ଭାଙ୍ଗିଛି । କେନ୍ଦୁଝରର କାଞ୍ଜିପାଣି, ବଖାଇ ଉପଖଣ୍ଡର କୋଇଡ଼ା ଓ ଟେନ୍‌ସାରେ ପ୍ରବଳ ଥଣ୍ଡା ସହ ଆଜି ସକାଳେ ତୁଷାତପାତ ହୋଇଛି । ଲୋକେ ଘରୁ ବାହାରି ପାରୁନାହାନ୍ତି ଥଣ୍ଡା ପାଇଁ ।


ସୋନପୁରରେ ଅଚାନକ ପାରଦ ଖସିଗଲା ୪ ଡିଗ୍ରୀ ସେଲସିୟସକୁ । ଏଠି ଦିନକ ତଳେ ପାରଦ ଥିଲା ୧୯.୨ ଡିଗ୍ରୀ ସେଲସିୟସ୍‌ । ଗୋଟିଏ ରାତି ଭିତରେ ପାରଦ ୧୧.୨ ଡିଗ୍ରୀ ଖସିଲା । ଏଥିରୁ ଅନୁମାନ କରାଯାଇପାରେ ଜନଜୀବନ କିଭଳି ଶୀତରେ କାଲୁଆ ପଡ଼ିଯାଇଥିବ ।


ଖାଲି ସୋନପୁର ନୁହେଁ, ଝାରସୁଗୁଡ଼ା ତାପମାତ୍ରା ବି ପୂର୍ବ ରାତି ତୁଳନାରେ ୧୧.୨ ଡିଗ୍ରୀ ଖସିଛି । ଗୁରୁବାର ରାତିରେ ଥିଲା ୧୭ ଡିଗ୍ରୀ । ଶୁକ୍ରବାର ରାତିରେ ଖସି ଆସିଲା ୫.୮ ଡିଗ୍ରୀକୁ । ଝାରସୁଗୁଡ଼ାରେ ପାରଦ ସ୍ୱାଭାବିକଠାରୁ ୬ ଡିଗ୍ରୀ କମ୍‌ ରହିଛି । ଝାରସୁଗୁଡ଼ା ପାଇଁ ଏହା ଡିସେମ୍ବର ମାସରେ ସବୁଠୁ କମ୍‌ ତାପମାତ୍ରା । ୧୯୫୫ ମସିହା ଡିସେମ୍ବର ୨୯ ତାରିଖରେ ଝାରସୁଗୁଡ଼ାର ସର୍ବନିମ୍ନ ତାପମାତ୍ରା ୬.୧ ଡିଗ୍ରୀ ଥିଲା । ଯାହାକି ଝାରସୁଗୁଡ଼ା ପାଇଁ ଡିସେମ୍ବରରେ ସର୍ବକାଳୀନ ଥଣ୍ଡା ରେକର୍ଡ ଥିଲା । ଆଜି ଏହି ରେକର୍ଡ ଭାଙ୍ଗିଛି ।

ରାଜ୍ୟର ମୋଟ ୧୨ଟି ସ୍ଥାନରେ ଶୁକ୍ରବାର ରାତି ତାପମାତ୍ରା ୧୦ ଡିଗ୍ରୀ ତଳକୁ ଖସି ଯାଇଛି । ଗୁରୁବାର ରାତି ତୁଳନାରେ ଶୁକ୍ରବାର ରାତିରେ ପାରଦ ୫ରୁ ୧୧ ଡିଗ୍ରୀ ସେଲସିୟସ୍‌ ପର୍ଯ୍ୟନ୍ତ କମିଛି । ସର୍ବନିମ୍ନ ତାପମାତ୍ରା ଯେତିକି ରହିବା କଥା, ତା’ଠାରୁ ୪-୬ ଡିଗ୍ରୀ ପର୍ଯ୍ୟନ୍ତ କମିଯାଇଛି । ଆଜି ପାଗ ସାମାନ୍ୟ ଫିଟି ଖରା ଆସିଥିଲା । ମାତ୍ର କାଲୁଆ ପବନ ବାହାରେ ଛିଡ଼ା କରି ଦେଉନି । ଶୀତ କମ୍ପନରେ ଜନଜୀବନ ପୂରା ବେହାଲ୍‌ । ଜୀବନଯାତ୍ରା ପ୍ରଭାବିତ ହୋଇଛି ।

ପୂର୍ବ ରାତି ତୁଳନାରେ ଅନୁଗୁଳ ତାପମାତ୍ରା ୫ ଡିଗ୍ରୀ ଖସି ୮ ଡିଗ୍ରୀରେ ପହଞ୍ଚିଛି । ବାରିପଦା ସର୍ବନିମ୍ନ ତାପମାତ୍ରା ୬.୫ ଡିଗ୍ରୀ କମି ୮.୫ ଡିଗ୍ରୀ ରେକର୍ଡ ହୋଇଛି । ସମ୍ବଲପୁର ତାପମାତ୍ରା ୭.୪ ରେକର୍ଡ ହୋଇଛି । ଯାହାକି ଗୁରୁବାର ରାତିଠାରୁ ପାଖାପାଖି ୧୦ ଡିଗ୍ରୀ କମ୍‌ । ଟିଟିଲାଗଡ଼ ତାପମାତ୍ରା ୭ ଡିଗ୍ରୀ ଓ ଦାରିଙ୍ଗିବାଡ଼ି ମଧ୍ୟ ୭ ଡିଗ୍ରୀକୁ ଖସି ଆସିଛି। ପୂର୍ବ ରାତି ତୁଳନାରେ ଟିଟିଲାଗଡ଼ରେ ପାରଦ ୮.୫ ଡିଗ୍ରୀ କମିଛି । ଆଉ ଦାରିଙ୍ଗିବାଡ଼ିରେ ୨୪ ଘଣ୍ଟା ଭିତରେ ରାତି ତାପମାତ୍ରା ୬.୫ ଡିଗ୍ରୀ କମିଛି ।

ଅନ୍ୟ ସହର ଭିତରେ ହୀରାକୁଦର ସର୍ବନିମ୍ନ ତାପମାତ୍ରା ୯.୮, ବାଲେଶ୍ୱର ୭.୬, କଟକ ୯.୬ ଡିଗ୍ରୀ ସେଲସିୟସ୍‌ ରେକର୍ଡ ହୋଇଛି । ଯାହାକି ସ୍ୱାଭାବିକ ତୁଳନାରେ ୪ ଡିଗ୍ରୀ କମ୍‌ । ବାଲେଶ୍ୱରରେ ରାତିକରେ ପାରଦ ୬ ଡିଗ୍ରୀ କମିଛି । ପୂର୍ବ ରାତି ତୁଳନାରେ କଟକରେ ୫ ଓ ଚାନ୍ଦବାଲିରେ ୪ ଡିଗ୍ରୀ କମିଛି । ଭୁବନେଶ୍ୱର ତାପମାତ୍ରା ମଧ୍ୟ ୪.୮ ଡିଗ୍ରୀ କମି ୧୨ ଡିଗ୍ରୀରେ ପହଞ୍ଚିଛି । ଯାହାକି ସ୍ୱାଭାବିକଠାରୁ ୩ ଡିଗ୍ରୀ କମ୍‌ ।

ଭବାନୀପାଟଣାରେ ପାରଦ ଗୁରୁବାର ରାତି ତୁଳନାରେ ୯ ଡିଗ୍ରୀ କମି ୧୦ ଡିଗ୍ରୀକୁ ଖସି ଆସିଛି । ସେହିପରି ବଲାଙ୍ଗିରରେ ୮ ଡିଗ୍ରୀ ଓ ଫୁଲବାଣୀରେ ୮.୫ ଡିଗ୍ରୀ କମିଛି ଗୋଟିଏ ରାତି ଭିତରେ । ବଲାଙ୍ଗିରର ସର୍ବନିମ୍ନ ତାପମାତ୍ରା ୧୦.୨ ଓ ଫୁଲବାଣୀ ୧୦.୫ ଡିଗ୍ରୀ ରେକର୍ଡ ହୋଇଛି ।

ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶକ ଏଚ୍‌.ଆର୍‌.ବିଶ୍ୱାସ କହିଛନ୍ତି, ଶୀତ ପ୍ରକୋପ ଆହୁରି ଦୁଇଦିନ ଥରାଇବ । ଭୀଷଣ ଶୀତ ଲହରୀ ୩୧ ତାରିଖ ସକାଳ ପର୍ଯ୍ୟନ୍ତ ଜାରି ରହିବ । ରବିବାର ସକାଳେ ବି ଉତ୍ତର ଆଭ୍ୟନ୍ତରୀଣ ଅଞ୍ଚଳ ସମେତ କଟକ, ଖୋର୍ଦ୍ଧା, ପୁରୀ, ନୟାଗଡ଼, ବୌଦ୍ଧ, ସୋନପୁର, ବଲାଙ୍ଗୀରର ଅଳ୍ପ କେତେକ ଜାଗାରେ ଭୀଷଣ ଶୀତ ଲହରୀ ଜାରି ରହିବ । ତେବେ ଅନୁଗୁଳ, କେନ୍ଦୁଝର, ମୟୂରଭଞ୍ଜ, ବାଲେଶ୍ୱର, ଦେବଗଡ଼ର ଗୋଟିଏ ଦୁଇଟି ସ୍ଥାନରେ ଭୀଷଣ ଶୀତ ଲହରୀ ଅନୁଭୂତ ହେବ । ସେହିପରି କେନ୍ଦୁଝର, ମୟୂରଭଞ୍ଜ, ଅନୁଗୁଳ, ଢେଙ୍କାନାଳ, କଟକ, ବାଲେଶ୍ୱରର କେତେକ ଜାଗାରେ ଶୀତ ଲହରୀ ଅନୁଭୂତ ହେବ । କନ୍ଧମାଳ, କଳାହାଣ୍ଡି, କୋରାପୁଟ ଓ ବଲାଙ୍ଗୀରରେ ଘନ କୁହୁଡ଼ି ଘେରିବ । ରବିବାର ରାତି ଓ ସୋମବାର ସକାଳେ ଉତ୍ତର ଆଭ୍ୟନ୍ତରୀଣ ଓଡ଼ିଶା ସମେତ ବାଲେଶ୍ୱର, କଟକ, ସୋନପୁର, ବୌଦ୍ଧ ଓ ବଲାଙ୍ଗିରରେ ଶୀତ ଲହରୀ ଅନୁଭୂତ ହେବ । ସୋମବାର ରାତି ଓ ମଙ୍ଗଳବାର ସକାଳେ ଅନୁଗୁଳ, ବୌଦ୍ଧ, କେନ୍ଦୁଝର, ମୟୂରଭଞ୍ଜ, ବାଲେଶ୍ୱର, ସୋନପୁର, ବଲାଙ୍ଗୀରରେ ଶୀତ ଲହରୀ ଅନୁଭୂତ ହେବ ।

ଶିକ୍ଷା ଓ ଅନୁସନ୍ଧାନ (ସୋଆ) ଡିମ୍‌ଡ ଟୁ ବି ୟୁନିର୍ଭସିଟିର ଜଳବାୟୁ ଓ ପରିବେଶ (ସିଇସି) କେନ୍ଦ୍ର ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର ସାହୁଙ୍କ ପୂର୍ବାନୁମାନ ହେଲା, ରବିବାର ମଧ୍ୟ ଏଭଳି ଶୀତ ଲାଗି ରହିବ । ସୋମବାର ରାତି ପାରଦ ସାମାନ୍ୟ ବଢ଼ିପାରେ । ତଥାପି ଶୀତରୁ ନିସ୍ତାର ମିଳିବନି । ୩୧ ଓ ୧ ତାରିଖବେଳକୁ ପାଗ ବଦଳିବ । ୧ରୁ ବର୍ଷା ସମ୍ଭାବନା ଅଛି। ୧ ତାରିଖ ରାତିରୁ ବର୍ଷା ହୋଇପାରେ । ୨ରେ ବର୍ଷା ବଢ଼ିବ । ୩ରେ ପାଗ ମେଘାଚ୍ଛନ୍ନ ସହ କାଁ ଭାଁ ବର୍ଷା ହେବ । ୫ରୁ ପୁଣି ଶୀତ ବଢ଼ିବ ।

   Related Posts