ମୁମ୍ବାଇ ୧୨।୦୧: ଭାରତୀୟ ଦଳ କିଛି ଦିନ ପରେ ନିଜର ପ୍ରଥମ ବିଦେଶୀ ଗସ୍ତ କରିବ । ସେଥିଲାଗି ଆଜି ନ୍ୟୁଜିଲାଣ୍ଡ ଗସ୍ତ ପାଇଁ ଭାରତୀୟ କ୍ରିକେଟ ଦଳ ଚୟନ କରାଯିବ । ଜାନୁଆରୀ ୨୪ରେ ଆରମ୍ଭ ହେଉଥିବା ନ୍ୟୁଜିଲାଣ୍ଡ ଗସ୍ତରେ ପାଞ୍ଚଟି ଟି-ଟ୍ବେଣ୍ଟି, ତିନୋଟି ଦିନିକିଆ ଓ ଦୁଇଟି ଟେଷ୍ଟ ମ୍ୟାଚ୍ ଖେଳିବ ଟିମ୍ ଇଣ୍ଡିଆ । ଦଳରେ ଅଧିକ ପରିବର୍ତ୍ତନ ହେବାର ଆଶା କମ୍ ରହିଛି । ତେବେ ଦଳ ଚୟନ ପରେ ସବୁଠୁ ଅଧିକ ନଜର ରହିବ ମହେନ୍ଦ୍ର ସିଂ ଧୋନଙ୍କ ଉପରେ , କାରଣ ବିଶ୍ବକପ୍ ସେମିଫାଇନାଲ ପରଠୁ ଧୋନି କୌଣସି ମ୍ୟାଚ୍ ଖେଳିନାହାନ୍ତି। ଧୋନି ଖୁବଶୀଘ୍ର ଦିନିକିଆ କ୍ରିକେଟ୍ରୁ ଅବସର ନେବେ ବୋଲି ଗତ କିଛି ଦିନ ତଳେ ଦଳର କୋଚ ରବି ଶାସ୍ତ୍ରୀ ସଙ୍କେତ ଦେଇଥିଲେ । କିନ୍ତୁ କେବେ ଓ କେଉଁ ସମୟରେ ଅବସର ନେବେ ସେ କଥା ରବି ଶାସ୍ତ୍ରୀ ଜାଣିଛନ୍ତି ଓ ଅନ୍ୟ କୌଣସି ବ୍ୟକ୍ତି ଜାଣିଛନ୍ତି ।
ତେବେ ନ୍ୟୁଜିଲାଣ୍ଡ ଗସ୍ତ ପାଇଁ ହେବାକୁ ଥିବା ଦଳ ଚୟନ ଏକ ମାତ୍ର ପରିବର୍ତ୍ତନ ସ୍ଵରୂପ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ଦଳରେ ସାମିଲ କରାଯାଇପାରେ । ନ୍ୟୁଜିଲାଣ୍ଡ ଗସ୍ତ ପାଇଁ ୧୫ ପରିବର୍ତ୍ତେ ୧୬ କିମ୍ବା ୧୭ ଜଣିଆ ଦଳ ଚୟନ କରିପାରନ୍ତି ଚୟନକର୍ତ୍ତା । ଭାରତୀୟ ଏ ଦଳର ଗସ୍ତ ଜାତୀୟ ଦଳ ସହିତ ମଧ୍ୟ ହେଉଛି । ତେଣୁ ଚୟନକର୍ତ୍ତାଙ୍କ ପାଖରେ ଆବଶ୍ୟକ ପଡ଼ିଲେ ଖେଳାଳିଙ୍କୁ ତୁରନ୍ତ ଜାତୀୟ ଦଳରେ ସାମିଲ କରିବା ପାଇଁ ବିକଳ୍ପ ରହିବ।
