Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ସମୁଦ୍ରରେ ଫସିଲା ଜାହାଜ, ତୈଳ ନିର୍ଗତ ରୋକିବା ପାଇଁ ମରିସସ୍‌କୁ ଏମିତି ସାହାଯ୍ୟର ହାତ ବଢାଇଲା ଭାରତ

16/08/2020 at 7:21 PM

ନୂଆଦିଲ୍ଲୀ ୧୬।୦୮: ମରିସସ୍‌ ସମୁଦ୍ର କୂଳରେ ଫସିଥିବା ଜାପାନର ମାଲିକାନାରେ ଥିବା ଏକ ଜାହାଜରୁ ନିର୍ଗତ ହେଉଥିବା ତୈଳକୁ ରୋକିବା ପାଇଁ ଏବେ ଭାରତ ସାହାଯ୍ୟର ହାତ ବଢାଇଛି। ବୈଦେଶିକ ମନ୍ତ୍ରଣାଳୟ ରବିବାର କହିଛି ମରିସସ୍‌ ଜାହାଜରୁ ହେଉଥିବା ତୈଳ ନିର୍ଗତକୁ ରୋକିବା ପାଇଁ ଭାରତ ଉପକରଣ ଓ ମାଟେରିଆଲ ପଠାଇଛି। ତୈଳ ନିର୍ଗତ ରୋକିବା  ଓ ଉଦ୍ଧାରକାର୍ଯ୍ୟ ପାଇଁ ଭାରତୀୟ ବାୟୁସେନାର ଏକ ବିମାନରେ ୩୦ ଟନରୁ ଅଧିକ ଟେକ୍ନୋଲୋଜି ଉପକରଣ ଓ ସାମଗ୍ରୀ ପଠାଯାଇଛି।

ମନ୍ତ୍ରଣାଳୟ ରବିବାର କହିଛି ତୈଳ ନିର୍ଗତ ରୋକିବା ପାଇଁ ବିଶେଷଜ୍ଞ ତଟରକ୍ଷୀ ବାହିନୀର ୧୦ ସଦସ୍ୟ ବିଶିଷ୍ଟ ଟିମ୍‌କୁ ମଧ୍ୟ ମରିସସ୍‌ରେ ମୁତୟନ କରାଯାଇଛି। ଉଲ୍ଲେଖନୀୟ ଏକ  ଜାପାନୀ ଜାହାଜ ଜୁଲାଇର ଶେଷ ଆଡକୁ ମରିସସ୍‌ ସମୁଦ୍ର କୂଳ ନିକଟରେ ଏକ ଚଟ୍ଟାଣରେ ଫସି ରହିଛି। ଏହାର କିଛି ଦିନ ପରେ ପରିବେଶ ପାଇଁ ଏହି ସମ୍ବେଦନଶୀଳ କ୍ଷେତ୍ରରେ ଶତାଧିକ ଟନ୍‌ ତୈଳ ନିର୍ଗତ ଆରମ୍ଭ ହୋଇଥିଲା। ଶନିବାର ମରିସସ୍‌ର ଅଧିକାରୀ କହିଛନ୍ତି ଜାହାଜ ଏମ ଭି ଓ୍ଵାକଶିୟୋ ଚଟ୍ଟାଣରେ ବାଡେଇ  ହୋଇ ଭାଙ୍ଗି ଯାଇଛି।

ଗତ ସପ୍ତାହରେ ମରିସସ୍‌ର ପ୍ରଧାନମନ୍ତ୍ରୀ ପ୍ରବିନ୍ଦ ଜଗନ୍ନାଥ ପରିବେଶ ଜରୁରୀକାଳୀନ ସ୍ଥିତି ଘୋଷଣା କରିଥିଲେ ଓ ସ୍ଥିତିର ମୁକାବିଲା ପାଇଁ ଅନ୍ତରାଷ୍ଟ୍ରୀୟ ସହାୟତା ଲୋଡିଥିଲେ। ଏବେ ମରିସସ୍‌ ସରକାରଙ୍କ ଅନୁରୋଧକ୍ରମେ ଭାରତ ସରକାର ୩୦ ଟନ୍ ଟେକ୍ନୋଲଜି ଉପକରଣ ଓ ସାମଗ୍ରୀ ଭାରତୀୟ ବାୟୁସେନାର ଏକ ବିମାନ ଜରିଆରେ ଘଟଣାସ୍ଥଳକୁ ପଠାଇଛନ୍ତି।

   Related Posts