ନୂଆଦିଲ୍ଲୀ ୨୦/୦୧: ବର୍ଷ ୨୦୨୧ ପାଇଁ ଦିନିକିଆ ଦଳ ଘୋଷଣା କରିଛି ଇଣ୍ଟରନେସନାଲ କ୍ରିକେଟ କାଉନସିଲ୍ (ICC) । ବଡ କଥା ହେଉଛି ଆଇସିସି ପକ୍ଷରୁ ଜାରି କରାଯାଇଥିବା ଏହି ଲିଷ୍ଟରେ କୌଣସି ଜଣେ ବି ଭାରତୀୟ ଖେଳାଳିଙ୍କ ନାଁ ନାହିଁ । ଇଣ୍ଟରନେସନାଲ କ୍ରିକେଟ କାଉନସିଲ୍ (ICC) ଜାରି କରିଥିବା ଦିନିକିଆ ଦଳରେ ପାକିସ୍ତାନର ଷ୍ଟାର ପ୍ଲେୟାର ବାବର ଆଜମ୍ ଅଧିନାୟକ ହୋଇଛନ୍ତି । ବାବରଙ୍କ ବ୍ୟତିତ ଆଉ ଜଣେ ପାକିସ୍ତାନୀ ଖେଳାଳିଙ୍କୁ ଚୂଡାନ୍ତ ଏକାଦଶରେ ସ୍ଥାନ ମିଳିଛି । ୧୧ ଜଣିଆ ଦଳରେ ୨ ଜଣ ପାକିସ୍ତାନୀ ଖେଳାଳି ରହିଥିବା ବେଳେ, ବାଂଲାଦେଶର ୩ ଜଣ, ଶ୍ରୀଲଙ୍କାର ୨ଜଣ, ଦକ୍ଷିଣ ଆଫ୍ରିକାର ୨ ଏବଂ ଆୟରଲାଣ୍ଡର ୨ ଜଣ ଖେଳାଳିଙ୍କୁ ଆଇସିସି ଦିନିକିଆ ଖେଳାଳି ତାଲିକାରେ ସ୍ଥାନ ମିଳିଛି । ୨୦୨୧ ମସିହାରେ ଦିନିକିଆ ଫର୍ମାଟରେ ଶ୍ରେଷ୍ଠ ପ୍ରଦର୍ଶନ କରିଥିବା ଖେଳାଳିମାନଙ୍କୁ ଏହି ତାଲିକାରେ ସାମିଲ କରାଯାଇଛି ।
ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ଆୟରଲାଣ୍ଡରୁ ୨ ଜଣ ଖେଳାଳି ଆଇସିସି ଦିନିକିଆ ଦଳରେ ସ୍ଥାନ ପାଇଥିବା ବେଳେ ଭାରତରୁ କୌଣସି ଜଣେ ମଧ୍ୟ ଖେଳାଳିଙ୍କୁ ଚୂଡାନ୍ତ ଏକାଦଶରେ ସ୍ଥାନ ନମିଳିବା ଚିନ୍ତାଜନକ । ଅନ୍ୟପଟେ ଟ୍ବେଣ୍ଟି ଟ୍ବେଣ୍ଟି ବିଶ୍ବକପରେ ନୈରାଶ୍ୟଜନକ ପ୍ରଦର୍ଶନ ପରେ ଆଇସିସି ପକ୍ଷରୁ ଜାରି କରାଯାଇଥିବା ବର୍ଷ ୨୦୨୧ ପାଇଁ ଟି-ଟ୍ବେଣ୍ଟି ଟିମରେ ମଧ୍ୟ କୌଣସି ଜଣେ ହେଲେ ବି ଭାରତୀୟ ଖେଳାଳିଙ୍କୁ ସ୍ଥାନ ମିଳିନଥିଲା । ଏବେ ଆଇସିସି ପକ୍ଷରୁ ଦିନିକିଆ ଦଳ ଘୋଷଣା ହୋଇଥିଲେ ହେଁ, ଜଣେ ହେଲେ ବି ଭାରତୀୟ କ୍ରିକେଟର ପ୍ଲେଇ ଇଲେଭେନ୍ରେ ନାହାନ୍ତି ।
ଅବଶ୍ୟ ଭାରତୀୟ ଦଳ ୨୦୨୧ରେ କମ ଦିନିକିଆ ମ୍ୟାଚ୍ ଖେଳିଛି । ଗତ ସିଜିନ୍ରେ ଟିମ୍ ଇଣ୍ଡିଆ ମାତ୍ର ୬ଟି ଦିନିକିଆ ମ୍ୟାଚ୍ ଖେଳିଛି । ୨୦୨୧ ଆରମ୍ଭରୁ ଇଂଲଣ୍ଡ ବିପକ୍ଷରେ ଟିମ୍ ଇଣ୍ଡିଆ ୩ଟି ଦିନିକିଆ ମ୍ୟାଚ୍ ଖେଳିଥିବା ବେଳେ ଭାରତୀୟ ଯୁବ ଦଳ ଶ୍ରୀଲଙ୍କାରେ ଘରୋଇ ଦଳ ବିପକ୍ଷରେ ୩ଟି ଦିନିକିଆ ମ୍ୟାଚ୍ ଖେଳିଥିଲା ।
ICC ଜାରି କରିଥିବା ଦିନିକିଆ ଦଳ ମଧ୍ୟରେ ପାକିସ୍ତାନର ଭେଟେରାନ୍ ପ୍ଲେୟାର ବାବର ଆଜମ୍ଙ୍କୁ ଅଧିନାୟକ କରିଛି । ବାବର ଗତ ସିଜିନ୍ରେ ମୋଟ ୬ ଓ୍ବାନ୍ଡେରୁ ୬୭.୫୦ ହାରରେ ୪୦୭ ରନ କରିଛନ୍ତି । ଓପନର୍ ଭାବେ ଆୟରଲାଣ୍ଡର ପୋଲ ଷ୍ଟାର୍ଲିଙ୍ଗ ଏବଂ ଦକ୍ଷିଣ ଆଫ୍ରିକାର ଜାନେମନ୍ ମଲାନଙ୍କୁ ଚୟନ କରିଛି ଅନ୍ତର୍ଜାତୀୟ କ୍ରିକେଟ ପରିଷଦ । ଉଭୟ ଖେଳାଳି ୨୦୨୧ରେ ଚମତ୍କାର ପ୍ରଦର୍ଶନ କରିଥିଲେ । ଗତ ବର୍ଷ ଷ୍ଟାର୍ଲିଙ୍ଗ ଦିନିକିଆରେ ସବୁଠାରୁ ଅଧିକ ରନ୍ କରିଛନ୍ତି । ମୋଟ ୭ଟି ମ୍ୟାଚ୍ରୁ ସେ ୮୪.୮୩ ହାରରେ ୫୦୯ ରନ କରିଛନ୍ତି । ଆଇସିସି ଶ୍ରେଷ୍ଠ ଏକାଦଶରେ ସ୍ଥାନ ପାଇଥିବା ଆଉ ଜଣେ ପାକିସ୍ତାନୀ ଖେଳାଳି ହେଉଛନ୍ତି ଫକର୍ ଜମାନ୍ । ସେ ୨୦୨୧ରେ ୬୦.୯୮୩ ହାରରେ ମୋଟ ୩୬୫ ରନ କରିଛନ୍ତି । ଦକ୍ଷିଣ ଆଫ୍ରିକା ବିପକ୍ଷ ସିରିଜ୍ରେ ଲଗାତାର ୨ଟି ମ୍ୟାଚରେ ଦୁଇଟି ଶତକ ମାରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ ।
ସେହିଭଳି ଅଲରାଉଣ୍ଡର ଭାରେ ବାଂଲାଦେଶ ଖେଳାଳି ସାକିବୁଲ ହାସନଙ୍କୁ ଆଇସିସି ଚୟନ କରିଥିବା ବେଳେ ଓ୍ବକେଟ କିପର ଭାବେ ବାଂଲାଦେଶର ମୁସଫିକର ରହିମଙ୍କୁ ସ୍ଥାନ ମିଳିଛି । ବୋଲର ଭାବେ ଓ୍ବାନିନ୍ଦୁ ହାସାରଙ୍ଗାଙ୍କୁ ଆଇସିସି ସ୍ଥାନ ଦେଇଛି ICC । ତାଙ୍କ ସହିତ ବୋଲିଂ ଲିଷ୍ଟରେ ମୁସ୍ତଫିଜୁର ରେହମାନ, ସିମି ସିଂହ ଏବଂ ଦୁଷ୍ମନ୍ତ ଚାମିରାଙ୍କୁ ସ୍ଥାନ ମିଳିଛି । ଗତ ବର୍ଷ ମୋଟ ୧୪ ଦିନିକିଆ ଖେଳି ୨୦ଟି ଓ୍ବିକେଟ ନେଇଛନ୍ତି ଦୁଷ୍ମନ୍ତ ଚାମିରା ।
ICC ପୁରୁଷ ଦିନିକିଆ ଦଳ : ପୋଲ ଷ୍ଟାର୍ଲିଙ୍ଗ, ଜାନେମନ୍ ମଲାନ୍, ବାବର ଆଜମ (ଅଧିନାୟକ), ଫକର ଜମାନ, ଭାନ୍, ଡର୍ ଦୁସେନ୍, ଶାକିବ ଉଲ ହାସନ, ମୁସ୍ତଫିଜୁର ରହିମ (ଓ୍ବିକେଟ କିପର), ଓ୍ବାନିନ୍ଦୁ ହାସାରଙ୍ଗା, ମୁସ୍ତଫିଜୁର ରେହମାନ, ସିମି ସିଂହ ଏବଂ ଦୁଷ୍ମନ୍ତ ଚାମିରା
