ଜୟପୁର ୧୭।୪: ରାଜସ୍ଥାନର ଚିତ୍ତୋରଗଡରେ ସବଡିଭିଜନ ଅଫିସରେ କାର୍ଯ୍ୟ କରୁଥିବା ଆଇଏଏସ୍ ଅଧିକାରୀ ତେଜସ୍ବୀ ରାଣାଙ୍କ ବଦଳି ଏବେ ଚର୍ଚ୍ଚାର ବିଷୟ ପାଲଟିଛି । ଆଇଏଏସ୍ ଅଧିକାରୀ ତେଜସ୍ବୀ ରାଣା ଲକ୍ ଡାଉନ୍ ଉଲ୍ଲଂଘନ କରିଥିବା କଂଗ୍ରେସ ବିଧାୟକଙ୍କ କର୍ମକର୍ତ୍ତାଙ୍କ କାରର ଚାଲାଣ କାଟି ଦେଇଥିଲେ । ବିଧାୟକ ନିଜେ ସେହି କାରରେ ବସିଥିଲେ ।
କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂ ଶେଖାଓ୍ବତ ସରକାରଙ୍କ ଏହି କାର୍ଯ୍ୟକୁ ଦୁର୍ଭାଗ୍ୟଜନକ ବୋଲି କହିଛନ୍ତି । ରାଜସ୍ଥାନ ସରକାରଙ୍କ କାର୍ଯ୍ୟକାରିତା ଉପରେ ପ୍ରଶ୍ନ ଉଠାଇ ସେ କହିଛନ୍ତି ଯେ ରାଜ୍ୟରେ କରୋନା ଭାଇରସ୍ ମୁକାବିଲା ପାଇଁ ଆମର ପ୍ରଶାସନିକ ଅଧିକାରୀମାନେ ଯଥାସମ୍ଭବ ଉଦ୍ୟମ କରୁଛନ୍ତି । କିନ୍ତୁ ଚିତ୍ତୋରଗଡରେ ଲକ୍ ଡାଉନ୍ କୁ କଡାକଡି ଭାବେ ପାଳନ କରୁଥିବା କରୋନା ଯୋଦ୍ଧା ମହିଳା ଅଧିକାରୀ ତେଜସ୍ବୀ ରାଣାଙ୍କ ରାଜନୈତିକ କାରଣରୁ ବଦଳି ଦୁର୍ଭାଗ୍ୟଜନକ । ସେ କହିଛନ୍ତି ଯେ ରାଜସ୍ଥାନ ସରକାର ଏଥିପାଇଁ କୌଣସି କାରଣ ଦେଇପାରନ୍ତି, କିନ୍ତୁ ଘଟଣା ପରଦିନ ମହିଳା ଅଧିକାରୀଙ୍କ ବଦଳି ହୋଇଥିଲା । ଏହା ରାଜ୍ୟ ସରକାରଙ୍କ ମାନସିକତାକୁ ପ୍ରକାଶ କରୁଛି । ଏହା କରୋନା ଭାଇରସ୍ ମୁକାବିଲା ପାଇଁ ଲଢୁଥିବା ଅନ୍ୟ ଅଧିକାରୀ ଏବଂ କର୍ମଚାରୀଙ୍କ ମନୋବଳ ଉପରେ ପ୍ରତିକୂଳ ପ୍ରଭାବ ପକାଇପାରେ ।
ଅନ୍ୟପଟେ ରାଜସ୍ଥାନ ବିଜେପି ସଭାପତି ସତୀଶ ପୁନିଆ କହିଛନ୍ତି ଯେ ସରକାର ଭଲ କାମ କରୁଥିବା ଅଧିକାରୀଙ୍କୁ ଟାର୍ଗେଟ୍ କରୁଛନ୍ତି । ଜୟପୁରରେ ଏହା ମଧ୍ୟ କରାଯାଇଥିଲା ଯେଉଁଠାରେ ରାସନ ବଣ୍ଟନରେ ନିୟୋଜିତ ସିଭିଲ ଡିଫେନ୍ସ ଲୋକଙ୍କଠାରୁ କାମ ଛଡାଇ ନିଆଯାଇ ଅନ୍ୟ ଲୋକଙ୍କୁ ଦିଆଯାଇଥିଲା ।
ସୂଚନାଯୋଗ୍ୟ ଯେ, ରାଜସ୍ଥାନ ସରକାର ମଙ୍ଗଳବାର ବିଳମ୍ବିତ ରାତିରେ ଚିତ୍ତୋରଗଡ ସବଡିଭିଜନ ଅଧିକାରୀ ପଦରେ ନିୟୋଜିତ ତେଜସ୍ବୀ ରାଣାଙ୍କୁ ସ୍ବାସ୍ଥ୍ୟ ବୀମା ଏଜେନ୍ସିର ମିଳିତ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ପଦକୁ ବଦଳି କରିଛନ୍ତି । ମଙ୍ଗଳବାର ଦିନ ହିଁ ତେଜସ୍ବୀ ରାଣା ଲକ୍ ଡାଉନ୍ ବେଳେ ମୁଖ୍ୟ ବଜାର ଦେଇ ଯାଉଥିବା ବେଙ୍ଗୁ ବିଧାୟକ ରାଜେନ୍ଦ୍ର ସିଂ ବିଧୁଡିଙ୍କ କାର୍ଯ୍ୟକର୍ତ୍ତାଙ୍କ କାରର ଚାଲାଣ କାଟି ଦେଇଥିଲେ । ବିଧାୟକ ସେହି ସମୟରେ ଗାଡିରେ ଉପସ୍ଥିତ ଥିଲେ । ସେହି ଦିନ ତେଜସ୍ବୀ ରାଣା ପରିବା ମାର୍କେଟରେ ପହଞ୍ଚି ବ୍ୟବସାୟୀମାନଙ୍କୁ ସାମାଜିକ ଦୂରତା ନିୟମ ପାଳନ ନକରିବାରୁ ଗାଳି ଦେଇଥିଲେ ଏବଂ ଯେତେବେଳେ ବ୍ୟବସାୟୀମାନେ ପାସ୍ ଦେଖାଇଥିଲେ ସେ ସେଗୁଡିକ ଚିରିଦେଇଥିଲେ । ଏହି ଘଟଣା ପରେ ତାଙ୍କୁ ବଦଳି କରାଯାଇଛି ବୋଲି କୁହାଯାଉଛି ।
