ଆଡେନ୍, ୨୮/୦୧: ୟେମେନ୍ରେ ଲାଗି ରହିଥିବା ଗୃହ ଯୁଦ୍ଧ ଧିରେ ଧିରେ କୁହୁଳିବାରେ ଲାଗିଛି । ହୁଥି ବିଦ୍ରୋହୀ ଏବଂ ୟେମେନ୍ ସରକାରଙ୍କ ମ୍ଧ୍ୟରେ ଛକାପଞ୍ଝା ଦେଖିବାକୁ ମିଳିଛି । ଯାହାର ପରିଣାମ ସାଧାରଣ ଜନତାଙ୍କୁ ଭୋଗିବାକୁ ପଡ଼ୁଛି । ଏହାରି ମଧ୍ୟରେ ହୁଥି ବିଦ୍ରୋହୀଙ୍କ ପକ୍ଷରୁ ମାରିବ୍ ସିଟିରେ ମିଶାଇଲ୍ ମାଡ଼ କରାଯାଇଥିବା ଜଣାପଡ଼ିଛି । ବୁଧବାର ରାତ୍ରିରେ ହୋଇଥିବା ମିଶାଇଲ୍ ମାଡ଼ରେ ୫ ଜଣଙ୍କ ମୃତ୍ୟୁ ହୋଇଥିବା ବେଳେ ପାଖାପାଖି ୩୪ ଜଣଙ୍କର ମୃତ୍ୟୁ ହୋଇଛି । ଏନେଇ ୟେମେନ୍ ସରକାରଙ୍କ ପକ୍ଷରୁ ସୂଚନା ଦିଆଯାଇଛି ।
ଶୁକ୍ରବାର ୟେମେନ୍ର ଷ୍ଟେଟ୍ ନ୍ୟୁଜ୍ ଏଜେନ୍ସି ସାବା ଏନେଇ ରିପୋର୍ଟ ପ୍ରକାଶ କରିଛି । ସ୍ଥାନୀୟ ବାସିନ୍ଦା ଏବଂ ମେଡିକାଲ୍ ପକ୍ଷରୁ କୁହାଯାଇଛି ଯେ, ବୁଧବାର ଏକ ମିଶାଇଲ୍ ଅଲ୍-ମାଟାର୍ ମିଲିଟାରୀ ବିଲ୍ଡିଂର ପାଖାପାଖି ମାଡ଼ ହୋଇଥିଲା । ମାରିବ୍ ସିଟି ୟେମେନ୍ ସରକାରଙ୍କ ଦକ୍ଷିଣରେ ଥିବା ଏକ ଗୁରୁତ୍ୱପୂର୍ଣ୍ଣ ସ୍ଥାନ । ଏହି ସହର ଶକ୍ତି ସମ୍ୱଳ ପ୍ରଦାନ କରୁଥିବା ଅଞ୍ଚଳ । ଯାହାକୁ ନେଇ ଗତ ବର୍ଷ ଠାରୁ ଆକ୍ରମଣ କରିବାରେ ଲାଗିଛନ୍ତି ହୁଥି ବିଦ୍ରୋହୀ ।
ୟେମେନ୍ ସରକାର ଏବଂ ହୁଥି ବିଦ୍ରୋହୀଙ୍କ ମଧ୍ୟରେ ଅସ୍ତ୍ର ବିରତି ପାଇଁ ଜାତିସଂଘ ପ୍ରୟାସ ଚଳାଇଥିବା ବେଳେ ଏଭିଳି ଆକ୍ରମଣ ଏହି ଉଦ୍ୟମରେ ବାଧା ପହଞ୍ଚାଉଛି । ଫଳରେ ଉଭୟ ପକ୍ଷ ସାମରିକ କାର୍ଯ୍ୟ କଳାପ ବୃଦ୍ଧି କରୁଛନ୍ତି । ତେବେ ସହାୟତା ପ୍ରଦାନ କରୁଥିବା ଏକ ଏଜେନ୍ସି କହିଛି ଯେ ୟେମେନ୍ରେ ଚାଲିଥିବା ଏହି ଯୁଦ୍ଧରେ ୨୮ ଜଣ ସାଧାରଣ ନାଗରିକଙ୍କ ଜୀବନ ଯାଇଥିବା ବେଳେ ଆନ୍ତର୍ଜାତିକ କଟକଣାକୁ ଏଠି ସମସ୍ତେ ବେଖାତିର କରୁଛନ୍ତି ।
