ଉତ୍ତରପ୍ରଦେଶ ୨୧/୦୯: ଉତ୍ତରପ୍ରଦେଶର ବୁଲନ୍ଦଶହରରୁ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଜଣେ ବ୍ୟକ୍ତି ନିଜ ପତ୍ନୀକୁ ପିଟିପିଟି ହତ୍ୟା କରିଛି। ଏହି ପୁରା ଘଟଣାର ଭିଡିଓ ଭାଇରାଲ୍ ହେବାରେ ଲାଗିଛି, ଏହା ପରେ ଅଭିଯୁକ୍ତକୁ ପରିବାରର ଅନ୍ୟ ସଦସ୍ୟଙ୍କ ସହ ଗିରଫ କରାଯାଇଛି।
ଭାଇରାଲ ଭିଡିଓରେ ଦେଖାଯାଇଛି ଯେ ଜଣେ ବ୍ୟକ୍ତି ପରିବାର ସଦସ୍ୟଙ୍କ ଆଗରେ ମହିଳାଙ୍କୁ ଅତି ନିର୍ମମ ଭାବେ ପିଟୁଛି। ମହିଳା ଜଣକ ଚିତ୍କାର କରି ନିଜ ଜୀବନ ପାଇଁ ଭିକ୍ଷା କରୁଛନ୍ତି, କିନ୍ତୁ ବ୍ୟକ୍ତି ତାଙ୍କ ପ୍ରତି ଟିକିଏ ବି ଦୟା କରୁନାହିଁ। ଆଶ୍ଚର୍ଯ୍ୟର କଥା, ସେଠାରେ ଉପସ୍ଥିତ ଥିବା କୌଣସି ଲୋକ ବି ବ୍ୟକ୍ତିକୁ ଅଟକାଇବାକୁ ଚେଷ୍ଟା କରୁନାହାଁନ୍ତି। ଭିଡିଓରେ ମହିଳାଙ୍କ ପାଟିରୁ ରକ୍ତ ବାହାରୁଥିବା ଦେଖିବାକୁ ମିଳିଛି। ଏହି ସମୟରେ ମହିଳାଙ୍କ ମା 'ତାକୁ ଏତେ ନିର୍ମମ ଭାବରେ ମାର ନାହିଁ’ ବୋଲି କହୁଥିବା ଶୁଣିବାକୁ ମିଳୁଛି। ଘଟଣାର ପରଦିନ ମହିଳାଙ୍କର ମୃତ୍ୟୁ ହୋଇଥିବା ଜଣାପଡିଛି। ମହିଳାଙ୍କ ବାପାଙ୍କ ଅଭିଯୋଗ କ୍ରମେ ପୋଲିସ ହତ୍ୟା ଏବଂ ଯୌତୁକ ନିର୍ଯାତନା ଅଭିଯୋଗରେ ଅଭିଯୁକ୍ତ ଏବଂ ତାଙ୍କ ପରିବାରକୁ ଗିରଫ କରିଛି।
ମହିଳାଙ୍କ ଭଉଣୀ ସୋସିଆଲ ମିଡିଆରେ ଭିଡିଓ ଜାରି କରି ତାଙ୍କ ଭଉଣୀ ପାଇଁ ନ୍ୟାୟ ମାଗିଛନ୍ତି। ସେ କହିଛନ୍ତି, ଅଭିଯୁକ୍ତ ତାଙ୍କ ଭଉଣୀଙ୍କୁ ଏହା କହି ବିବାହ କରିଥିଲା ଯେ ସେ ତାର ପ୍ରଥମ ପତ୍ନୀକୁ ଛାଡପତ୍ର ଦେଇଦେବ। କିନ୍ତୁ ସେ ତାଙ୍କୁ କ୍ରମାଗତ ଭାବରେ ପିଟୁଥିଲା। ଭଉଣୀ କହିଛନ୍ତି ଯେ ଆମେ ଚାହୁଁ ଯେ ଆମ ସହିତ ଯାହା ଘଟିଛି ତାହା ଅନ୍ୟ କାହା ସହିତ ନ ହେଉ। ଏପରି ଅଭିଯୁକ୍ତକୁ କଠୋର ଦଣ୍ଡ ଦିଆଯିବା ଉଚିତ୍।
