କେନ୍ଦୁଝର,୧୨/୦୯: ହୋଟେଲ ମାଲିକଙ୍କ ଦବଙ୍ଗ ଗିରି । ୫ ଟଙ୍କା ପାଇଁ ହୋଟେଲ ମାଲିକ ଏବଂ ତାଙ୍କ ପୁଅ ମିଶି ଜଣେ ଗ୍ରାହକଙ୍କୁ ବିଚ୍ ରାସ୍ତାରେ ଅମାନୁଷିକ ଭାବେ ନିର୍ଦ୍ଧୁମ ପିଟିଲେ । ଗ୍ରାହକ ଜଣଙ୍କ ଗୋଡ଼ ହାତ ଧରି ଯେତେ ନେହୁରା ହେଉଥିଲେ ମଧ୍ୟ , ନିଷ୍ଠୁର ବାପା-ପୁଅ ଶୁଣି ନ ଥିଲେ । ଏଭଳି ଅଭାବନୀୟ ଘଟଣା ଘଟିଛି କେନ୍ଦୁଝର ଜିଲ୍ଲା ଘଷିପୁରା ଥାନା ଘସିପୁରା ଲକ୍ଷ୍ମୀ ବଜାରରେ ।
ଘସିପୁରା ଲକ୍ଷ୍ମୀ ବଜାରରେ ଥିବା ମା ହୋଟେଲକୁ ଆଜି ମଧ୍ଧାହ୍ନରେ ଜିତେନ୍ଦ୍ର ଦେହୁରୀ ଖାଇବାକୁ ଯାଇଥିଲେ । ସେଠାରେ ସେ ଭାତ, ଡାଲି ,ତରକାରୀ ଏବଂ ଖଟା ଖାଇଥିଲେ । ସେଥିପାଇଁ ହୋଟେଲ ମାଲିକ ତାଙ୍କୁ ୪୫ ଟଙ୍କା ଦେବା ପାଇଁ କହିଥିଲେ । ଜିତେନ୍ଦ୍ର ପାଖରେ ଥିବା ୪୦ ଟଙ୍କା ଦେଇ ବାକି ୫ ଟଙ୍କା ସନ୍ଧ୍ୟାରେ ଦେବାକୁ କହିଥିଲେ । ଏହି ଘଟଣାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା ।
ଏଥିରେ ରାଗିଯାଇ ହୋଟେଲ ମାଲିକ ଏବଂ ତାଙ୍କ ପୁଅ , ଜିତେନ୍ଦ୍ରଙ୍କୁ ବିଚ୍ ରାସ୍ତାରେ ଅତି ଅମାନୁଷିକ ଭାବେ ନିର୍ଦ୍ଧୁମ ପିଟିଥିଲେ । ଯାହାର ଭିଡିଓ ଏବେ ଭାଇରାଲ ହୋଇ ବିଭିନ୍ନ ସାମାଜିକ ଗଣମାଧ୍ୟମରେ ଘୁରି ବୁଲୁଛି । ଜିତେନ୍ଦ୍ର ଏନେଇ ଘସିପୁରା ଥାନାରେ ଅଭିଯୋଗ କରିଛନ୍ତି ।