Saturday, April 20, 2019

News7

Prameya News7, News7 Odia, Odisha Latest News, Odisha Current Headlines, Odisha News Online

ପୁଲଓ୍ବାମା ଘଟଣା ପାଇଁ ମୁଖ୍ୟମନ୍ତ୍ରୀ ଖେଳିଲେନି ହୋଲି, କଂଗ୍ରେସ କାର୍ଯ୍ୟାଳୟରେ ଧୂମ୍ ଆଉ ସବୁଠି ଖାଁ ଖାଁ, ନାଚିଲେ ତାରା

ଭୁବନେଶ୍ବର ୨୨|୩: ମୁଣ୍ଡ ଉପରେ ନିର୍ବାଚନ । ତା’ ପୂର୍ବରୁ ରଙ୍ଗର ପର୍ବ ହୋଲିକୁ ନେଇ ନେତା ବି କିଛି କମ୍‌ ଜୋସ୍‌ରେ ନଥିଲେ । ପୁଲଓ୍ବାମା ଘଟଣାକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ହୋଲି ଖେଳିନଥିଲେ । ତେଣୁ ବିଜେଡି ପାର୍ଟି ଅଫିସରେ ପଡ଼ିଥିଲା ତାଲା । ହେଲେ ବିଜେଡି ନେତା କିନ୍ତୁ ଯିଏ ଯେଝା ଘରେ ଆଉ ନିଜ ନିଜ ନିର୍ବାଚନ ମଣ୍ଡଳୀରେ ହୋଲିରେ ଲୋକଙ୍କ ସହ ସାମିଲ ହେବାକୁ ଭୁଲିନଥିଲେ । ସେହିଭଳି ବିଜେପି ପାର୍ଟି ଅଫିସ ବି ଖାଁ ଖାଁ ଲାଗୁଥିଲା । ହେଲେ କଂଗ୍ରେସ ଭବନରେ କିନ୍ତୁ ଜମିଥିଲା ରଙ୍ଗର ପର୍ବ । ନିର୍ବାଚନୀ ରଙ୍ଗ ସାଙ୍ଗରେ ଆଜି ହୋଲିର ରଙ୍ଗ ଆଜି ପୁରା ମାହୋଲକୁ ଜମେଇ ଦେଇଥିଲା । କଂଗ୍ରେସ ଭବନର ଦୃଶ୍ୟ ଥିଲା ନିଆରା। ଯୋଉଠି ଯୁବ, ମହିଳାଙ୍କ ଠାରୁ ଆରମ୍ଭ କରି ବରିଷ୍ଠ ନେତା ହୋଲି ରଙ୍ଗରେ ନିଜକୁ ରଙ୍ଗେଇ ଦେଇଥିଲେ । ବାଜା ବଜାଇ ଖୁବ୍‌ ଝୁମିଥିଲେ ନେତା ।  ରାସ୍ତାରେ ଯାଉଥିବା ଲୋକଙ୍କୁ ରଙ୍ଗବୋଳି ଭାଇଚାରାର ବାର୍ତ୍ତା ବାଣ୍ଟିବାକୁ ଚେଷ୍ଟା କରୁଥିଲେ ।

ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା ପରେ ଦଳ ଭିତରେ ଅସନ୍ତୋଷର ଛିଟାକୁ ରଙ୍ଗର ଛିଟାରେ ଲୁଚାଇବାକୁ ଚାଲିଥିଲା ଚେଷ୍ଟା । ଏମିତିରେ ପୁଣି ଆଜି ଦ୍ବିତୀୟ ପର୍ଯ୍ୟାୟ ତାଲିକା ଘୋଷଣା ହେବାର ଅଛି । ତାକୁ ନେଇ ଉତ୍ସାହିତ ରାଜ୍ୟ କଂଗ୍ରେସ କ୍ୟାମ୍ପ୍‌ । କଂଗ୍ରେସ ଭବନରେ ସିନା ରଙ୍ଗ ଖୁବ୍‌ ଚଢ଼ିଥିଲା, ହେଲେ ଆଜି ନବୀନ ନିବାସରେ କିନ୍ତୁ ଦେଖିବାକୁ ମିଳିନଥିଲା ଗହଳି ଚହଳି । ପୁଲଓ୍ବାମା ସହିଦଙ୍କ ସ୍ମୃତିରେ ମୁଖ୍ୟମନ୍ତ୍ରୀ ହୋଲି ଖେଳିବାକୁ ମନା କରିଦେଇଥିଲେ । ତେଣୁ ନବୀନ ନିବାସକୁ ନେତାଙ୍କ ଭିଡ଼ ନଥିଲା । ଏମିତିରେ ବିଜେଡି ପାର୍ଟି ଅଫିସରେ ବି ତାଲା ପଡ଼ିଥିଲା । ହେଲେ ନେତା କିନ୍ତୁ  ଯିଏ ଯେଝା ଘରେ ଆଉ ନିଜ ନିଜ ନିର୍ବାଚନ ମଣ୍ଡଳୀରେ ଲୋକଙ୍କ ସହ ରଙ୍ଗ ଖେଳିବାକୁ ଭୁଲି ନଥିଲେ ।

ସେପଟେ କିନ୍ତୁ ବିଜେପି ଅଫିସ ବି ଥିଲା ଖାଁ ଖାଁ । ଟିକଟ ବଣ୍ଟାକୁ ନେଇ ଦଳୀୟ ଅସନ୍ତୋଷ ପାର୍ଟି ଅଫିସରେ ରଙ୍ଗର ପର୍ବକୁ ଫିକା କରିଥିଲା ।

ସେପଟେ କିନ୍ତୁ ଜୟପୁରରେ ଜମିଥିଲା ଉଭୟ ରବି ଆଉ ତାରାଙ୍କ ରଙ୍ଗ ଖେଳ । ନିର୍ବାଚନ ପୂର୍ବରୁ ଦୁଇ ପାରମ୍ପରିକ ପ୍ରତିଦ୍ବନ୍ଦ୍ବୀ  ନିଜ ନିଜ ସମର୍ଥକଙ୍କ ମେଳରେ ରଙ୍ଗ ଖେଳରେ ମାତିଥିଲେ । ଗୋଟେ ପଟେ ବିଜେଡି ପ୍ରାର୍ଥୀ ତଥା ପୂର୍ବତନ ବିଧାୟକ ରବି ନନ୍ଦ ରଙ୍ଗର ପର୍ବ ସହିତ ନିର୍ବାଚନୀ ରଙ୍ଗକୁ ମେଳ କରିବାକୁ ଚେଷ୍ଟା କରୁଥିବା ବେଳେ । ଲୋକଙ୍କ ସହ ମିଶି ତାଳ ପକାଉଥିଲେ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି । ସେପଟେ ରାଜନୈତିକ ଶତୃତାକୁ ଭୁଲି ତାରାଙ୍କ ସହ ତାଳି ପକାଇ ଭାଇଚାରାର ବାର୍ତ୍ତା ବାଣ୍ଟିବାକୁ ଚେଷ୍ଟା କରୁଥିଲେ ଏଥର ବିଏସପିରୁ ପ୍ରାର୍ଥୀ ହୋଇଥିବା କୃଷ୍ଣ ଚନ୍ଦ୍ର ସଗରିଆ ।

ନେତାଙ୍କ ନଜର ଏବେ ନିର୍ବାଚନ ଉପରେ । ଏମିତିରେ ଭାଇଚାରା ବଢ଼ାଇବାକୁ ମଉକା ଆଣିଦେଇଛି ରଙ୍ଗର ପର୍ବ । ଲୋକଙ୍କ ସହ ଯୋଡ଼ିହେବାର ଏଭଳି ଏକ ସୁଯୋଗକୁ କେହି ହାତଛଡ଼ା କରିବାକୁ ଚାହିଁନାହାନ୍ତି । 

233 Views

   ସମ୍ବନ୍ଧିତ ଖବର